“Ko e Taumuʻa ʻa e Siasí ke Tokoniʻi ʻa e Fānau Kotoa ʻa e ʻOtuá,” Liahona, Fēpueli 2024.
Talitali Lelei Kimoutolu ki he Makasini ko ʻEní
Ko e Taumuʻa ʻa e Siasí ke Tokoniʻi ʻa e Fānau Kotoa ʻa e ʻOtuá
Mei he ʻotu motu moʻungaʻia ʻo Vanuatú ki he ngaahi tafungofunga ʻo Pelisiumé, ʻe lava ke maʻu ʻa e kāingalotu ʻe toko 17 miliona ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi ha ngaahi uooti mo ha ngaahi kolo ʻe 31,000 tupu ʻi he funga ʻo e māmaní.
Ko hono poupouʻi ko ia ha siasi fakaemāmani lahí ko ha ngāue mafatukituki ia ʻoku kau ai hono tokangaʻi ʻo e vahehongofulú mo e ngaahi foaki ʻaukaí, ko hono langa mo tauhi ʻo e ʻū ʻapisiasí mo e ʻū temipalé, pea mo hono faʻu mo tufaki ʻo e ʻū tohi maʻuʻanga tokoni ʻo e ongoongoleleí hangē ko e folofolá mo e ʻū tohi himí.
Ko ha niʻihi ʻeni ʻo e ngaahi fatongia lahi ʻo e Kau Pīsopeliki Pulé, ʻa ia ʻoku nau ngāue ʻi he malumalu ʻo e fakahinohino ʻa e Kau Palesitenisī ʻUluakí ke tokangaʻi ʻa e ngaahi meʻa fakatuʻasinó, pe ngaahi tafaʻaki fakatuʻasino, ʻo e Siasí.
Naʻe ʻikai lahi ʻeku ʻilo fekauʻaki mo e Kau Pīsopeliki Pulé kimuʻa peá u fai ha ngaahi tohi maʻá e Church News fekauʻaki mo e ngaahi meʻa fakatuʻasino ʻa e Siasí. Naʻe ʻikai ngata pē ʻi heʻeku ako ki he fatongia mo e taumuʻa ʻo e Kau Pīsopeliki Pulé ʻi he Siasí, ka naʻá ku ʻiloʻi ai ʻa e founga ʻe lava ke tokoni ai ʻenau ngāué ki heʻetau moʻuí mo hotau ngaahi uiuiʻí (vakai, peesi 12).
Ko e tefitoʻi moʻoni ʻe taha naʻá ku akó, ko e fakataumuʻa ʻa e Siasí ki he kakaí—mei Vanuatu ki Pelisiume pea ʻi he feituʻu kotoa pē. ʻOku fakataumuʻa ia ki hono tokoniʻi ʻa e fānau kotoa ʻa e ʻOtuá ke nau fili ke foki ki ʻapi kiate Ia mo maʻu ʻa e ngaahi tāpuaki ʻo e Fakalelei ʻa e Fakamoʻuí. Hangē ko e akonaki ʻa ʻEletā D. Toti Kulisitofasoni ʻi he makasini ko ʻení, “ʻOku maʻu ʻa e fiefia tuʻuloá ʻi he kātaki ʻi he ongoongolelei ʻo Sīsū Kalaisí mo hono tokoniʻi ʻo e niʻihi kehé ke nau fai ʻa e meʻa tatau” (peesi 4).
ʻOku ou fakatauange ʻe lava ke hoko ʻeni ʻo moʻoni kiate kitautolu takitaha.
Fakaʻapaʻapa atu,
Sydney Walker
Church News [Ongoongo ʻo e Siasí]
“Pea nau vivili atu ʻi honau halá ʻo piki maʻu maʻu ai pē ki he vaʻa ukameá, kae ʻoua kuo nau ō mai ʻo tō ki lalo ʻo kai mei he fua ʻo e fuʻu ʻakaú.”
Ko e ʻOfa ʻa e ʻOtuá, tā fakatātaaʻi ʻe Sabrina Squires