“Elder Jonathan S. Schmitt,” Liahona, Me 2022.
Elder Jonathan S. Schmitt
Fitugafulu o le Pulega Aoao
Ua saunoa Elder Jonathan S. Schmitt o le “avanoa” o le mea lea na te aumaia i lona valaauga o se Fitugafulu o le Pulega Aoao faatoa lagolagoina.
“Pau lena o le mea ua ia i ma’ua,” o lana tala lea. “O le uiga o le loto momomo ma le agaga salamo ua na o lou tuu atu lea o lou loto i luga o le fatafaitaulaga ma faatagaina le Alii e faia Lona finagalo mai iina.”
Na faaopoopo mai Elder Schmitt, “E mafai e le Alii ona tuuina mai ia i tatou le malosi, taleni, ma meaalofa tatou te manaomia e faataunuu ai Lana galuega. Ae afai tatou te le faaavanoaina i tatou lava ia te Ia, ona tatou filifili lea o i tatou lava ma lē tuuina atu ia te Ia le avanoa e faamanuia ai i tatou i a tatou taumafaiga e auauna atu ia te Ia.”
Sa soifua mai Jonathan Stephen Schmitt i le aso 16 Aperila, 1973, i Mesa, Arisona, ISA, ia Robert Edward ma Dianne Lyda Schmitt. Sa soifua ae o ia i Yuma, Arisona. I le aso 21 o Iulai, 1995, sa ia faaipoipo ai ia Alexis Swain Udall i le Malumalu o Mesa Arisona. O i la’ua o matua o se fanau e toafa.
Sa maua e Elder Schmitt se faailoga o le tagata malaga i le saienisi i mea tau faatoaga ma punaoa i le tamaoaiga i le 1997 ma se faailoga o le fomai o tulafono i le 2000, mai le Iunivesite o Arisona.
Ina ua uma ona auauna atu o se failautusi o le tulafono mo le Faamasinoga Maualuga a Arisona, sa faigaluega o ia o se loia mo le kamupani loia faavaomalo a Akin Gump Strauss Hauer & Feld LLP. Mulimuli ane, sa ia galue o se loia ma se faufautua o taualumaga faafaamasinoga mo Baker Hughes Incorporated. E le gata i lea, sa faigaluega o ia o se sui peresitene lagolago i le Iunivesite o le Setete o Arisona.
Sa auauna atu Elder Schmitt o se Fitugafulu Eria i le Eria o Amerika i Matu Sautesisifo ina ua valaauina o ia o se Fitugafulu o le Pulega Aoao. O ona valaauga talu ai e aofia ai le auauna atu o se peresitene o le Misiona a Kalefonia San Diego mai le 2014 i le 2017, peresitene o le siteki, epikopo, fesoasoani i le au peresitene o le siteki, fautua maualuga, peresitene o le korama a toeaina, failautusi faapitoa a le uarota, fesoasoani i le au peresitene o Alii Talavou a le siteki, taitai vaega o faitaulaga sili, faiaoga sauniuni mo faifeautalai a le siteki, ma se faifeautalai faamisiona i le Misiona a Kalefonia Fresno.