O Le Afioga ma le Finagalo o le Alii

Ata

o iniseti ua felelei solo faataamilo i faleie i luga o se auvai

Faatasi ai ma le mafatia i Winter Quarters, na maua e Polika se tala faapea o se aufaatupu faalavelave pe a ma se afe tamaloloa na osofaia le tamai nuu o le Au Paia o loo i ai pea i Navu. Pe tusa ma le lua selau le Au Paia na tali atu i ai, ae na faatoilaloina i latou i le taua ina ua mavae ni nai aso. Na ioe mai taitai o le Aai mo se malaga ese atu filemu o le Au Paia, o le toatele o i latou na matitiva ma mamai. Ae, ao tuua e le Au Paia le aai, na osofaia e le aufaatupu faalavelave i latou ma faaleagaina o latou fale ma taavale solofanua. Na faoa e se aufaatupu faalavelave le malumalu, faaleagaina lona vaega i totonu, ma faifai i le Au Paia ao latou sosola ese i tolauapiga i le isi itu o le vaitafe.²⁸

Ina ua faalogo Polika e uiga i le tulaga pagatia o le ausulufai, na ia tuuina atu se tusi i taitai o le Ekalesia, ma faamanatu ia i latou ia feagaiga na latou osia i Navu e fesoasoani i e matitiva ma fesoasoani i Au Paia taitasi na manaomia e malaga atu i sisifo.

“O uso ma tuafafine matitiva, o e ua maliliu tane ma e matua oti, mamai ma le tagolima, o loo ua taooto nei i le auvai i sisifo o le Misisipi,” na ia folafola atu ai. “O le taimi lenei mo le galulue. Ia faamumu i o outou loto, le afi o feagaiga, ia na outou osia i le maota o le Alii, e pei ose afi mumu e le mate.”²⁹

E ui ua uma ona latou auina atu le lua sefulu taavale solofanua o le toomaga i Navu i le lua vaiaso talu ai ma ua itiiti ni meaai ma ni nai sapalai o totoe, na toe auina atu e le Au Paia i Winter Quarters nisi taavale solofanua, vaega o povi, meaai, ma isi sapalai i Navu. O Neueli Uitini, le epikopo pulefaamalumalu o le Ekalesia, na faatauina ni falaoamata mo le Au Paia le tagolima.³⁰

Ina ua maua atu e vaega fesoasoani le ausulufai, o le toatele o le Au Paia iina na mamai i le fiva, leaga lavalava mo le taumalulu, ma ua matuai fiaai lava. I le aso 9 o Oketopa, ao latou saunia e faia le malaga i le Vaitafe o Misuri, na vaaia e le Au Paia se vaega tele o manulele o salu i le lagi ma na lolofi ane i luga ma faataamilo ia latou taavale solofanua. Na feosofi atu tamaloloa ma tama i salu, ma tapue mai i o latou lima. E toatele na manatuaina le ala na auina atu ai e le Atua ia Mose ma le aiga o Isaraelu salu i lo latou taimi o le fiaaai.

“O lenei taeao na matou maua ai se faaalia tuusao lava o le alofa mutimutivale ma le agalelei o le Atua,” na tusia ai e Thomas Bullock, o se failautusi a le Ekalesia, i lana api talaaga. “Na viia e uso ma tuafafine le Atua ma viia Lona suafa ma faapea o mea na to faaua ifo i lalo i le fanauga a Isaraelu i le vao ua faaalia mai ia i tatou i lo tatou taimi o le puapuaga.”

