Դուք փնտրո՞ւմ եք Քրիստոսին ամեն օր

Օրսոն Ս. Ֆրանկո

Տաճարում ունեցած իմ փորձառությունն օգնեց ինձ հասկանալ, որ ես պետք է ձգտեմ ամեն օր փնտրել Քրիստոսին:

Հեղինակն ապրում է Գվատեմալայում:

Նկար

չափահաս երիտասարդ տղամարդը կարդում է սուրբ գրությունները բաց պատուհանի մոտ

Երբ փոքր էի, ինքս ինձ այսպիսի հարցեր էի տալիս. «Արդյո՞ք Սուրբ Հոգին խոսու՞մ է»: «Երբ երկինք գնամ, կտեսնե՞մ Աստծուն»:

Հիմա, երբ ես մի փոքր մեծացել եմ, կարող եմ հետ նայել և տեսնել, որ Երկնային Հայրը միշտ առաջնորդել է ինձ և ցույց է տվել ապացույցներ, որ Ինքը գոյություն ունի, բայց միշտ չէ, որ ես կարողացել եմ ճանաչել Նրա ազդեցությունն իմ կյանքում: Ես օրհնված էի, քանի որ մեծանում էի Հիսուս Քրիստոսի վերականգնված ավետարանով ապրող ընտանիքում, բայց երկար ժամանակ ապրում էի ուրիշների վկայությամբ: Ինձ համար դժվար էր հավատալ, որ Աստված իսկապես իրական է:

Մի օր, երբ գրեթե 15 տարեկան էի, իմ եպիսկոպոսը հայտարարեց ծխի տաճարային ուղևորության մասին: Ես արդեն սովոր էի տաճար գնալ իմ ընտանիքի հետ, այնպես որ չէի կարծում, որ դա մի մեծ գործ էր: Ամեն դեպքում, ես, իրոք, այդքան էլ չեմ զգացել և հասկացել տաճարում կատարվող ուխտերի և արարողությունների կարևորությունը:

Երբ օրը եկավ, ես մտա տաճար և հագա իմ սպիտակ հագուստը: Երբ անցնում էի հայելու կողքով, տեսա ինձ՝ սպիտակ հագած և ժպիտը դեմքիս: Երբ ես սպասում էի իմ ծխի մնացած անդամներին, կարծես, վախ էի զգում: Ես մտորում էի մկրտության ավազանի և նկարների գեղեցկության մասին, երբ հանկարծ զգացի, որ Հոգին մեղմորեն դիպավ իմ սրտին:

Ես երբեք չեմ մոռանա այն խոսքերը, որոնք միտքս եկան. «Օրսոն, սա Տիրոջ տունն է: Նա սիրում է քեզ: Նա ցանկանում է, որ դու փոխես քո կյանքը և աստիճանաբար ձգտես ավելի լավ մարդ դառնալ»:

Այդ բառերի մեջ ես այնքան շատ սեր զգացի, բայց հանկարծ մեղքի զգացումը պատեց ինձ: Մինչև այս պահը ես լուրջ չէի վերաբերվել տաճարին: Ուստի ես ի սրտե աղոթեցի՝ խնդրելով Երկնային Հորը ներել ինձ:

Եվ ես գիտեի, որ Նա լսել էր իմ աղոթքը, քանի որ մեծ խաղաղություն զգացի իմ սրտում:

Այդ օրը իմ հավատքն ավելի խորացավ, և ես ստացա ավետարանի այն իսկական վկայությունը, որը տենչում էի: Այդ օրը, նույն հաստատակամությամբ, ինչպես Հովհաննեսի այն երկու աշակերտները, ես կարողացա ասել. «Մեսիան գտել ենք» (տես Հովհաննես 1.41):

Միավորվելու պարզ եղանակներ

Այս փորձառությունից ի վեր ես ձգտել եմ ավելի լավ ճանաչել Երկնային Հոր ազդեցությունն իմ կյանքում ՝ ամեն օր փնտրելով Հիսուս Քրիստոսին: Թեև աշխարհի ազդեցությունը կարող է երբեմն դժվարացնել լսելու Փրկիչի ձայնը, ես այժմ գիտեմ, որ Նա իսկապես իրական է և Նա ինձ հետ է:

