Ko Tangiriia, E Kamaiuiia
E maeka te tia korokaraki i Utah, USA.
Ti na tataro bwa nanoia natira a na bitaki. Ngkanne e a roko te atatai ae kamwengabuaka (ae teretere raoi).
Ngai ma kainnabau ti kaikawaiia natira inanon te euangkerio. Ti karaoa ara kamatebwai ni koroboki aika tabu ni katoa ingabong, tataro n utu, ao bootakin te utu n te tairiki ni katoa wiiki. Ti nanako n taromauri, ti amwarake n te tairiki n ikotaki, ao ti nako ni motirawa n te utu. Natira aki toki n nakon te tembora ni karaoa te bwabetito ibukiia maate, a reke aia beeba man te tieminari, ao uoman ibuakoia a nako ni mitinare.
Ao ngke a ikawai, a moanna ni kunei kawai ao iango ake a kaokoro ma bwaai ake ti a tia n reireiniia. Temanna imwin temanna, natira a toki man irirakin te Taromauri ni karokoa tii temanna mai ibuakoia natira ake niman ae teimatoa n roroko. Ti korakai n tang ibukiia natira ao n titiraki ngkana ti a tia ni kabwaka ke ngkana iai te bwai teuana are ti a tia ni karaoia ae e kaokoro.
N te tai ae maan, ti bubutia te Uea bwa e na bitii nanoia, ao n tokina te Uea e kaekai ara tataro. Ma tiaki n te kawai are ti kantaningaia.
Irarikin are ti bitakiin nanoia natira n te aro ae bebete, E kaotia nakoira bwa ti riai moa ni bitii nanora. E ngae ngke kaaro iai katabeaia ae kakawaki n reireiniia natia, E kauringiira bwa Iesu Kristo bon aia Tia Kamaiu ao aia Tia Moti.
Inanon au nanomwaaka ni kamaiuia natiu, I kabanea te aoa ae mwaiti n tataro, wareki koroboki aika tabu, ao I nakon te tembora, iangoana are ngkana I karaoi bwaai aika eti ni kabane, N na tau ibukin ana mwakuri ni ibuobuoki te Atua—kanga n aron au mwakuri e na kaira te Atua n riaon aia rinerine ao ni kairoroia bwa a na kakoaua n ai arou.
Kainabau ao ngai ti rang n tangiria ni kamaiuiia, ma boton ara ingo ni kamaiu e taraaki n aron te anga reirei, kairoroakiia, ke kaotan te aki kukurei nakon aia rinerine, are n tokina e uotaki nakon te kauntaeka. Ti ataia bwa inanon korakain nanora ni uotia natira n oki, ti a bon kakoaua bwa ti a kararoaia nako riki. Mwaitin aia namakin n ara motikitaeka ao marakinnanora, e a mwaitin riki aia totoko nakoira.
Au tataro e bitaki nakon te bubuti ibukin bitakin nanou. I ataia bwa oin bukin tangiraia natiu ni bitaki e roko man te tabo ae bure. I tataro ibukin riki te tangira. I tataro naba bwa n na tokanikai iaon au namakin man te maama ngkai au utu tiaki aroia utu aika kororaoi are a kaotia raoraou iaon bwaai n reitaki n te intanete n tamneia natiia man aia mare n te tembora ke bwabetitoaia tibuia.
Ngke I rairaki nakon te Tia Kamaiu ibukin kamaiuakiia, nanou e moanna ni marau nakoia natiu. I ataia bwa ngkana ko na tangiriia n aron ae E tangiriia bon karaoan tabeua bitaki. Irouna, te tangira tiaki te kawai—bon te kaunganano ibukin karaoan bwaai ni kabane are E karaoi. E taku bwa akea te bwai “ae kakaraoia ma ti bwaai aika a na kawaaka te aonaaba; bwa e tangira te aonaaba” (2 Nibwaai 26:24).
Onimakinan ana konabwai te Tia Kamaiu ni karaoa Ana mwakuri (taraa 2 Nibwaai 27:20) e anganai te konabwa N na kabanea au iango iaon tangiraia natiu ao ni katuka te kamaiu nakon te Uea. E aki nanonaki ni katokan te ibuobuoki nakoia, ma ngkana tangiraia e riki bwa bukin raoi reitakiu ma ngaiia, e bita aron reitakiu nakoia.
I moanna n nooriia n te kawai ae kaokoro. I moanna ni katurua au taratara iaon korakoraia ao aia tarena ao ni moanna n noori aroia n tatangira, tituaraoi, wanawana, ao bon aomata aika tamaroa ngaiia.
Kainabau ao Ngai ti kakauongo riki ao ni kauarekea ara taetae. Ti titirakiniia taekan maiuiia ao bwaai aika a tatangiria. N oneamwiin te momotikitaeka, ti kaota te kan atatai. Ti onea mwiin ukoukoran te kaairua ao te bwarannano ma kaotakin te tangira, ao natira a konaa n namakina anne bwa e koaua.
Mweengara e riki bwa te tabo are a kona iai n namakina te tangira ao te butimwaeaki. A toki man karabaan aroia mairoura ao a moana aroia ni kokoaua ao ni kona n taekin aroia bwa tera ae riki inanon maiuia. Ti a rikirake ni kaan.
Ara utu e bon waaki n rikiriake, ma natira a rang kukurei n roko ni mweengara ao n tiku ni kabanea aia tai irarikira ngkai. A namakina te mano irarikira, ao rinanon ara tangira au kantaninga a namakina ana tangira te Atua ibukiia. I aki ataia ngkana inanon maiuia a na okiri bwaai ake a reireiaki ngke a uarereke, ma I ataia bwa a tiku inanon bain te Tia Kamaiu.