“O alii, tamaitai, ma tamaiti uma lava na maua salu e ai mo la latou aiga o le afiafi,” na tusia ai e Thomas.³¹

O le taimi lea, i le fia afe maila le mamao i le motu amu o Anaa i le Vasa Pasefika, na lauga atu ai se alii na umia le Perisitua Arona e igoa ia Tamanehune i se konafesi o le sili atu ma le valu selau le Au Paia. “Ua tatau ona auina atu se tusi i le Ekalesia i Amerika,” na ia fautua atu ai, “ma talosagaina i latou e auina mai iinei ia vave lava ni toeaina mai le lima i le selau.” O Ariipaea, o se tagata o le Ekalesia ma o se taitai o le nuu o le lotoifale, na faaluaina le manatu, ma na siilima le Au Paia o le Pasefika i Saute e lagolagoina.³²

Na pulefaamalumalu i le konafesi, Addison Pratt lea na malie ma le loto atoa ia Tamanehune., I le silia ma le tolu tausaga talu ai, na papatiso ai e Adiison ma Benjamin Grouard le silia ma le afe tagata. Ae i lena taimi na la mauaina ai na o le tasi le tusi mai se tasi o le Toasefululua, ma e lei tuuina mai ai ni faatonuga mo le toefoi atu i le fale.³³

I le ono masina talu ona taunuu lena tusi, e lei toe faalogo na faifeautalai e toalua i se tasi o le aiga, uo, po o taitai o le Ekalesia. Soo se taimi lava e oo mai ai i le motu se nusipepa, la te sue solo i ona itulau mo ni talafou e uiga i le Au Paia. O le tasi pepa na la faitauina na tuuina mai ai o le afa o le Au Paia i Navu na fasiotia ao le isi vaega na faamalosia e sosola ese i Kalefonia.³⁴

I le popole tele e fia faalogo i le tulaga o Louisa ma ona afafine, na filifili ai Addison e toefoi i le Iunaite Setete. “Ina ia iloa le meamoni, e tusa lava pe leaga,” na ia tau atu ia te ia lava, “e sili atu nai lo le tumau ai i le masalosalo ma le popole.”³⁵

O uo a Addison o Nabota ma Telii, le tane ma le ava na auauna atu faatasi ma ia i Anaa, na filifili e toefoi i Tubuai, lea na alofagia ai Telii o se faiaoga faaleagaga i ona uso a tamaitai i le Ekalesia. Na fuafua Benjamin e tumau pea i atumotu e taitai le misiona.³⁶

Ina ua iloa e le Au Paia o le Pasefika o le a tuua e Addison le motu, na latou augani atu ia te ia ia toe foi vave atu ma aumai nisi faifeautalai faatasi ma ia. Talu ai ua fuafua Addison e toe foi atu i atumotu faatasi ma Louisa ma ona afafine, pe afai o loo ola pea i latou, o lea na ia vave ioe atu ai.³⁷

Ao oo mai le taumalulu i Winter Quarters, na tatalo soo Polika ia iloa pe faapefea ona saunia le Ekalesia mo le malaga i tua atu o Atu Mauga Papa. I le mavae ai toeitiiti lava o se tausaga i luga o le malaga savali, na ia iloa ai o le faatulagaina ma le faaauupegaina o le Au Paia mo le auala oi luma sa taua tele mo lo latou faamanuiaina. Ae peitai o le faatuai i le mavae ai o le isi faatuai na faaalia ai foi ia te ia le taua tele o le faalagolago i le Alii ma mulimuli i Lana taitaiga. E pei o aso o Iosefa, ua na o le Alii lava e mafai ona taitaia Lana Ekalesia.

Na vave lava ina ua mavae le amataga o se tausaga fou, na lagona e Polika ua tatala e le Alii lona mafaufau i se malamalama ma le poto fou. I se fonotaga faatasi ma fautua maualuga ma le Toasefululua i le aso 14 o Ianuari, 1847, na ia amata loa ona faamaumauina se faaaliga mai le Alii i le Au Paia. Ae lei alu Polika e moe, na tuuina atu e le Alii ia te ia nisi faatonuga mo le malaga o loo loma. Na avane i luga le faaaliga e lei uma, ma faaauau ona faamaumau e Polika faatonuga a le Alii mo le Au Paia.³⁹

O le aso na sosoo ai, sa tuuina atu ai e Polika le faaaliga i le Toasefululua. Na taua o le “O Le Afioga ma le Finagalo o le Alii” na faamamafa ai le manaomia ona faatulaga le Au Paia i ni vaega i lalo o le taitaiga a aposetolo. I le faaaliga, na poloaiina ai e le Alii le Au Paia ia saunia mo o latou lava manaoga e faapea foi le galulue faatasi i la latou malaga, tausia e ua maliliu tane, matua oti, ma aiga o tagata o le Au Tau a Mamona.