Մեզանից շատերն ունենում են օրեր, երբ սովորականից մի փոքր ավելի մոտ են զգում երկնքին: Մենք ունենք նաև դժվարին օրեր, երբ պայքարում ենք Նրա ազդեցությունը զգալու համար՝ անկախ մեր ջանքերից, կամ զբաղված օրեր, երբ բավարար ժամանակ չենք գտնում Նրան փնտրելու համար: Բայց ես գիտեմ, որ եթե մենք Նրան փնտրելու անկեղծ ցանկություն ունենանք, անշուշտ կտեսնենք Նրա ձեռքը մեր կյանքում:

Երբ զգում եք, որ կտրված եք Փրկիչից, հարցրեք ինքներդ ձեզ՝ Արդյո՞ք ես ամեն օր ձգտում եմ գտնել Մեսիային:

Երբ մենք ձգտում ենք նմանվել հին առաքյալներին, մի պահ թողնելով մեր ցանցերը (տես Մատթեոս 4.20), այլ պարտականություններն ու հետաքրքրությունները Նրան դիմելու համար՝ մենք կգտնենք Նրան:

Կան հոգևոր զորության աղբյուրներ, որոնք կարող են օգնել մեզ: Ալմա մարգարեն հիշեցրել է մեզ, որ «փոքր և հասարակ բաներով են իրականացվում մեծ բաները» (Ալմա 37.6): Հոգևոր սովորույթները և հավատքի փոքր գործողությունները, որոնք մենք կատարում ենք ամեն օր, կարող են օգնել մեզ մեծացնել մեր կյանքում Տիրոջը ճանաչելու կարողությունը:

Այդ հոգևոր գործիքներից մի քանիսն են.

Աղոթել հավատքով
Սուրբ գրությունների նպատակային և իմաստալի ուսումնասիրությունը
Անշահախնդիր ծառայել ուրիշներին
Ընկերոջ հետ կիսվել ձեր վկայությամբ
Լսել օրհներգեր կամ հոգևոր երաժշտություն
Մասնակցել Ինստիտուտին
Սուրբ պահել Հանգստության օրը
Ծոմապահություն
Կանոնավոր հաճախել տաճար

Շատ բաներ կարող են օգնել մեզ գտնել Հիսուս Քրիստոսին, բայց բանալին շարունակ Նրան փնտրելն է: Նախագահ Ռասսել Մ․ Նելսոնն ուսուցանել է․ «Երբ ձգտում ենք դառնալ Հիսուս Քրիստոսի աշակերտները, Նրան լսելու մեր ջանքերը պետք է լինեն ավելի գիտակցված։ Պահանջվում է աչալուրջ և հետևողական աշխատանք, որպեսզի մեր առօրյա կյանքը լցվի Նրա խոսքով, Նրա ուսմունքներով և Նրա ճշմարտություններով»։ ¹

Դուք այսօր գտե՞լ եք նրան

Նույնիսկ, եթե դուք չեք ստանում այն բոլոր պատասխանները, որոնք փնտրում եք հենց հիմա, շարունակե՛ք: Պարզապես փնտրեք Քրիստոսին և որոշեք հավատք ունենալ Նրա հանդեպ: Եթե դուք փորձեք ամեն օր գտնել Նրան փոքր գործերի միջոցով, ես գիտեմ, որ դուք կզգաք, որ Նա գրկում է ձեզ երկնքից: Ես գիտեմ, որ սա ճիշտ է, քանի որ ես դա զգացել եմ:

Երկնային Հայրը տեսնում է մեր ջանքերը: Նա այնքան էլ մտահոգված չէ մեր ջանքերի մեծությամբ, որոնք գործադրում ենք մեր հոգին շենացնելու համար, եթե մենք կարողանանք ամեն օր հաստատակամությամբ և վստահությամբ ասել. «Այսօր ես գտա Մեսիայի՛ն»:

Ես աղոթում եմ, որ մենք կարողանանք ամեն օր ճանաչել և սիրել մեր Փրկիչին: Որ մենք կարողանանք վարվել այնպես, ինչպես Մորոնին առաջարկեց՝ «փնտր[իր] այս Հիսուսին» (Եթեր 12.41): Թող որ ես և դուք ամեն օրվա վերջում գտնենք մեկին, ում մասին Մովսեսը և մյուս մարգարեները գրել են՝ Հիսուս Նազովրեցի: Քրիստոսին փնտրելիս մենք կտեսնենք Աստծո ձեռքը մեր կյանքում: Եվ որքան շատ փնտրենք Քրիստոսին ամեն օր, այնքան ավելի շատ կգտնենք Նրան և կկարողանանք ճանաչել Նրա ձայնը, որն ուղղորդում և առաջնորդում է մեզ մեր ողջ կյանքում: