Fakakomipiuta Pē
Ngaahi Ngāue Fakaofo ʻe 15 ʻo e Polokalama Tohi ʻa Molomoná
Fakaʻaongaʻi ha polokalama ke faingofua ange ai hono vahevahe ʻo e ongoongoleleí ʻi ha toe taimi! Mahalo ʻe tokoni lahi ʻa e ngaahi fakakaukau ʻe 15 ʻoku hā mataʻāʻā atu ʻi laló.
Kuó ke ʻosi fepōtalanoaʻaki nai mo ha sola fekauʻaki mo e ongoongoleleí? Mahalo pē naʻe ʻi ha pasi, ʻi ha paʻake, pe ʻi he tuʻu laine ke maʻu meʻatokoní. ʻE lava ke talanoaʻi ʻa e kaveinga ʻo Sīsū Kalaisí mo ʻEne ngaahi akonakí ʻi ha meimei feituʻu pē, ʻi ha faʻahinga taimi pē.
Kapau kuó ke ʻi ha tuʻunga peheni, naʻá ke fakaʻamu nai naʻá ke maʻu ha meʻa mahuʻingamālie te ke lava ʻo ʻoange ki hoʻo kaungāmeʻa foʻoú—ko ha meʻa te ne ala poupouʻi ia ke hokohoko atu ʻene ako fekauʻaki mo e Fakamoʻuí mo ʻEne ongoongoleleí? Mahalo naʻá ke ʻiloʻi naʻá ne fiemaʻu ʻa e mālohi ʻo e Tohi ʻa Molomoná, hangē ko e akonaki ʻa Palesiteni Lāsolo M. Nalesoní, ke “fakamoʻui, fakafiemālieʻi, fakafoki, tokoniʻi, fakamālohia, fakanonga, mo fakafiefiaʻi [hono] laumālié.”1
ʻOku ʻikai faʻo ʻe he tokotaha kotoa pē ha Tohi ʻa Molomona ʻi ha peesi pe kato ʻi mui, ka ko e tokolahi ʻo kitautolu ʻoku tau toʻotoʻo ha telefoni toʻotoʻo pea lava ke tau maʻu ha polokalama ʻoku faingofua hono ʻave holó mo vahevahé! ʻI he taimi ʻe niʻihi ʻe lava ke ʻaonga ange hono maʻu e tatau fakaʻilekitulōnika ko ʻení ʻi ha tohi kuo paaki.
ʻOku ui ia ko e polokalama Tohi ʻa Molomoná. Kapau kuo teʻeki ai ke ke ʻiloʻi ia, teuteu ke ke ofo!
Te ke saiʻia ʻaupito ʻi he founga ʻe lava ke tokoniʻi ai kitautolu ʻe he polokalamá ni ke tau ngāueʻi ʻa e faleʻi ʻa ʻEletā Lānolo A. Lasipeni ʻo e Kōlomu ʻo e Kau ʻAposetolo ʻe Toko Hongofulu Mā Uá ke “muimui ki hotau palōfita ʻofeina ko Palesiteni Nalesoní, ʻi hono lōmakiʻi ʻaki e māmaní e Tohi ʻa Molomoná. ʻOku fuʻu lahi e fiemaʻú; pea ʻoku fiemaʻu ke tau ngāue leva he taimí ni.”2
ʻE Lava Nai Hoʻo Tohí ʻo Fai Ia?
He ʻikai ha meʻa te ne teitei fetongi ʻa e ongoʻi fiemālie ʻi ha tohi lelei, pea ko e Tohi ʻa Molomoná ko ha tohi lelei ʻaupito ia ke fiemālie ai! Ka ʻe lava nai ʻe hoʻo tatau fakapepá ʻo laukonga atu pē kiate koe? ʻE lava nai ʻo ulo atu hono ngaahi leá ʻi he fakapoʻulí pe tukuhake ʻa e mataʻitohí ke faingofua ange hono laú? ʻE lava ʻe he polokalama Tohi ʻa Molomoná ʻo fai ʻa e ngaahi meʻa ko iá! Pea te ne lava ʻo fakahoko ia ʻi ha lea fakafonua ʻe 100 tupu! Ko e ngaahi meʻa lahi ange ʻeni ʻoku ʻi he polokalama Tohi ʻa Molomoná:
-
Ko e kakato ʻo e Ngaahi Vitiō ʻo e Tohi ʻa Molomoná, kau ai kinautolu ʻoku fakatātaaʻi ai e ʻaʻahi ʻa Sīsū Kalaisi ki he Ongo ʻAmeliká ʻi he kuonga muʻá.
-
Ngaahi vitiō ʻokú ne fakafeʻiloaki ʻa e Tohi ʻa Molomoná mo e meʻa ʻoku fekauʻaki mo iá.
-
Ngaahi vitiō ʻoku vahevahe ai ʻa e ngaahi aʻusia ʻa ha niʻihi kehe naʻa nau maʻu ha mālohi mo ha ngaahi tali ki he ngaahi faingataʻa ʻo e moʻuí ʻi he Tohi ʻa Molomoná.
-
Ko e malava ko ia ke kamata ha fetalanoaʻaki moʻoni mo ha faifekau ʻi he taimi ʻoku haʻu ai ha fehuʻi ki ho ʻatamaí.
-
Fakamatala ki he fetuʻutaki ki he kau faifekau fakalotofonuá mo hono kumi ha haʻofanga ke lotu aí.
ʻOku ʻomi ʻe he polokalama Tohi ʻa Molomoná ʻa e ngaahi meʻá ni kotoa mo ha meʻa lahi ange!
Ne Faʻú ke Vahevahe
Mahalo ko e taha ʻo e ngaahi meʻa lelei taha ʻi he polokalama Tohi ʻa Molomoná ko e ngaahi meʻa ʻoku malava ʻo vahevahé. ʻI haʻo lomiʻi tuʻo taha pē, te ke lava ʻo fakaʻaliʻali ha kouti ʻe lava ke scan ʻe he niʻihi kehe ʻoku nau fakaʻaongaʻi ha telefoni toʻotoʻó ke nau ʻalu hangatonu ki he polokalamá ʻi ha falekoloa polokalama ʻi he ʻinitanetí. ʻI hono download ʻa e polokalama Tohi ʻa Molomoná, ʻokú ne ʻiloʻi pē ʻa e lea fakafonua ʻo e meʻangāue ʻa e tokotaha ʻokú ne maʻú pea download ʻa e polokalama Tohi ʻa Molomoná ʻi heʻene lea fakafonuá. Fakakaukau angé ki he faingamālie lelei ʻe hoko ʻi haʻo folau ki muli, fononga ʻi ha lēlue, pe naʻa mo ho kolo tupuʻangá!
ʻOku kau ʻi he ngaahi founga vahevahe kehé ʻa e malava ko ia ke ʻave ha fehokotakiʻanga download ʻi he text, ʻīmeili, mo ha ngaahi meʻa lahi ange.
Download ʻa e Polokalamá ʻi he ʻAhó Ni!
Ke download ʻa e polokalama taʻetotongi ʻo e Tohi ʻa Molomoná pea ʻiloʻi e mālohi ʻo e Tohi ʻa Molomoná maʻau mo e niʻihi kehé, fekumi pē ki he “Book of Mormon app” ʻi hoʻo falekoloa polokalama ʻi he ʻinitanetí (online app store).