Tera ae Kainanoa Karekean Nanora aika Raraoi

Iroun Marc Deo Dela Cruz

Ngke e roko te maiu ni kainnano nakon au utu, I a bon aki koaua raoi bwa N na kanga ni kona n nako ni mitinare.

E a maan imwain ae I bwabetitoaki nakon Ana Ekaretia Iesu Kristo ibukiia aika Itiaki ni Boong aika Kaitira, I tangiria ni beku ibukin te Uea. N tainako ao I kangai i bon irou bwa N na bon motinnanoia ni kabanea au tai nako Ina n aki taraia bwa tera are e na kaoti. Te beku Ibukina inanon maiu bon miiu ae I miakinna. Ao kainakin Ana Ekaretia Iesu Kristo e anganai riki te tai ae tamaroa riki ni irakin nanon miiu.

Inanon Ritembwa 2017, I bwabetitoaki. Anne te bong ae moan te tamaroa inanon maiu. Te euangkerio e reireinai arou n iango n ae okoro, N na kanga ni kaungaia tabeman, N na kanga n tokanikai iaon maaku, ao N na kanga ni manga kaunga au tarena ao ni kunei aika a boou. N tokin te tai I reiakina naba taekan au tai ni beku n te mition ae bwanin taina. I waekoa n ataia bwa anne te bwai are I tangiria ni karaoia. Ngaia are n te bong teuana ma teuana, I mwakuri ni katauraoi. I wareki koroboki aika a tabu, ira te intitiute, ao ni kakoroi nanon weteakiu. E ngae n anne, bon ti teuana te kaangaanga inanon au utu are e karikai bwa N na aki koaua raoi ibukin taai aika a na roko.

Ti maiu ni kainnano.

Ngke e koro 18 au ririki, e roko te maiu ni kainnano n au utu. E a kaangaanga bwa ti na amwarake, nako n reirei, ke ni kabwaka kantokara n nako n taromauri. Te bwai teuana are e tiku are ti kona n taua bon ara onimaki. Te aro aei e bon kawaeremwea au waaki ni karaoan au mwakuri ni mitinare. I taekini raraomau nakon tinau, ma e kaokioka te bwai ae e aki toki n tutuangai: “Kabanea am reirei, imwiina koa ira nanon miim.” Ibukin ara kaangaanga n te mwane, E a karako aron au rinerine. Ngaia are I a mwakuri korakora ni kabanea au reirei.

N tokin te tai I a angabeeba ao n tokina I a tauraoi n nako ni beku ibukin te Uea. Ma te maiu ni kainnano e teimatoa n rotiira.

I rangi n un.

I iango “I atia ni kabanea au reirei, ao I a tia ni karaoi bwaai ni kabane ake I konaa ni karaoi. Bukin tera e aki nakoraoi?” I aki tangiria n tataninga ibukin te bwai are I iangoia n te tai ae maan, ma n onean mwiina te bwarannano, I onimakinna bwa a na nakoraoi bwaai ni kabane inanon taaia.

I a baireia bwa N na mwakuri korakora riki ni karekea te mwane ibukin au kabanemwane n au mition. I tataro ni katoabong, kawariia mitinare ni mwaitin te tai, ao ni kamatoa au koaua man kamatebwaian bwaai n te ekaretia.

A mwaiti au koraki ake a kaitara au iango ni karaoan au mwakuri ni mitinare. A tuangai bwa karaoan au mition e na bon ti kanakobuakai bwaai nakoiu ao au utu. Ma I tei iaon au iango. I ataia bwa I tangiria ni karaoa au mition ao Tamau are i Karawa e na katauraoa te kawai.

Imwiin te tai ae maan ni mwakuri ao ni kaikoa te mwane, n tokina I karina au beeba ibukin te mition. Ngke e weteai au bitiobi ao n tuangai bwa e a roko weteau, I kibakibarake ma te kimwareirei! I waekoa n nakon aobitin te titeiki ao ni karekea te reta. Te tairiki anne, I kauka au reta man te mition ao ni katanoata nakoia au utu bwa I weteaki bwa N na beku i Biribin n te Phillippines Cabantuan Mition.

I tang ma rannimata ni kukurei n te tairiki anne. N aki tarai bwaai ni kabane ake a riki, ma te onimaki ao te mwakuri korakora ao onimakinan te Uea, I katiai bwaai ni kabane ake I kainnanoi ni karaoi bwa N na nako ni mitinare ao ni kakoroa bukin au iango. I ataia bwa ngke arona bwa I aki rinanon te kaangaanga anne imwain au mition, I kona n aki kabwaninna n tauraoi n rabwata, namakin, tamnei, marurungin te iango, ao n tauraoi n te mwane. Ma ibukin bwaai ake I rinanona, I a kona n rikirake n aaro aika a mwaiti.

I ataia bwa Tamara are i Karawa iai ana baire ibukira ni kabane. Bwaai ni kabane ake ko rinanona a kona n aki irekereke n taai tabetai, ao ko kona n tangirii bwaai bwa a na riki n te tai ae waekoa nakon are rimwi, ma onimakina Ana tai nakon are bon am tai. Ngkana ti onimaki Irouna ao ni kamwakura te onimaki ao ni mwakuri korakora, E na kairiira nakon nanora aika a raraoi n te tai ae riai ao ni buokiira n rikirake iaon kawaira. (taraa Enoti 1:12 ao Aramwa 29:4).