O Le Mea Sese i le Seleina o le ’Ava
Saunia e Elder Allen D. Haynie
O le Fitugafulu
“Matou te talitonu i le faamaoni” (Mataupu Faavae o le Faatuatua 1:13).
Ina ua iva o’u tausaga, sa ou manao e faatutupu sa’u ‘ava. Sa ou manatu e faia lea e ala i le sele o o’u foliga i aso uma. Mo ni nai aso sa ou faaaogaina le tafi a lo’u tamā e sele ai. I se tasi aso na vaai mai lo’u tamā o sele o’u foliga. Sa ia lapatai mai ia te a’u e aua le faia aua ou te ono lavea ai.
Ou te faanoanoa e ta’u atu sa ou lē usiusitai i lo’u tamā. Sa toe sele foi i le aso na sosoo ai. A o sele o’u foliga, sa see ese le tafi mai o’u tamailima ōā. Sa matuai loloto se lavea i luga o lo’u laugutu. Sa ou matuā fefe lava a o ou faapipiia lo’u laugutu. Ae sa sili atu lo’u fefe po o le a le tala a lo’u tamā o le a fai mai.
Ina ua sau o ia i le fale i lena po ma vaai i lo’u lavea, sa faate’ia ma popole o ia. Sa fesili mai o ia pe na faapefea ona tupu.
“Ia,” ou fai atu, “Sa ou tamo’e mai i le auala, ma ou pa’ū tau i lalo o’u foliga.”
Sa ou pepelo! Muamua sa ou lē usiusitai, ae o lea ua ou lē faamaoni! Sa lē mafai ona ou moe i lena po. Ua leva le po, ae sa manaomia ona ou ta’u atu ia Papa le mea moni. Sa ou maua atu o ia i le potu malolo.
“Papa, sa ou pepelo atu ia te oe,” sa ou fai atu ai. “Ou te lei pa’ū i lalo. Sa ou lavea a o sele o’u foliga i le tafi. Ou te faamalie atu.”
Sa filemu lo’u tamā mo sina taimi. Ona ia fai mai lemu ai lea, “Sa e lē usitai, Atalii. E lē o se mea lelei lena. Ae ua ou mitamita ua e filifili e ta’u le mea moni.”
O lena lesona—ma le ma’ila—ua tumau ia te a’u i aso uma talu mai lena taimi. Pe i lo’u Tamā Faalelagi pe i au uo ma aiga, ia avea oe ma faataitaiga o le faamaoni ma le upu moni.