Faamanuiaga o le Ola Tutoatasi
O Le Vasega Na Suia Ai O Ma’ua Olaga
O Chris ma Alfreda Rubio sa ola mai lea totogi i lea totogi seia oo ina faaali atu ia i la’ua e se vasega o le ola tutoatasi se ala sili atu.
O Chris Rubio, o se vali fale, ua taunuu mai mo le galuega ma lana ava, o Alfreda.
Ina ua leaga le taavale a Chris ma Alfreda Rubio lata mai nei, sa le i popole i laua pe faapefea ona totogi le toe faaleleia. Ae e le i faapea ona o laua e mauoa.
“Sa iai le tupe sa ma manaomia aua sa ma teuina,” o le tala lea a Chris. “Sa lelei mea uma. Sa ma avatu le taavale e fai i lena lava aso e aunoa ma le tau mafaufau, ‘Oi tafefe.’ Sa manaia le faalogona.”
Sa le’i faapena i taimi uma. Ae le i leva tele atu, na semanu e faia se aitalafu a Rubio, faaaoga se kata fai aitalafu, pe faatalitali seia oo i le isi totogi e ave ai le taavale e fai. Ae o le taimi lena ae la te le i avea le vasega o le alagatupe faaletagata lava ia sa ofoina mai i le polokalama o le ola tutoatasi a le Ekalesia.
“Sa Ma’ua Malelemo Tautupe”
Sa feiloai Chris ma Alfreda ao auauna i laua i le Ea Fosi a Amerika i Siamani ma sa faaipoipo ai i Denmark. Sa faamaeaina lana galuega i le 2008, ma o faafitauli tau soifua maloloina na faamalosia ai Alfreda e litaea ini nai tausaga mulimuli ane. Sa la’ua mauaina le Ekalesia ae le i umi lava talu ona faamautu i Alabama, USA, ae sa le mafai lava ona maua se galuega a Chris. “A le ua ou ova agavaa pe ua ou le agavaa,” o lana tala lea.
Sa maua se galuega a Alfreda i se faleoloa o sapalai tau ofisa, ae na o le pau lena o le la tupe maua. “Sa ma’ua malelemo tautupe,” o le tala lea a Alfreda.
“Sa tele a ma’ua aitalafu ma pili le totogia, ma sa valaau soo mai tagata ao tupe,” o le faaopoopo lea a Chris. “Sa oo i le tulaga ua amata ona ma faatau ese atu a ma meatotino ina ia totogi ai pili. Sa toe faafoi le ma taavale, ma aveesea le ma fale. Sa matuā leaga lava.”
Ina ua aveesea lo la fale, sa me’i loa le au Rubio i se fale mautotogi i se uarota fou. Sa la le iloaina se isi, ma a o mou malie atu a la tupe, sa faapena foi lo la auai i le lotu. Ua manatua e Chris o le tele lava o le tulimatai atu i a la tupe, o le itiiti foi lena o le la tulimatai atu i le faatuatua.
“Sa matuā faigofie lava le faapea atu, ‘E le mafai ona ma o i le lotu nei leaga e manaomia ona sue se galuega pe ona o lea ma te popole i pili pe ona o lea e leai se ma tupe mo le penisini,’” ua fai mai ai o ia.
Ina ua latou talatalanoa ma lo laua epikopo fou e uiga i lo la tulaga tautupe, sa ia ta’u mai ia i laua e uiga i le vasega O Alagatupe Faaletagata Lava Ia mo le Ola Tutoatasi lea sa toetoe lava amata i le latou falesa, o loo i fafo teisi atu lava o Montgomery, Alabama.
“Sa ma ola ae uma i ni aiga e le matua tagolima,” o le tala lea a Chris. “Se le tele lava ni a matou meatotino, o le mea lea ma te le i matuā aoaoina le faasoasoa tatau ma le teuina o tupe. Sa ma ola ai mai i lea totogi i lea totogi. O le tele o taimi, e uma lava le siaki i le uma ai o nai aso e lua ma ma ola ai mo taimi uumi e aunoa ma se tupe. Ona ma faapea loa lea, “Ia, ta o e ave le vasega. Afai o le a fesoasoani ia i taua i soo se auala, ta te mananao e faia.’”
“Na Suia Ai O Ma Manatu”
A o faagasolo le la vasega o alagatupe faaletagata lava ia, sa aoaoina e le au Rubio ma isi aiga e toatolu le auala e faatupu ai ma pipii mau i se paketi. Sa latou aoao e uiga i aitalafu ma le auala e faafoia ai. Sa latou aoao i auala e puipuia ai o latou aiga mai faigata tautupe. Sa latou aoao foi e uiga i le taua o le vaega a le sefuluai i totonu o le ola tutoatasi tautupe.
“Sa suia ai le faagasologa faalemafaufau atoa lava,” o le tala lea a Chris. “Sa ma aoao e mataituina e le gata i ma tupe maua ma tupe faaalu ae faapea foi le ma teugatupe, o se mea e le i i ai i lena taimi. O le mea moni, sa matuā leai lava se mafaufau o le a i ai se ma teugatupe.”
Sa faapitoa lava ona faafiafiaina le au Rubio i le natura fefautuaai o le vasega, lea sa fefaasoaai ai e tagata o le vasega manatu, tulaga faamanuiaina, ma tulaga le faamanuiaina. O le latou usoga sa faamalosia lo laua faatuatua ma a laua taumafaiga ina ia ola tutoatasi faaletupe, ma sa mafai foi ona ofo mai e le taitai o le vasega se galuega ia Chris.
“E faia se eseesega pe a e feiloai atu i isi tagata o loo i le tulaga lava e tasi,” fai mai ai Chris. “E te iloa ai e le na o oe ma o loo tatou taumafai uma lava e faamalieina mea uma ma atinae tomai e avea ai ma tagata ola tutoatasi ina ia mafai ona faaleleia atili ai mea uma mo a tatou fanau.”
“O Se Faigamalaga Ofoofogia”
A o laua faaaogaina mataupu faavae tautupe sa laua aoaoina, sa faaleleia atili lo la tulaga tautupe.
“Ma te le i oo i le tulaga e faapea ai ua ma mauoa pe ua le toe i ai lava ni popolega tautupe, ae ua matua faigofie lava i le taimi lenei le taulimaina o ma valaauga ma o i le lotu e aunoa ma le popole i tupe,” o le tala lea a Chris. “Ua matuā suia lava faaleagaga i maua e le vasega.”
Ua faaopoopo mai Alfreda: “O le vasega sa fesootai tonu lava ma le malosi sili atu ua oo i ai lo ma faatuatua. Sa amata ona ma tatalo atili ma faitau atili foi tusitusiga paia. Sa ma lagonaina o mataupu faavae tautupe ma mataupu faavae faaleagaga o le vasega sa o gatasi lelei.”
E faatusaina e Chris na mataupu faavae i se pea mata tioata ia ua fesoasoani ia te ia ma Alfreda e maua ma tumau ai i se auala i le ola tutoatasi faaleagaga ma le faaletupe.
“E aunoa ma le vasega ma aunoa ma aoaoina o mea uma sa ma aoaoina, semanu ma te le i ai i le tulaga ua ma i ai nei—faaletupe pe faaleagaga,” ua ia fai mai ai. “Ua avea o se faigamalaga ofoofogia. Ua ma aoaoina e te le manaomia le tele o tupe e te mauoa ai. Ua ma mauoa lava faaleagaga.”