E Na o Tusiga Faaeletonika: Aoaoga a Taitai o le Ekalesia mai Ala o Faasalalauga Faaagafesootai
O Faamanuiaga o le Usiusitai
Tagai i mea na aoao mai e perofeta, aposetolo, ma isi taitai o le Ekalesia i luga o ala o faasalalauga faaagafesootai e uiga i le taua o le usiusitai i poloaiga a le Atua.
Leoleo Mamoe Agavaivai, saunia e Yongsung Kim
I le talanoa ai e uiga i le aoaoina o tamaiti, sa saunoa ai Peresitene Russell M. Nelson e uiga i le mana o le usiusitai i poloaiga a le Tama Faalelagi. Na Ia fetalai mai:
“Aoao atu e uiga i le faatuatua e tausi ai poloaigauma a le Atua, ma ia iloa o poloaiga ua tuuina mai e faamanuia ai Lana fanau ma aumai ai ia i latou le olioli [tagai i le 2 Nifae 2:25. Lapatai atu ia i latou o le a latou fetaui i ni tagata o le a latou filifili po o le fea poloaiga latou te tausia ae lē ano i isi poloaiga latou te filifili e soli. Ou te ta’ua lenei mea o le ‘ai filifili i poloaiga e usitai i ai. O lenei faiga o le ilo ma filifili o le a lē manuia. O le a oo atu ai i le faanoanoa. Ina ia saunia e fetaia’i ma le Atua, e ao ona tausia ai e se tagata Ana poloaiga uma. E manaomia le faatuatua e usiusitai ai, ma o le tausia o Ana poloaiga o le a faamalosia ai lena faatuatua.
“O le usiusitai e mafai ona tafe mai ai faamanuiaga a le Atua e aunoa ma le tau taofiofia. O le a Ia faamanuiaina Ana fanau usiusitai i le saoloto mai le saisaitia ma le faanoanoa. Ma o le a Ia faamanuiaina i latou i le malamalama e sili atu.”1
A o tatou faaali atu lo tatou alolofa i le Tama Faalelagi e ala i le tausia o Ana poloaiga (tagai i le Ioane 14:15), e mafai ona tatou maua faamanuiaga mamana. Ina ia fesoasoani ia i tatou i la tatou taumafaiga e mulimuli atili i poloaiga a le Atua, mafaufau i aoaoga ia talu ai nei mai taitai o le Ekalesia na tuuina i luga o ala o faasalalauga faaagafesootai.
O Le Poloaiga Muamua ma le Sili—Alofa i le Atua
“I le avea ai ma se peresitene talu ai o le [Iunivesite o Polika Iaga], sa ou fiafia lava e lauga atu i tamaiti aoga ma faiaoga i le faigalotu o lenei taeao. …
“Sa ou valaaulia tamaiti aoga e mafaufau pe latou te lototetele ina ia o latou i ai i se tulaga ese ma pe o latou agai i luma e tetee atu i mea faafeagai o le lalolagi. E sili atu ona taua nai lo le mea e faia e se tagata toatasi o se tamaitiiti aoga, o filifiliga ia o loo latou faia i o latou lava olaga patino—o mea e faamuamua o loo latou faaaogaina ma le iloa lelei po o le lē mafaufauina foi.
“E le tatau ona galo ia i tatou le aoaoga a le Faaola e faapea o le ‘poloaiga muamua ma le sili’ i le tulafono o le ‘alofa atu i le Alii lou Atua ma lou loto atoa, ma lou agaga atoa, ma lou manatu atoa,’ ma le poloaiga lona lua ‘e faapena foi ia, E te alofa atu i lē lua te tuaoi e pei o oe lava ia te oe.’
“O le alofa i le tuaoi—tusa poo le a le tāua—e lē muamua i le alofa i le Atua ma le usiusitai i Ana poloaiga. Afai tatou te alolofa moni i le Atua ma auauna atu ia te Ia e pei ona Ia aoao mai ia i tatou, o le a tatou alolofa i o tatou tuaoi e pei ona alofa le Atua ia te ia ma e pei ona Ia finagalo ia tatou alolofa ma auauna atu ia i latou.
