Man Tii Bwaai Aika a Maiu Man te Iti: Kairake n Ikawai
5 Bwaai aika a Koaua n te Aonaaba ae Ko Aki Koaua raoi Iai
Koaua aika nimaua aikai a kona ni buokiko n rinanon bwaai nako.
Te maiu e kuri kaangaanga bwa e na nakoraoi nakon are e baireaki. E onrake n te minotaki, rairaki, ao kakubanako nakoia aomata nako. Ngaia are ti na kanga ni katauraoi ibukin taai aika a na roko ngkana ti aki ataia bwa tera uotana?
Ti tekeraoi, bwa iai nimaua bwaai aika ti kona ni katan iaoia. Koaua aikai a aki kona ni bitaki. A kona ni kairiira n ara babaire ao ni kaungaira bwa tina waaki nako, riki ngkana te kawai are imwaira e taraa n roo ao n aki ataaki kanoana.
Tamara are i Karawa e tangiriko.
N aki taraia bwa tera are e riki nakoim n te maiu aei, ko bon tangiraki. Ko rang kakaawaki iroun Tamara are i Karawa (taraa Reirei ao Berita aika Tabu 18:10). Ko rang kakaawaki n te aonaaba!1
Ko kona n aki namakinna ae ko boongana. Ko kona n namakina te uruaki nano ao te maroa ao te maaku. Ko kona n namakina te aki kororaoi. Ma Titita Joy D. Jones, te Beretitenti ni Kabuta n te Moanrinan, e kabwarabwara, arora ni kakawaki ao te kororaoi bon tiaki bwaai aika titebo.2 Riki ngkana ti bure, e bon korakora kakawakira. Anne teuana bukina ngkai te Tia Kamaiu e karaoa te Mwakuri ni Kamaiu (taraa Reirei ao Berita aika Tabu 18:11–13). Ibukina bwa E kinako ao e tangiriko, E a tia ni katauraoa te kawai ibukim bwa kona manga kaitiakaki riki.
Tamara are i Karawa iai ana babaire ibukim.
Ko mena ikai iaon te aba ibukin te kantaninga are kona riki n ai aron Tamara are i Karawa ao Iesu Kristo ao ni manga oki ni maeka ma Ngaiia. Anne ana kouru te Atua, ao E na buokiko ni kakoroa nanona!
Anne e aki nanonaki bwa bwaai a na beebete n tainako, ti na bon kaitara naba ma kakaewenako. Ma ti kona ni kakoaua bwa “bwaai ni kabane a na kaai ni mwakuri ibukin ae raoiroi nakoia ake a nakonako i nanon te raoiroi” (Reirei ao Berita aika Tabu 100:15).
Ana babaire ibukin maium e kona n taraa n okoro ma are ko baireia, ma ko kona n onimakina Ana baire ibukin kabwaiam ao e na kairiko nakon te kimwareirei are akea tokina. Wareka te bokinikairi nakon te maiu: koroboki aika a tabu, am kakabwaia n tamanuea, ao aia taeka burabeti aika ngkai. A na buokiko bwa kona mataata riki n ataa Ana baire ibukim.
Ngkanne ira Ana kairiiri. Ngkana ti ongotaeka nakon Ana tua nako, ti na karekea te rau ao te kabwaia (taraa Motiaea 2:22). “Kona tai bwara n nano,” n aron are e taekinna Beretitenti Thomas S. Monson. “Taai aika a na roko e bon rang oota n ai aron am onimaki.”3
Te kabanea ni kakaawaki n am kouru bon te maiu ae akea tokina.
Ngkai kawaira inanon te maiu e kona n aki koaua raoi, tokin kawaira e mataata. Ngkai ti karaoi babaire, ti kona n titiraki, “Tera mwiin aei?”4 Ngkana e na kationakoko man te kawai nakon te maiu are akea tokina, bon tiaki te rinerine ae eti.
N tabetai ti kona n reketaaki ni babaire aika uarereke, n aron karaoan bwaai n reirei ke tera ara katawanou. E bua ara taratara n taraan oin te kantaninga ibukin te maiu—n riki n ai aroia ara karo ake i karawa. Ni koauana, ngkana ti waaki ni kaineta te kouru anne, bwaai ni kabane a na bon nakoraoi. Ngaia are kawakina te taratara ae akea tokina.
E kona n aki nakoraoi maiura nakon are ti baireia. Ni koauana, e bon aki kona. Ma tokin kawaira bon te bwai ae rang kakaawaki riki. Kakoaua raoi bwa ko kaineta te kawai ae eti, ao ma ana ibuobuoki te Uea, bwaai ni kabane a na nakoraoi. E na kairiko.
Iai iroum te inaomata n rinerine.
Ngkai e bon kairii kawaira Tamara are i Karawa, E aki tuangiira bwaai ni kabane ake ti na riai ni karaoi. E a tia n anganiira te inaomata n rinerine, ao E kantaningaira bwa ti na kabongana.
Bwa e taku te Uea, “E aki riai bwa N na tuangko bwaai ni kabane; … aomata a na riai ni ingainga ni kan karaoa te waki ae e raoiroi, ao ni karaoi bwai aika a mwaiti n oin nanoia” (Reirei ao Berita aika Tabu 58:26–27). N aron aei, n ingainga ni kan karaoi nanona ni mwakuri korakora ao ni bane nanona iai.
N tabetai, karekean te inaomata e na kona n aki namakinaki iai te mweengaraoi. N tabetai ti kona n tii tangiria n tuangaki bwaai aika tina karaoi. Ma ni koauana, te inaomata n rinerine bon te kakabwaia ae rang tamaroa. Bon te bwaintangira mairoun te Atua ao anne teuana te bwai are e karikiira n riki n ai Arona. E anganiira te mwaaka.
Ngaia are tera ae ko tangiria ni kabaeaki inanona?
Tamara are i Karawa e tangirira bwa Ti na rikirake.
Teuana mai buakon waaki aika a raoiroi akanne ae ti rang ingainga nako iai e kona n ae bon oin rikirakera. Iai bwaai aika ti kona n tainako ni katamaroai aika a kaineti ibukira, bwaai aika ti kona n reiakini, ao konabwai aika ti kona ni karikirakei. Iai naba berita aika ti riai ni karaoi ao ni kawakin.5
Unimwaane Dale G. Renlund man te Kooram n Abotoro n te Tengaun ma Uoman e kabwarabwara kakaawakin rikirakera n te aro aei: “Te Atua e aki kukurei bwa Natina a na tii kataneiaki ao n ongotaeka kanga ‘maan aika manana’ ake a na aki tena Ana kau n te ruu are te tiretio. Tiaki, te Atua e tangiriia Natina bwa a na rikirake n te maiu n tamnei ao n ikotaki ma Ngaia inanon te waaki n utu.”6
Katauraoa tokin kawaim ae akea tokina ni karikiko bwa te kabanea n tamaroa. Kina te konabwai are ko tangiria ni karikirakea ao te bwai n tituaraoi n tamnei are ko kainnanoia bwa ko na riki n ai aron te Atua.7 Ngkanne karaoa te baire bwa kona karikirakei bwaai akanne! Kakorakora am “mwatireti n tamnei” rinanon te kataneiai.8
Ngkana e taraa ni kakamaku te maiu n taai aika a na roko, uringnga bwa tiaki te bwai ae aki konaa ni baireaki arona. Ko aki maroaa. Ko korakora. Ao n raonaki iroun Iesu Kristo, akea ae kona n tukiko. E na buokiko ni kabanea arom n aron are ko bungiaki bwa kona riki iai.