Sa Manaomia Ona Ou Auauna Atu ia te Ia

Saunia e Shantel Johnson, Wyoming, ISA

Sa aoaoina au e lo’u peresitene o le Aualofa e faapea, e ala i le auauna atu, e mafai moni ai ona tatou fesootai.

Ata

tamaitai o loo tilivaina meaai i se fale

Ata na tusia e Dilleen Marsh

Ina ua ou maitaga i la’u uii, sa avea Margaret Blackburn ma peresitene o le Aualofa a le matou uarota. Sa itiiti se taimi na iloa ai e le tasi le isi mai le taimi puupuu na ma faatasi ai i le taimi o sauniga i le lotu.

Ina ua uma ona ou fanauina la’u pepe, sa aumai e tamaitai ni meaai i lena vaiaso muamua, e aofia ai Margaret, o lē sa matua ma auvaivai. Sa ou faafetai ona sa leai so’u malosi po o se manao e fuafua se meaai, kuka, po o se faatauga mo mea e manaomia—po o mea uma na e tolu.

Ina ua mavae lena vaiaso muamua, sa faaauau pea ona aumai e Margaret ni meaai. Pe o ni meaai kuka i le fale po o ni meaai na totoe mai se gaoioiga a le uarota, sa le’i afaina ia te au. Sa toetoe lava a pei na ia iloaina e sili atu nai lo le mea na ou manaomia o se tasi e siiina la’u pepe pe faamama lo’u fale, sa ou manaomia le faamanuiaga o le tau le mafaufau po o le a le mea e fai mo le taumafataga o le afiafi.

I se taimi puupuu mulimuli ane, sa faamaloloina ai Margaret mai lona valaauga ona o le faaletonu o lona soifua maloloina. Ou te lei iloaina i lena taimi, ae sa togafitia o ia i le gasegase o le kanesa.

O le taimi lava na ou iloa ai lona ma’i, sa ou iloa ai le mea e tatau ona ou faia. Sa manaomia ona ou auauna atu ia te ia—e le faapea ona sa ou nofo aitalafu ai ia te ia pe manaomia ona toe totogi atu lona agalelei. Ae, ona o lana auaunaga ia te au, sa faatupuina ai lo’u alofa ia te ia.

Sa aoaoina a’u e Margaret e faapea, e ala i le auauna atu, e mafai moni ai ona ma fesootai. Ina ua ou mafaufau i lenei tamaitai maoae, sa tiga lo’u loto i le mafaufau i lona tuleia o se masini salu pefu po o le saluina o le fola o le umukuka. O lea, o vaiaso taitasi sa amata ai ona ou asiasi atu ia te ia ma faamamā lona fale.

I se tasi aso a o ou agai atu i le fale i se taimi mulimuli ane, sa lofituina au i le agaga faafetai ona sa faatulagaina e le Tama Faalelagi nei avanoa agaalofa. Ana faapea e le auauna mai Margaret ia te au ma le filiga tele, atonu o le a ou le maua le toafimalie e faia ai ni asiasiga masani i lona fale. Sa ou faatauaina tele lena taimi faatasi ma ia! Na silafia e le Atua o le auina mai o ia ia te au i taimi na ou manaomia ai, o le a amataina ai le ala mo au e auauna atu ai ia te ia i ona taimi o mafatiaga.

Sa faatumulia ou mata i loimata a o ou iloaina le atoatoa o le faafesootaia o i ma’ua e faavavau e nei musumusuga ma avanoa faaleauaunaga.