Mga Alituntunin ng Ministering

Ministering sa Pamamagitan ng Programang Mga Bata at Kabataan

Ang diwa ng ministering ay pag-anyaya sa iba na lumago at pagtulong sa kanila sa gitna ng paglalakbay.

young man playing keyboard

Larawang kuha ni Tom Garner

Maraming pagkakataong mag-minister sa pamamagitan ng programang Mga Bata at Kabataan. Maaaring may mga bata o kabataan sa sarili mong tahanan. Maaaring isa kang lider sa programa o nagmi-minister ka sa mga pamilyang may mga bata at kabataan. O maaaring may kakilala kang ilang bata at kabataan (makikitang kabilang na tayong lahat sa paglalarawan na iyan). Anuman ang iyong sitwasyon, maraming paraan para magamit ang programa o ang mga alituntunin nito para mapagpala ang mga buhay ng iba.

Sama-samang Pagpapaunlad sa Ating mga Sarili

Ang sentro ng Mga Bata at Kabataan ay nakatuon sa pagsisikap bawat araw na maging higit na katulad ng Tagapagligtas, na naglingkod nang perpekto. Natutuhan ng marami sa mga nakibahagi na sa programa na habang lalo kang umuunlad sa iba’t ibang aspeto ng iyong buhay, nagkakaroon ka ng higit na kakayahang tumulong o mag-minister sa iba.

Ngunit sa programang Mga Bata at Kabataan, hindi kailangang maghintay na may matutuhan ka bago mo mapagpala ang iba. Ang pag-aaral mismo ay nagbibigay ng mga pagkakataong mag-minister.

Para sa isang binatilyong nagngangalang Prophet na naninirahan sa Ghana, simula pa lang ang pagtatakda ng mithiin sa Mga Bata at Kabataan na matutong tumugtog ng piano. “Mithiin ko na matulungan din ang ibang tao na malaman ang natututuhan ko,” sabi ni Prophet.

Bagama’t siya ay hindi pa isang guro, lumago na ang kanyang mithiin nang higit pa sa inakala niya. Ngayon ay may 50 estudyante nang nag-aaral tumugtog ng piano sa meetinghouse kasabay ni Prophet. At sino naman ang nagtuturo kay Prophet at sa 50 pang estudyanteng iyon? Sina Alexander M. at Kelvin M., kapwa edad 13. “Nais naming magpakita ng kabutihan sa ibang tao,” sabi ni Kelvin.

Tatlong araw sa isang linggo, nagtuturo ng mga libreng basic piano lesson ang dalawang binatilyong ito sa lahat ng pumupunta para matuto. May dagdag pang pakinabang ang mga piano lesson. Ang ilan sa mga estudyanteng nakakilala sa Simbahan sa pamamagitan ng mga piano lesson ay nag-aral ng ebanghelyo at nagpasiyang magpabinyag kalaunan.

Kapag nagsisikap tayong paunlarin ang ating mga sarili, maaari tayong mag-minister sa iba sa pamamagitan ng pag-anyaya sa kanila na sumama sa atin.

woman preparing food

Larawang kuha ni Jonas Rebicki

Isang Panalong Resipe para sa Ministering

Bilang isang stake Primary president, nakita na ni Sabrina Simões Deus Augusto ng Curitiba, Brazil kung paano pinagpapala ng mga aspeto ng personal na pag-unlad ng programa ang mga bata at kabataan sa kanyang stake. Ngunit nakakita rin siya ng maraming paraan para magamit ang natutuhan niya tungkol sa personal na pag-unlad sa kanyang tungkulin bilang isang ministering sister.

“Kapag nagkaroon ako ng isang talento,” sabi ni Sister Augusto, “magagamit ko ang talentong iyon para mapagpala ang isang taong mini-minister ko.”

Tinuruan ni Sister Augusto ang isa sa mga sister na itinalaga sa kanya kung paano gumawa ng chocolate truffles. Ang sister na iyon ay gumagawa at nagbebenta na ngayon ng truffles para madagdagan ang kita ng kanyang pamilya. “Pagkaraan ng ilang buwan, napagpala ako nang turuan ako ng isa pang sister kung paano gumawa ng honey bread na maaari kong ibenta,” sabi ni Sister Augusto. “Ang pagkakaroon at pagbabahagi ng mga talento ay maaaring magpala sa buhay ng bawat isa at magpalalim sa ating mga relasyon bilang mga ministering sister.”