“Sa alofa pea lava pea Iesu, ae sa tuusao lava e lē aunoa i Ana poloaiga ma faamoemoega. I le fafine na molia atu i le mulilua sa Ia taofia mai le tausalaina o ia i lena taimi, ae na faaiuina i le faatonuina o ia e ‘alu i lou ala, ma aua le toe agasala.’
“Ma sa Ia faaiuina le aoaoga manino ma maioio o le Lauga i luga o le Mauga i le taitaiga lē mafaatusaina ‘O lenei ia atoatoa ona lelei o la outou amio, e pei lava o lo outou Tama o i le lagi e atoatoa ona lelei o ia.’ Tatou te agai atu i lena tulaga paia e ala i mea e faamuamua e mulimuli i le Faaola e aunoa ma le fetuuna’ia e tulaga faatauaina ma amioga faalelalolagi.
“O le tausia o tulaga faatonuina o le talalelei e lē avea ai oe ma se e i le vasega lona lua pe tausalaina ai lau faataitaiga i le lē mailoa. O i tatou uma ua tatou iloa ni tagata ua faaleleia a latou faatinoga i le tulaga lelei ma iloagofie e ala i le ese mai le motu o tagata.
“Ou te toe faaleo atu upu na aoao mai e Peresitene Russell M. Nelson: ‘Faamolemole talitonu mai ia te a’u, a fausia mautu loa lou faavae faaleagaga i luga o Iesu Keriso, e le manaomia ona e fefe. A o e faamaoni i au feagaiga na osia i totonu o le malumalu, o le a faamalosia oe e Lona mana.’”
Peresitene Dallin H. Oaks, Facebook, 13 Set., 2022, facebook.com/dallin.h.oaks.
O Le Poloaiga Ina Ia Papatiso
“E faigofie lava le talalelei. Ona o le taulaga togiola a le Faaola, ua mafai ai ona faamamāina ma suia i tatou. O lenei mea e amata lava i le faatuatua ia Iesu Keriso. Tatou te talitonu ia te Ia, faatuatua ia te Ia, ma faalagolago ia te Ia. O lena faatuatua e taitai atu ai i tatou i le salamo.
“Tatou te mananao e faaali atu lo tatou alofa mo Ia e ala i le tausia o poloaiga. Na aoao mai Iesu e ala i faataitaiga a o papatisoina o Ia lava. O le papatisoga o se tasi o Ana poloaiga.
“A mavae le papatisoga, ua Ia folafola mai e tuu mai ia i tatou le meaalofa o le Agaga Paia. O le a taialaina ma faamafanafanaina i tatou, ma o le a fesoasoani le Agaga Paia ia i tatou ia iloa le upumoni. O le a tatou lagonaina o loo faatasi le Agaga Paia ma i tatou. O le a tatou maua lagona o le filemu, alofa, ma le olioli, ma o le a tatou maua le naunautai e auauna atu i isi. O le a tatou taumafai i o tatou olaga atoa e faafiafia le Alii.
“A tatou talitonu ia te Ia, faamoemoe ia te Ia, ma faalagolago ia te Ia—ma faia soo—o le a tatou lagonaina le mafanafana o le mafutaga a le Agaga Paia. O le a tatou maua le malosi e onosaia ai soo se luitau e tuuina mai ia i tatou ma tausia poloaiga e aunoa ma le faamalosia.’
Peresitene Henry B. Eyring, Facebook, 24 Iuni, 2023, facebook.com/henry.b.eyring.
O Se Ki i le Mauaina o le Fiafia
“Ua lofituina lava au i le agalelei o le Alii ma Lona faatuatuaga o loo ia te oe ma au. O tatou uma o tagata masani o le Ekalesia. E leai se tasi o i tatou e maoa’e atu. O i tatou ua na o ni fanau a le Atua o loo taumafai e fai le mea sa’o mo le mafuaaga sa’o. O loo tatou taumafai e tausia o tatou aiga i le ala sa’o ina ia latou alolofa i le Alii ma mananao e taumafai e tausi Ana poloaiga. I le faagasologa, ua tatou maua ai ni avanoa matagofie ma tāua ni filifiliga manuia.
“Pe a oo mai le faamasinoga mulimuli o i tatou, o le a lē o le aofai o fonotaga sa tatou auai, le aofai o fonotaga sa tatou taitaia, po o asiasiga uma sa tatou faia. Nai loo lena, o le a matua’i talisapaia e le Alii i latou o loo saili ma fesoasoani i isi i luga o le ala o feagaiga.
“O Iesu Keriso o lo tatou uso ma la tatou uo sili. E alofa o Ia ia i tatou ma ua ia faaali mai ia i tatou le ala. O mea e manaomia e oe ma a’u e maua ai le fiafia o loo i ai i le taumafai e tausi Ana poloaiga ma taumafai ia avea e faapei o Ia i le telē tatou te mafaia. O aso taitasi o se avanoa e pa’i atu ai i se olaga, aapa atu ai i se tasi e manaomia oe ma ofo atu se upu faamalosiau.”
Peresitene M. Russell Ballard (1928--2023), Facebook, 26 Set., 2021, facebook.com/mrussell.ballard.
O le Fesoasoani mai le Faaola
“Sa faamamaluina i maua ma Lesa e faaalu sina taimi faatasi ma lenei vaega ofoofogia o faifeautalai O Le Ekalesia a Iesu Keriso o le Au Paia o Aso e Gata Ai i se asiasiga talu ai nei i le Nofoaga Autu e Aoao ai Faifeautalai i Pasila. Sa matou talanoa e uiga i faamanuiaga lea e maua mai le usiusitai i poloaiga a le Atua. E moni lenei mea mo faifeautalai—ma mo i tatou uma.
“Sa ou faasoa atu i nei alii ma tuafafine ofoofogia o i tatou uma o fanau a se Tama Faalelagi alofa. E finagalo o Ia i lo tatou manuia silisili ma le alualu i luma e faavavau i lenei olaga ma i le olaga a sau.
“E mafai e lo tatou Faaola o Iesu Keriso ona fesoasoani ia i tatou ia maua nei faamanuiaga mai lo tatou Tama. Ou te molimau atu ia te Ia, ma Lana matafaioi togiola paia o lo tatou Faaola.”
Elder Gary E. Stevenson, Facebook, 1 Iuni, 2023, facebook.com/stevenson.gary.e.
O Auala e 3 e Maua ai le Malutaga Faaleagaga
“E mafai ona tatou puipuia i tatou lava mai asiosio faigata o le olaga i le ‘malutaga faaleagaga o le Faaola.’ O vaega e tolu e mafai ona fesoasoani ia i tatou ia i ai i lalo o le malutaga faaleagaga o le Faaola e aofia ai le:
“Faaaogaina o le mana o le Faaola i o tatou olaga.
“Faataunuuina ma le faamamaluina o feagaiga paia i le atoatoa.
“Faamaoni i tiutetauave faaletagata lava ia ma faaleaiga e tausia poloaiga ma aoao o tatou aiga i le talalelei.
“Afai tatou te tumau ma le le mafaagaeetia i le tausiga o poloaiga a le Atua i le faatuatua ma le filiga, e mautinoa lava o le mafanafana o le malutaga a le Faaola o le a suia ai le tiga o o tatou aafiaga, o le a suia e le filemu le faigata, o le a suia e le faamoemoe le faanoanoa, ma o le a liua tofotofoga i faamanuiaga.”
Elder Ulisses Soares, Facebook, 9 Fep., 2023, facebook.com/soares.u.
