Elder Jorge T. Becerra

Vakaitutu Raraba ni Vitusagavulu

O Jorge T. Becerra a dau mamadua ka galugalu ni a se tubu cake tiko, ia a solia vua na nona peresitedi ni kaulotu na madigi eso me veiliutaki. A lesu o Jorge ki vale mai na Tabana ni Kaulotu e California Arcadia kei na gagadre me vakaitavi ena cakacaka ni Turaga ena vo kece ni nona bula.

E vuqa tale na veimadigi eso ni veiliutaki a yaco totolo vua mai na ka a namaka o koya. Ni yabaki 27, a kacivi o koya ki na matabisopi. Ni yabaki 32, a kacivi me bisopi. E liu a vakila o koya ni na sega ni rawata ni ra gole yani vua na tamata kei na nodra bolebole eso.

“Au sa sega ni kila na ka au cakava tiko,” a tukuna vei tamana.

Nona sauma mai o tamana a vakavulica vei koya e dua na lesoni mana, ka vakananuma vei koya na veivakabauti nei nona peresitedi ni kaulotu vei koya, ka vukei koya me vakavakarau ki na veikacivi ni veiliutaki ena veisiga ni mataka, oka kina na nona veikacivi vakaperesitedi ni iteki ni yabaki 37.

“Na tamaqu a kaya, ‘Luvequ, sa yabaki vica na Yalo Tabu?’” A nanuma lesu o Elder Becerra. “Oya a dua na gauna cecere ni veivakavulici vei au baleta ni‘u kila ni’u rawa ni cakava e dua ga na ka e kerea vei au na Turaga.”

Na lesoni oya e sa tu ga vata kei Elder Becerrea ena vuqa na yabaki ni veiqaravi yalodina e Na Lotu i Jisu Karisito ni Yalododonu Edaidai.

A sucu o Jorge Eduardo Torres Becerra e nai ka 18 ni Tiseba, 1962, vei Juan C. Becerra kei Celia T. Becerra e Salt Lake City, Utah, Amerika, na vanua a susugi cake kina o koya.

Ni oti na veiqaravi ni kaulotu tudei, a vakamautaki Debbie Ilene Schneberger o Elder Becerra ena Valetabu e Salt Lake e nai ka 10 ni Okosita, 1984. Erau nodra itubutubu e lewe va na gone.

A ciqoma o Elder Becerra e dua na koroi ni vuli raraba mai na Univesiti ni Utah kei na dua na koroi itokani ni arts ena veika vakafika mai na Salt Lake Community College. A vulica talega o koya na bisinisi ena Univesiti e Phoenix. Ena 1998 a yaco me dua na itokani ni Allegis Advisor Group, e dua na kabani ni veivakasalataki vakailavo. Ena gauna a kacivi kina me Vakaitutu Raraba ni Vitusagavulu, a cakacaka tiko vaka-daunivakasala ni vakatubuilavi ena Intermountain Financial Partners.

Sa veiqaravi oti o Elder Becerra vaka dua na peresitedi ni Cauravou ena tabanalevu, daunivakasala ena dua na mataveiliutaki ni tabana ni kaulotu, daunivakasala ena dua na mataveiliutaki ni tabana, qasenivuli ni semineri, daunivakasala ena matabisopi, bisopi, peresitedi ni iteki, ka peresitedi ni Tabana ni Kaulotu e California Arcadia. Ena gauna ni nona veikacivi, a veiqaravi voli o koya vaka-Vitusagavulu ni iWasewase.