Paano Ka Matutulungan ng Programang Mga Bata at Kabataan na Mag-minister?

1. Anyayahan ang iba na makibahagi sa programang Mga Bata at Kabataan.

   Maaari mong anyayahan ang mga pamilya ng mga kabataan at bata na mini-minister mo na makibahagi sa programang Mga Bata at Kabataan. Maaaring interesado sila sa pakikibahagi sa mga aktibidad, personal na pag-unlad, o maging sa mga aspeto ng programa tungkol sa pag-aaral ng ebanghelyo. (Para sa iba pang impormasyon tungkol sa ministering sa pamamagitan ng Pumarito Ka, Sumunod Ka sa Akin, tingnan ang “Ministering sa Pamamagitan ng Pumarito Ka, Sumunod Ka sa Akin,” sa Liahona ng Setyembre 2020.)

2. Suportahan ang kanilang mga mithiin.

   Bilang isang ministering brother o sister sa mga pamilya na may kabataan, nasa natural na posisyon kang suportahan ang mga mithiing pinagsisikapan nilang matamo sa Mga Bata at Kabataan. Kahit personal ang kanilang mga mithiin, kung alam mo kung saan sila interesado, maaari kang mag-alok na tumulong sa iba’t ibang paraan. Maaaring ito ay paghahanap ng mga art supply na hinahanap nila, paglilingkod bilang isang hurado sa kanilang paggawa ng cookies, o pagiging isang guro sa isang paksang may kaalaman ka. Marunong ka bang magpalit ng langis sa kotse? Magsulsi ng punit sa damit? Bihasa ka ba sa pag-iinterbyu para sa mga trabaho? Maaari kang mag-alok na magbahagi ng kaalaman o mga kasanayan na mayroon ka kung interesado sila.

3. Anyayahan ang iba na maging bahagi ng iyong personal na pag-unlad.

   Ang personal na pag-unlad ay hindi lang para sa mga bata at kabataan. Maaari kang makibahagi sa programa anuman ang edad mo. Kapag nag-uukol ka ng panahon sa pagpapabuti sa espirituwal, pakikipagkapwa, pisikal, at intelektuwal na aspeto ng iyong buhay, magiging mas handa kang mag-minister sa mga indibiduwal, sinuman ang makilala mo. At tulad ni Prophet sa Ghana, mapagpapala mo ang iba sa pamamagitan ng pag-anyaya sa kanila na makibahagi kasama mo, sa pag-oorganisa man ng mga piano lesson, pagpunta sa isang klase sa pag-eehersisyo, o pag-aaral ng isang wika nang magkasama.

4. Gawing mithiin ang ministering.

   Isaalang-alang ang paggugugol ng oras bawat araw para sa ministering. Maaaring ito ay pagte-text o pagbisita para makita ang kalagayan ng mga bagay-bagay o magplano ng isang salu-salo. Maaaring kabilang dito ang pag-uukol ng oras para mailagay sa kalendaryo ang mga kaarawan ng mga taong mini-minister mo o pag-follow sa kanila sa social media para malaman kung saan sila interesado o kung ano ang ginagawa nila nitong mga nakaraang araw. Ang pag-uukol ng kahit limang minuto lang para pag-isipan kung ano ang kailangan ng isang tao ay maaaring humantong sa mga inspiradong ideya na makagagawa ng kaibhan.

Isa-isa

“Ang katangian ng totoo at buhay na Simbahan ng Panginoon ay ang organisado at nakadirektang pagsisikap na maglingkod sa mga indibidwal na anak ng Diyos at sa kanilang mga pamilya. Dahil ito ang Kanyang Simbahan, bilang Kanyang mga lingkod, maglilingkod tayo sa nangangailangan, tulad ng ginawa Niya.”

Pangulong Russell M. Nelson, “Paglilingkod nang may Kapangyarihan at Awtoridad ng Diyos,” Liahona, Mayo 2018, 69.

Ibahagi ang Iyong mga Karanasan

Ipadala sa amin ang iyong mga karanasan sa pagmi-minister sa iba o pagmi-minister ng iba sa iyo. Pumunta sa liahona.ChurchofJesusChrist.org at pindutin ang “Submit an Article or Feedback.”