Elder Matthew S. Holland

Vakaitutu Raraba ni Vitusagavulu

O Elder Matthew S. Holland e sega ni vulagi vei ira na Vakaitutu Raraba se na koniferedi raraba.

Era kilai koya e vuqa na Yalododonu Edaidai ni luve i Elder Jeffrey R. Holland ena Kuoramu ni iApositolo Le Tinikarua. Eso tale beka era na nanumi koya vaka dua na yabaki 17 ka a vosa ena soqoni ni matabete ni koniferedi raraba ni Epereli 1983.

“Sa dua na veivakalougatataki totoka, e gauna kece ni noqu bula, me’u sarava na ivakarau erau a bula kina o na kei ta, na veika erau a soli rau kina kei na veika erau a kerei me vakayacora,” e kaya o Elder Holland, ka vakatulewa tiko ena gauna oqo ena Tabana ni Kaulotu e North Carolina Raleigh.

“Ia, ena vuku ni veika au raica vaka-i-au oqo, eda sa kila vakasivia tale me baleta na veikacivi oqo meda nanuma kina ni da sa vakaiyaragitaki vakavinaka sara,” a tomana o koya. “E mai vinaka, ni da sa vulica talega ni Turaga e vakaiyaragitaki ira e sa kacivi ira o Koya, ka ena vuku ni ka oqo sa kuri kina na noda vakabauta kei na noda vakacegu.”

E nanuma lesu o Elder Holland ni vosa ena koniferedi raraba e veivakayalolailaitaki. Na vakarautaki ni dua na itukutuku ka qai yaco mai ena “vosa ena vosa, na vunau ena vunau” (2 Nifai 28:30) a yaco me “dua na veivakalougatataki taumada, ka veivakadeitaki mo kila kina ni o ciqoma na ilesilesi mai vua na Turaga, ena vukei iko ka solia vei iko na vakasama kei na veivakauqeti ni veika e gadrevi me wasei.”

A sucu o Matthew Scott Holland e nai ka 7 ni Jiune, 1966, e Provo, Utah, Amerika, na luvei Jeffrey R. kei Patricia Holland. A vakamautaki Paige Bateman o koya e nai ka 20 ni Me, 1996, ena Valetabu e St. George Utah. Erau nodra itubutubu e lewe va na gone.

Na sasaga vakavuli nei Elder Holland e oka kina e tolu na koroi ni vulici ni veika vaka politiki—e dua na bejila ni arts mai Brigham Young Univesiti ena 1991 kei na masita ni arts ena 1997 kei na doketa ni vuku ena 2001, ka rawati veitaravi mai na Duke Univesiti.

Ni a cakacaka tiko vaka dua na parofesa ni political science e BYU (2001–2009), a kacivi me Peresitedi ni Univesiti ni Utah Valley ena 2009, ka veiqaravi voli me yacova na nona kacivi ena 2018 vaka dua na peresitedi ni tabana ni kaulotu.

Sa veiqaravi oti o koya vaka dua na bisopi, leweni matabose e cake, daunivakasala ena dua matabisopi, daunivakasala ni Cauravou ni tabanalevu, iliuliu ni kaulotu ena tabanalevu, qasenivuli ni Matawilivola ni Sigatabu, ka daukaulotu tudei ena Tabana ni Kaulotu e Scotland Edinburgh.