“Ia tuu atu i tagata taitoatasi e faaaoga lona malosi ma ana meatotino uma e sii atu ai lenei nuu i le nofoaga o le a faatu ai e le Alii se siteki o Siona,” na faatonu mai ai le faaaliga. “Ma afai tou te faia lenei mea ma le loto mamā, i le faamaoni atoa, o le a faamanuiaina outou.”⁴⁰

Na poloaiina foi e le Alii Ona tagata ia salamo ma faamaualalo i latou lava, tausia le tasi ma le isi i le agalelei, ma tuu le onana ma le tautala leaga. Na tuuina atu Ana afioga o se feagaiga, ma faatonuina le Au Paia ia “savavali i sauniga uma,” ma tausia folafolaga na faia i totonu o le malumalu o Navu.⁴¹

“O Aʼu o le Alii lo outou Atua, o leAtua lava o o outou tamā, o le Atua o Aperaamo ma Isaako ma Iakopo,” na Ia folafola atu ai. “O Aʼu o lē na taitaiina le fanauga a Isaraelu i fafo o le laueleele o Aikupito; ma ua faaloaloa atu loʼu lima i aso e gata ai.”

E pei o Isaraelu anamua, na vivii atu le Au Paia i le Alii ma valaau atu i Lona suafa i taimi o puapuaga. Na latou pepese ma sisiva faatasi ma se tatalo o le faafetai i o latou loto. Sa le tatau ona latou fefefe i le lumanai ae faalagolago ia te Ia ma tauave ma le onosai o latou puapuaga.

“E ao ina tofotofoina loʼu nuu i mea uma, ina ia latou saunia e maua le mamalu ua ia te Aʼu mo i latou, o le mamalu lava lea o Siona.”⁴²

Mo le vaega o totoe o le taumalulu, na faaauau e aposetolo ona saili faaaliga ao latou saunia e auina atu vaega o taavale solofanua i luga o Mauga Papa. I lalo o la latou taitaiga, o le a tuua e se vaega toalaiti Winter Quarters i le tautotogo, sopoia atu mauga, ma faatuina se nofoaga fou o le faapotopotoina mo le Au Paia. Ina ia usitaia le poloaiga a le Alii ma faataunuu le valoaga, o le a latou sii ae se tagavai i atunuu ma amata le galuega o se malumalu. O vaega e toatele atu, e tele lava o aiga, o le a mulimuli vave atu ia i latou, ma usitaia le Afioga ma le Finagalo o le Alii i la latou malaga.⁴⁸

Ae lei tuua Navu, na fuafua le Korama a le Toasefululua ma le Aufono o le Toalimagafulu ia nonofo i le Vanu o Sate Leki po o le Vanu o le Vaitafe o le Pea i matu. O na vanu uma i le itu mamao o Mauga Papa, ma faamatalaga i ai na foliga lelei.⁴⁹ Na vaai Polika i se faaaliga vaaia i le nofoaga o le a nonofo ai le Au Paia, ae na ona i ai ia te ia se lagona lautele po o fea e maua ai. Ae ui i lea, na ia tatalo ia taitaia o ia ma le vaega e muamua atu e le Atua i le nofoaga sao o le faapotopotoina mo le Ekalesia.⁵⁰

I le aoauli o le aso 16 o Aperila, 1847, na amata ai e le vaega muamua la latou malaga i lalo o lagi malulu ma pogisa. “Matou te faamoemoe ia tatala le ala mo le faaolataga o e faamaoni i le loto mai atunuu uma, po o le ositaulaga mea uma i la matou tausiga,” na folafola atu ai aposetolo i se tusi faamavae i le Au Paia i Winter Quarters. “I le suafa o le Atua o Isaraelu, matou te faamoemoe ia manumalo po o le feoti o taumafai.”⁵³