Elder Moisés Villanueva

Vakaitutu Raraba ni Vitusagavulu

A se qai yabaki 10 ga o koya ena gauna o ya, ia o Elder Moisés Villanueva e sega vakadua ni guilecava na veika a vakila ni rau a vakatavulici koya kei na nona matavuvale na daukaulotu me baleta na kosipeli e Oaxaca, Mexico.

“Au nanuma na Yalotabu erau a biuta tu mai, na vakacegu ka’u a vakila e yaloqu,” a kaya o koya.

Na gauna a papitaiso kina o Moisés kei na va vei ira na tacina, o tinana—e dua na itubutubu sega ni vakamau ka susugi Moisés cake kei ira na tacina e vitu ena veigauna dredre—a qai lesu tale mai ki na Lotu.

E muri, ni vakavakarau tiko o Moisés yabaki 18 ki na nona kaulotu, a sotava tikoga na nona matavuvale na bolebole eso ni bula vakayago. A lomalomaruataka o koya na nona lewa me lako ka kaya vei tinana ni vinakata me tikoga i vale me vukei koya.

“Kevaka o vinakata dina mo vukei au,” a kaya o tinana, “lako ka qarava na Turaga.”

Ni tekiduru toka e yasa ni nona loga ni cava na imatai ni nona siga ena Tabana ni Kaulotu na Mexico Hermosillo, a vakila o Moisés ni marautaka na nona lewa na Turaga. E vakacaucautaka o koya na nona ilesilesi me baleta na tubu ni nona ivakadinadina ni kosipeli vakalesui mai.

“Na Lotu oqo e liutaki mai vua na noda iVakabula o Jisu Karisito,” a kaya o Elder Villanueva. “E kilai keda vakayadua o Koya ena yacada. E kila o Koya na noda vei gagadre, noda bolebole kei na noda kauwai eso. E kila tale tu ga na noda kaukauwa kei na gagadre ni yaloda.”

A sucu o Moisés Villanueva López e nai ka 13 ni Tiseba, 1966, e Oaxaca, Oaxaca, Mexico, vei Rubén Villanueva Platas kei Delfina López Domínguez. A vakamautaki Leticia Ávalos Lozano o koya ena Valetabu e Mexico City Mexico e nai ka 30 ni Jiune, 1995. E tolu na luvedrau.

A rawata o Elder Villanueva e dua na koroi ni bejila ni veiliutaki vakabisinisi mai na Southeast Regional Univesiti ena 1997 kei dua na koroi ni masita me baleta na vakatorocaketaki ni bisinisi mai na Tecnológico de Monterrey ena 2011. A cakacaka wale tikoga oqo o koya vaka vunilewa ni Sertexa, e dua na kabani ni sala ni veilakoyaki.

Ena gauna ni nona veikacivi, a veiqaravi voli o Elder Villanueva vaka-Vitusagavulu ni iWasewase e Mexico. A sa veiqaravi talega o koya vaka-peresitedi ni Tabana ni Kaulotu mai California Arcadia ka vaka dua na lewe ni matabose e cake, daunivakasala ena dua na mataveiliutaki ni iteki, bisopi, ka dairekita ni veika raraba.