Ignatius ao Adelaide Baidoo

Accra, Ghana

Tamnei

Baidoo family reading scriptures together

Ignatius ao Adelaide a tia n nooria bwa e kanga ana buroukuram te Ekaretia n te konabwai ni wareware ao ni koroboki ao katuruturuana iaon kamatebwaian te euangkerio ae boboto-n te mweenga n tia ni kakabwaiaia membwa n aia titeiki ao utu.

Christina Smith, tia rawetamnei

Ignatius:

I riki n irekereke inanon te buroukuraem n te konabwai ni wareware ao koroboki n te euangkerio ngke I kaaina te beretitentii n te titeiki. I kawara te kiraati ao I ataia bwa tiaki tii ibukiia koraki ake aki kona ni wareware ao ni koroboki. Bon ibukira ngaira ni kabane ni katamaroai ara atatai n ana euangkerio Iesu Kristo.

Adelaide:

I kinaia angiina tititati inanon ara uoote are a buokaki mna te kiraati n te konabwai ni wareware ao koroboki. Temanna te titita e aki namakina ae tamaroa i bon ibukina ngkai e aki kona ni wareware, koroboki, ke ni buokiia natina ma aia bwai n reirei n te mweenga. E ira te kiraati ao ngkai e a kona ni wareware ao n ibuobuoki. E a rangi ni kukurei. N taabo ike I noora iai neiei, I aki toki ni kangai, “Te euangkerio aei e bon rang koaua. E bitii ao e kakabwaiai maiuiia aomata.”

Ignatius:

Nakomai, Iriirai ao reiakinan te euangkerio ae boboto-n te mweenga e na buokiia naba utu bwa ana ikotaki ni wareki koroboki aika tabu ao reiakinna imarenaia.

Kiingin Atibu ni maninganingan ara aro bon Ana Boki Moomon. Ikai iaon Aberika, ti bane n ikawarake n ataakin te Baibara. E ngae n anne, angiina, aaki ataa ana Boki Moomon ae iai inanona koaua aika mataata ao kakawaki. Ngkana ti kamanena Nakomai, Iriirai ni kamatebwaia te euangkerio n ana Boki Moomon inanon te burokuraem ni wareware ao ara kametebwai n te euangkerio are boboto ni mweengara, ti reiakin ao n oota n rongorongo ni kabane ake ti kainanoi ni buokiira n rikirake n te maiu aei.

Adelaide:

Ngke e katanoataaki kamatebwaian te euangkerio are e na karaoaki-n te mweenga n te maungatabu ni kabuta, I iangoi taekaia tabeman membwa n ara uoote ao I nanokawaki teutana. A na kanga ni karaoa aio? I iango. I tataro bwa membwa a na iriira te kaotioti aei. I ataia bwa ngkana a iriira te bwai ae taekinna te burabeti, e na bon buokiia inanon mweengaia.

Inanon ara utu, ti kataia ao ni karaoi ni kabane ake ti kona ni karaoi. Ni kabane a bane n irekereke iai. I rang kukurei n aroia natiu ni buokiia n tatabemaniia ngkai ti bootaki ni wareka Ana Boki Moomon. A rang n tangira ana Boki Moomon. Ti a tia ni karekea ara tai ae tamaroa ni wareware ao n tibwauai ara koaua n ikotaki.

Ignatius:

Beretitenti Russell M. Nelson e a tia n taekinna, “Te Karietataki bon ana bwai te Utu.”¹ I tangira buu ma natiu. I tangiria n maeka ma ngaiia ao Tamara are i Karawa n aki toki, ngaia are ti na ibuobuoki i marenara.

Adelaide:

Taari aine n te Bootaki n Aine a rang n ibuobuoki naba imarenaia. Ngkana ti bane ni bootaki, ti iangoia, “Te titita aei e kainnanoai” ke, “I kainnanoa neiei.” Ti bane ni kaai n tekateka ao ni buokira bon iroura ni wareware, ni kaotaira ao n tibwaua te bwai ae ti reiakinna. Ti bon karaoi ara kabanea ni kona n iango, “Ngke te Tia Kamaiu e mena ikai, tera ae E na karaoia?”

Ignatius:

Iai te iango inanon te burokuraam n te konabwai ni wareware ao ni koroboki n te euangkerio are e tuangiia ataei n te reirei bwa a na korea tamnein te bwai are a na karaoia ni katamaroa reiakinan te euangkerio ao koroboki aika tabu. Teuana te tamnei are e koreia temanna bon tamnein te utu ni katobibia te taibora ma aia boki aika tabu imataia ni marooroakina te euangkerio. I bon rootaki n anne. Konabwai ni wareware ao ni koroboki n te euangkerio tiaki tii iaon taekan te wareware ao te koroboki. Tamnei a kona naba ni buokiira n reiakinna. Riki ngkana ti taku bwa ti atai bwaai ni kabane, ti kona n tainako n reiakina ae bati riki n taekan te euangkerio ao ni karikirakea ara koaua iroun te Uea, Iesu Kristo.

E taekinaki ni koroboki aika tabu bwa temanna ae korakora e riai n airi ma temanna are e mamaara bwa e aonga n riki ni korakora naba (taraa Reirei ao Berita aika Tabu 84:106). Ngkana iai tabeman ake a namakinna bwa a mamaara n te euangkerio, ti kona n ibuobuoki nakoia, temanna imwin temanna, ao ni buokiia ni kaungaiia. Te mwakuri n ibuobuoki bon te waaki n nakon te kawai ae abwabwaki ni buokiia bwa a na bongana.