“Elder Ryan K. Olsen,” Liahona, Me 2022.
Elder Ryan K. Olsen
Fitugafulu o le Pulega Aoao
A o tuputupu ae Elder Ryan K. Olsen i Sandy, Iuta, ISA, sa lei tuua lava e ona matua o ia e tuua le fale e aunoa ma lenei faamanatu taua: “Manatua po o ai oe.”
“Sa masani ona ou ita ai a o ou talavou,” o lana tala lea, ma ata. “Ae o na upu na fesoasoani ia te au e manatua ai lo‘u faasinomaga paia. Sa la fesoasoani mai ia te au ia manatua o loo i ai so‘u Tama Faalelagi e alofa ia te a’u ma o le Faaola o la‘u uo mamae. O mea uma e mafai ona tatou faamoemoe e fai pe ausia e na o Ia lava e ala mai ai.”
O lena faamautinoaga o le faasinomaga o le tagata lava ia ma faataitaiga a ona matua, uso a faifeautalai, paaga o le Ekalesia, ma faufautua atamamai o pisinisi, o ni meafaigaluega taua ia o le a faaaogaina e Elder Olsen a o ia amataina lana auaunaga o se Fitugafulu o le Pulega Aoao.
Na soifua mai i le aso 11 Oketopa, 1974, ma soifua ae i le Vanu o Sate Leki i Iuta, o Ryan Kirk Olsen o le atalii o Kirk ma Cathy Olsen.
O le fiafia o Elder Olsen mo Amerika Latina ma le gagana Sipaniolo sa faamausaliina ina ua ia auauna atu o se faifeautalai faamisiona i le Misiona a Atenitina Resistencia. Mulimuli ane, sa la galulue faatasi ai ma lona faletua, o Julie Dorrington Olsen, a o pulefaamalumalu i le Misiona a Iurukuei Montevideo i Sisifo mai le 2016 i le 2019.
Sa faaipoipo o ia ma Sister Olsen i le aso 20 Novema, 1998, i le Malumalu o Sate Leki. O i la’ua o matua o se fanau e toafa.
I le taimi o lona valaauga o se Fitugafulu o le Pulega Aoao, sa auauna atu Elder Olsen o se Fitugafulu Eria. Sa ia auauna atu foi o se peresitene o le siteki, peresitene o le misiona a le siteki, fautua maualuga, epikopo, fesoasoani i se au epikopo, ma se fesoasoani i le au peresitene o Alii Talavou a le uarota.
Sa maua e Elder Olsen se faailoga i fesootaiga mau mai le Iunivesite o Iuta ma sa faigaluega i ni pisinisi eseese. Sa avea o ia ma se peresitene o le eria mo Arthur J. Gallagher & Co., o se kamupani inisiua i le lalolagi atoa, seia oo i lona valaauga o se peresitene o le misiona. I le taimi o lona valaauga i le Au Fitugafulu, sa faigaluega o ia o se sui peresitene sinia o le eria mo lena kamupani.