Gauna Guilecavi Dredre ena Koniferedi
Me vaka a yalataka o Peresitedi Russell M. Nelson, e a guiguilecavi dredre na koniferedi raraba oqo ena vuqa na sala.1 Sai koya oqo e vica na gauna guiguilecavi dredre ni koniferedi.
iVakatakilakila Vou
A kacivaka o Peresitedi Nelson e dua na ivakatakilakila vou ni Lotu (raica na tabana e 73). Na ivakatakilakila e oka kina na yaca ni Lotu muloni koto ena dua na sikoya, matataka e dua na vatu ni tutu. E cake e duri tu kina e dua na ivakatakarakara kei Karisito ena ruku ni dua na icurucuru, ka vakavotuya tiko vei keda na iVakabula kei na ibulubulu lala.
Na iVakaro ni Yabaki Ruanadrau
O Peresitedi Nelson a wilika “Na Veivakalesui mai ni Taucoko ni Kosipeli i Jisu Karisito: A iVakaro ni Yabaki Ruanadrau ki Vuravura Raraba,” ka sureti ira na tamata ena veivanua kecega me ra kila ni sai koya na kosipeli i Jisu Karisito ka tukuni ena Veiyalayalati Vou e sa tu tale oqo e vuravura nikua. Na ivakadewa vakadonui e rawa ni kune ena loma ni waqana e liu ni ivola oqo ena 12 na vosa eso. O ira na lewenilotu era se waraka tiko e dua na kena ivakadewa vakadonui ena rawa ni kunea na ivakadewa taumada eso ni ivakaro ena vosa nei Peresitedi Nelson (raica na tabana e 91).
Soqoni Vakalou Tabu
E dua na “soqoni vakalou tabu” a vakayacori ena soqoni ena mataka ni Siga Tabu ka tiki ni marautaki ni yabaki ruanadrau ni iMatai ni Raivotu ni Lotu. Ena gauna ni soqoni tabu oqo, o Peresitedi Nelson a liutaki ira na Yalododonu ena Kailavaki ni Osana, e dua na ivakaraitaki ni veivakacaucautaki ena duavata ka dau vakayagataki ena veisoqoni bibi me vaka na vakatabui ni valetabu (raica na tabana e 92).
iKarua ni Lolo e Vuravura Raraba
Ena ikarua ni gauna ena loma ni ciwa na siga, a sureti vuravura o Peresitedi Nelson me da lolo ka masumasu “me rawa ni tarovi na matedewa totolo ka yaco tiko oqo, taqomaki o ira na dauveiqaravi, vaqaqacotaki na bula vakailavo, ka taumalua tale na bula” (tabana e 74). Na ikarua ni lolo oqo ni vuravura raraba e a vakayacori ena Siganimate, 10 ni Epereli, 2020.
Na Valetabu Vou
A kacivaka o Peresitedi Nelson na ituvatuva mera tara e walu na valetabu vovou ena veiyasai vuravura (raica na tabana e 115). Ena gauna oqo e vakayagataki tiko e 167 na valetabu e vuravura raraba.
iTabagone Vakaitavivosa
Na soqoni ena yakavi ni Vakarauwai a rogoci kina na itavivosa mai vei rau e rua na itabagone, o Laudy Ruth Kaouk kei Enzo Joseph Serge Petelo, ka rau a vosa me baleta na sala e vakalougatataki ira kina na itabagone na matabete (raica na tabana e 56 kei na 58). Sa sivia qo e 20 na yabaki mai na gauna era a vosa kina na itabagone ena koniferedi raraba.
Sere iVakatagi Kaukauwa
Era a katoni taumada na sere ivakatagi me baleta na koniferedi. Era a tinia na koniferedi o ira na Yalododonu e vuravura taucoko ena kena lagati na “Turaga Keitou Vuabale” kei ira na veimatasere eso mai Ghana, Niu Siladi, Mexico Siti, Ceva kei Korea, Jamani, kei Brazil (raica na tabana e 2).