“Amy A. Wright,” Liahona, Me 2022.
Amy A. Wright
Fesoasoani Muamua i le Au Peresitene Aoao o le Peraimeri
E manatua e Sister Amy A. Wright se po i ni nai tausaga ua mavae, a o faia ona togafitiga mo le laasaga 4 o le kanesa i le to’ala fanau. Sa matua tigaina o ia ma ua galoma atu ni lagona. E ui i lana molimau ma lona faatuatua i le Tama Faalelagi, le Faaola, ma le ata o le faaolataga, sa manaomia e ia le fesoasoani.
A o laitiiti, sa aoaoina Sister Wright e lona tina ma taitai o le Peraimeri e faapea, a lagonaina le fefe, tuuatoatasi, po o le manaomia o le Agaga, e tatau ona ia usuina se pese Peraimeri.
“Ae o lena mea e mo tamaiti,” sa ia mafaufau ai i le taimi nei. “Pe faatatau moni ea lena mea ia te au?”
Ona oo mai lea o le tali—ma le pese.
“O au foi o se afafine o le Atua,” na manatua ai e Sister Wright. “O lea la, i lo‘u mafaufau, sa amata ona ou pese, ’Tama Faalelagi, o e i ai moni iina?’1
“O le mamao lena na ou oo i ai. Sa afifi ‘alava uma o lo’u tagata i le alofa o le Atua. Sa faitino, sa ese lava aua sa le mafai ona ou lagonaina se isi lava mea. Sa ou iloa sa i ai o Ia iina, ma sa Ia silafia lelei le mea sa ou oo i ai, ma o Ia o se Atua alofa.”
O Amy Eileen Anderson sa soifua mai i le aso 6 o Ianuari, 1972, i le Aai o Sate Leki, Iuta, ISA, ia Joy Bailey ma Robert Anderson. Na faaipoipo atu ia James McConkie Wright i le aso 24 Iuni, 1994, i le Malumalu o Sate Leki. E toatolu o la alo tama.
Sa faauu o ia ma se faailoga tikeri i le saienisi i le tuputupu ae o le tagata ma suesuega faaleaiga mai le Iunivesite o Iuta i le 1998. Sa galue o ia i le matagaluega o ala o faasalalauga a tamaiti aoga i le Kolisi o Fesootaiga a le Iunivesite o Marquette a o auai lona toalua i le aoga fa’inifo.
Sa auauna atu Sister Wright o se Fesoasoani Lua i le Au Peresitene Aoao o le Peraimeri mo le tausaga ua tuanai ma i le aufono faufautua aoao a Tamaitai Talavou mo le tolu tausaga i tua atu. O valaauga ua tuanai e aofia ai le peresitene o le Peraimeri a le siteki ma le uarota, fesoasoani i le au peresitene o le Aualofa ma le Peraimeri a le uarota, faiaoga o le Aualofa, faiaoga o Aoaoga Faavae o le Talalelei, ma se taitai o le Sikauti Laiti.