O Tuafafine e Faamalosia ma Auauna Atu

I luga o ala o faasalalauga faaagafesootai ma i latou lava, sa faaauau ai e le Au Peresitene Aoao o le Aualofa la latou galuega e faamalolosia aiga ma tagata taitoatasi ma auauna atu i fanau a le Atua i le lalolagi atoa.

Ia Mati 2022, sa saunoa ai Jean B. Bingham e uiga i le 180 tausaga o le faavaeina o le Aualofa. O le asō, sa ia fai mai ai, e fitu ma le afa miliona tuafafine o loo faamaloloina mafatiaga, laveaiina agaga, ma faataunuuina ia lava faamoemoega e tasi na faavaeina ai le Aualofa i le 1842.

Sa asiasi atu Peresitene Bingham ma Sister Sharon Eubank, Fesoasoani Muamua i le Au Peresitene Aoao o le Aualofa ma le peresitene o le Auaunaga Alofa a le Au Paia o Aso e Gata Ai i atunuu eseese i Sasae Tutotonu. I Kairo, Aikupito, na saunoa ai Peresitene Bingham sa faagaeetia o ia i “le alofa moni sa i ai i le Au Paia mo le tasi ma le isi.” Sa asiasi atu foi Peresitene Bingham ma Sister Eubank i se tolauapiga a tagata sulufai i Kurdistan, lea na fesoasoani ai le Ekalesia e tuuina atu ni fale.

Sa asiasi atu Sister Reyna I. Aburto, Fesoasoani Lua, i Sepania faatasi ma Sister Michelle D. Craig, Fesoasoani Muamua i le Au Peresitene Aoao o Tamaitai Talavou. “O le filemu o le Atua e tumau ma sili atu nai lo mea leaga uma i le lalolagi,” na saunoa ai Sister Aburto i se faigalotu mo tamaiti ma le autalavou.

E ala i faasalalauga faaagafesootai, na tuuina atu ai e le Au Peresitene Aoao o le Aualofa ni savali e uiga i taumafa paleni a o laiti, soifua manuia, ma le soifua maloloina, faamaopoopoina faatasi ma le Auaunaga o le Uelefea ma le Ola Tutoatasi a le Ekalesia ina ia maua ai savali i matua e uiga i faamanuiaga o le fufuluina o lima, vai inu mama, filifiliga o meaai maloloina, faasusuina o fanau, tui puipui, tumama, ma asiasiga i le falemai.

Ua fautuaina foi e le au peresitene ia tuafafine e faasoa mai o latou lagona e uiga i mea o le a faaosofia ai i latou e auai atoatoa atili i le Aualofa ma e uiga i le auala e faaaofia atili ai ma lagolagoina le Aualofa.