2020
Veika Vakasakiti mai nai ka 190 ni Koniferedi Raraba Vakayabaki
Me 2020

Veika Vakasakiti mai nai ka 190 ni Koniferedi Raraba Vakayabaki

A solia e dua na itukutuku matata o Peresitedi Russell M. Nelson ena koniferedi raraba: “Rogoci Koya.”

Meda vakasaqara, ena sala kece sara eda rawata, meda rogoci Jisu Karisito, ka vosa vei keda ena kaukauwa mana kei na veiqaravi ni Yalo Tabu,” a vakatavulica o Peresitedi Nelson.

“Na inaki ni koniferedi raraba oqo kei na vei koniferedi raraba kece sara me vukei keda meda rogoci Koya” (tabana e 7).

Ena dua na koniferedi e vakanamata ki na iMatai ni Raivotu kei na Vakalesui mai, eda a vakavulici ni da rawa ni rogoci Koya, me vaka ga a cakava o Josefa Simici ena Veikau Tabu. Ni vakavolivoliti keda tu na revurevu ni dua na matedewa totolo e vuravura raraba ka tarai ira e milioni, eda a vakavulici meda rogoci Koya me baleta na veidusimaki ena noda veileqa eso. Ni da rai yani ki na dua na gauna totoka mai muri me baleta ruarua na Lotu kei keda vakayadudua, eda a vakavulici meda vakavouya na noda sasaga meda rogoci Koya, ka muri Koya.

“Na vuqa ni tiki veivakauqeti ni koniferedi raraba ni Epereli 2020 oqo,” a kaya kina o Peresitedi Nelson, “… e rawa ni vakalekalekataki ena rua na vosa ivakaro vakalou: ‘Rogoci Koya.’ Sa neitou masu ni nomu vakanamata vua na Tamada Vakalomalagi, ka a kaya na vosa oqori, kei na Luvena Lomani, o Jisu Karisito, ena votu vakalevu kina ena nomuni vakanananu na veika kece sa yaco.”

Ni o vulica na itukutuku eso ni koniferedi oqo ka segata “mo rogoca, vakarorogo, ka muria na nona vosa na iVakabula,” ko na raica kina ni na vakayacori na yalayala ni parofita ena nomu bula ni “lutu sobu na rere ka vakalevutaki na vakabauta” (tabana e 114).

  • A vakamacalataka o Peresitedi Nelson e dua na ivakatakilakila vou me baleta na Lotu ena tabana e 73.

  • O Peresitedi Nelson e vakamacalataka e dua na ivakaro ni Veivakalesui mai ena tabana e 91.

  • E liutaka o Peresitedi Nelson e dua na soqoni vakalou bibi e vuravura raraba ena tabana e 92.

  • E kacivaka o Peresitedi Nelson e walu na valetabu vovou ena tabana e 115.

  • Vulica eso tale na ka me baleta na sala e rawa ni da vukei ira kina na tani #HearHim ena HearHim.ChurchofJesusChrist.org.