Ola e Sili Atu ona Faamoemoeina
“O le isi vaitau matagofie o le Kerisimasi ua oo mai ma mou atu. O le toatele o i tatou e moomoo maimau pe ana mafai ona tumau ai pea lagona matagofie lea e siomia ai le Kerisimasi i le tausaga atoa, ae aisea e lē tatau ai ona tatou lagonaina soo na lagona? O le Kerisimasi o se vaitau lea e masani ona tatou lagona atili ai le manao e vaai ma auauna atu ma alolofa i isi lea, e pei ona ta’u mai e tusitusiga paia ia i tatou, o se auala e alolofa ma auauna atu ai i le Atua—o meaalofa mo le Faaola i lenei vaitau pe a tatou faamanatuina Lona soifua mai. O se taimi o le taulaiga sili atu i fafo, le tele o le ola faamoemoeina o poloaiga sili muamua ma le lona lua.
“O poloaiga ia alolofa ma auauna atu i le Atua ma i latou o siomiaina i tatou e mo lo tatou lava manuia ma o le a tele atu mea tatou te faia e aumaia ai na lagona matagofie o le filemu ma le olioli i o tatou olaga nai loo se isi lava mea e mafai. A o tatou mulimuli i aso taitasi i le faataitaiga a lo tatou Faaola o le alofa ma le tausiga o isi, e oo lava i nai auala laiti, o le a tatou manatua pea lava pea o Ia ma faasolosolo ai ina avea atili e faapei o Ia. Ona mafai lea ona ‘lagona e pei o le Kerisimasi’ i aso uma aua o na lagona matagofie e mafai ona oo mai e ala i le faatumulia i le alofa o le Faaola. Sei o tatou vaai pe mafai ona tatou faia lenei tausaga fou ‘ia lagona le pei o le Kerisimasi’ i se tulaga faifai pea. Tau ina ia tofu outou taitoatasi ma se [tausaga] e faatumulia ia Keriso!!”
Sister J. Anette Dennis, Facebook, 3 Ian, 2023, facebook.com/RS1stCounselor.
O Se Valaaulia mai le Atua e Mulimuli ia te Ia
“O se tasi o … pese a le Peraimeri sa ou suesueina talu ai nei o le ‘Ou Te Manaomia Lo’u Tama Faalelagi’ (I Need My Heavely Father) [Children’s Songbook, 18]. Ou te fiafia i le auala o loo faasoa mai ai e lenei pese e faapea, e finagalo lo tatou Tama Faalelagi ia tatou fiafia ma e mafai ona tatou fiafia e ala i le filifili e mulimuli ia te Ia ma Lona Alo, o Iesu Keriso. E alofa le Tama Faalelagi ia i tatou taitoatasi. O a ni auala o le a e filifili e auauna atu ai i a te Ia i le asō?” …
“Na o lo’u manao lava e [faasoa] atu se fuaiupu mai lena pese. O loo faapea mai, ‘Ou te manaomia lo’u Tama Faalelagi e fesoasoani mai ia te a’u i aso uma. E finagalo o Ia ina ia ou fiafia ma filifili le ala sa’o.’ Ou te fiafia i lena mea ona o se valaaulia ia manatua e uunaia le Atua e le alofa mo i tatou ma mo lo tatou fiafia.
“Sa ou faaaogaina foi se avanoa e faitau ai … se tasi o mau faasino o loo maua i le pese, ma o loo i le Alema 30:8. O loo faapea mai, ‘Ona ua faapea ona fai mai o tusitusiga paia: Inā filifili ia outou i le aso nei, po o ai tou te auauna i ai.’
“Uo, ou te faamoemoe o le a outou auai faatasi ma au ma o le a outou filifili e auauna atu i le Tama Faalelagi i le asō ma aso uma ona e uunaia o Ia e le alofa. Tatou te alolofa ia te Ia, ma tatou te mananao i lena fiafia i o tatou olaga.”
Sister Tracy Y. Browning, Facebook, 26 Set., 2022, facebook.com/Primary2ndCounselor.