Tala Fou o Malumalu
Sa faasilasila mai e Peresitene Russell M. Nelson ni fuafuaga e fausia ni malumalu faaopoopo se 17, ma aumaia ai i le 100 le aofai o malumalu na faasilasila mai talu ona avea o ia ma Peresitene o le Ekalesia.
O le a fausia malumalu i Ueligitone po o talaane o Ueligitone, Niu Sila; Brazzaville, Ripapelika o Congo; Barcelona, Sepania; Birmingham, United Kingdom; Cusco, Peru; Maceió ma Santos, Pasila; San Lui Potosí and Mexico City Benemérito, Mekisiko; ma i le ISA, Tampa, Florida; Knoxville, Tennessee; Cleveland, Ohaio; Wichita, Kansas; Austin, Texas; Missoula, Monatana; Montpelier, Idaho; ma Modesto, Kalefonia.
Faafouga Faaopoopo
Talu mai le konafesi aoao talu ai, ua faapaiaina pe toe faapaiaina malumalu, ua fofogaina mai maimoaga a o lei faapaiaina, ma le suatiaina o eleele ua faatulagaina i le salafa o le lalolagi.
Sa faapaiaina le Malumalu o Winnipeg Manitoba (Kanata) ma le Malumalu o Pocatello Idaho (ISA), ma sa toe faapaiaina le Malumalu o Mesa Arisona (ISA). O aso o le faapaiaga po o le toe faapaiaga ma maimoaga na fofogaina mo malumalu i Yigo, Guam; Praia Cape Verde; Rio de Janeiro, Pasila; Uosigitone, D.C., ISA; ma Tokyo, Iapani.
Sa suatiaina le eleele mo le Malumalu o Casper Wyoming (ISA), o le Malumalu o Pago Pago Amerika Samoa, o le Malumalu o Bacolod Filipaina, ma le Malumalu o Freetown Sierra Leone. Ua faatulagaina le suatiaina o le eleele mo malumalu i nofoaga nei i le ISA: Grand Junction, Colorado; Lindon, Iuta; Farmington, Mekisiko Fou; Elko, Nevada; Burley, Idaho; Yorba Linda, Kalefonia; ma Smithfield, Iuta.
Na fofogaina mai nofoaga, ma sa tuuina atu ai fatufatuga a le tusiata, mo le Malumalu o Cape Town Aferika i Saute, le Malumalu o Querétaro Mekisiko, ma le Malumalu o Ephraim Iuta.
Faafouga
O galuega o le fausiaina ma le toefaafouga o loo faaauau pea i le tele o malumalu i le lalolagi atoa, e aofia ai le toefaafouina o le Malumalu o Sate Leki ma ona lotoa, faatasi ai ma le Fale o Ofisa o le Ekalesia. O lea galuega faatino o le a faaleleia, faafou, ma faamatagofieina le malumalu i ona lafanua faataamilo, suia polokalama ua le toe aoga, ma taulimaina ai popolega o le saogalemu ma le maaleale.
Ua faamalosia le malumalu e tetee atu i se mafuie tele e 7.2; ua faamalosia ma faamautuina le faavae; ua faafouina polokalama eletise ma palama; ua fausia ni eria fou e ulufale ai i totonu; ua suia le sima o le palasa ua faatamaia ma ua toe teuteuina ai laufanua e faaitiitia ai le mamafa o le eleele i luga o fausaga i lalo; ma o le a toe mamanuina lotoa o le malumalu ma le fausiaina o palasa e fatufatu ai se siosiomaga e sili atu ona tatala ma faafeiloai ai. O le faafouga, lea na amata i le 2020, ua faatulagaina ia mae’a i le 2025.
O loo faaauau foi faafouga i malumalu i Hamilton, Niu Sila; Hong Kong, Saina; ma Columbus, Ohaio, ma St. George ma Manti, Iuta, ISA. Mo le tulaga o le fausiaina o isi malumalu, tagai i le sooga o loo i lalo.
Foi i le Itulau Masani
I se tusi i taitai o le Ekalesia na tusia i le aso 15 Mati, 2022, na fofogaina mai ai e le Au Peresitene Sili e faapea o malumalu i le lalolagi atoa o le a faasolosolo malie ona toe foi atu i faatinoga masani. O lenei mea o le a aofia ai le aveesea o ufi fofoga ma tapulaa o tapu, e faavae i tulaga i le lotoifale. O le faatinoina mo malumalu taitasi o le a fuafuaina e peresitene o malumalu ma Au Peresitene o Eria, i feutagaiga ma le Matagaluega o Malumalu.