Na’o Tusiga Faatekinolosi
E Le o Taimi Uma E te Faʻatali ai mo se Tali
E masani ona tatou tauivi e faia filifiliga e aunoa ma le mauaina o se faamaoniga mai le Atua, ae ao tatou agai i luma i le faatuatua, o le a Ia fesoasoani ia tatou iloa o loo tatou i ai i le ala saʻo.
E alaala le tusitala i Niu Mekisiko, ISA.
O le toe foi i le kolisi ina ua uma laʻu misiona, sa ou mafaufau po o ai e tatau ona ma potu faatasi. Sa fautua mai loʻu tama ou te aapa atu i se uso faifeautalai o le sa faatoa auauna talu ai nei i laʻu uarota ma na faatoa maea lava lana misiona. Na ia faamalamalama mai o Holly sa siitia atu i laʻu aoga ma atonu e le iloa e ia le toatele o tagata iina.
E ui sa ou iloaina Holly mai sina taimi i le matou uarota, ae sa ou le fia valaaulia o ia e nonofo faatasi ma au. Sa ou fefe o le a manatu o ia o se tulaga ese talu ai ma te le iloa lelei le tasi ma le isi—ma ona ou te leʻi iloa pe o le a ma fesootai lelei.
E ui lava i oʻu popolega, ae na ou lagona le fia mulimuli i le musumusuga a loʻu tama o le a avea ma se mea lelei e fai. Sa ou tatalo e fai ni uo fou ao ou toe amata aoga, o lea na ou lagona ai le i ai o le aao o le Tama Faalelagi i le fautuaga a loʻu tama. Na ou filifili e faia. Na taliaina e Holly laʻu valaaulia, ma i le gasologa o le tausaga sa ma nonofo faatasi ai, na avea ai o ia ma se tasi o aʻu uo lelei. Sa ofo mai e Holly ia te au fautuaga ma le alofa i taimi faigata o loʻu olaga, ma ua mafai foi ona ou i ai iina mo ia.
O o tatou olaga e tumu i filifiliga. Atonu e i ai lona faasologa i le taua tele, ae o nisi taimi o filifiliga laiti e sili ona tele le aafiaga i le aluga o le olaga. E ui e le mafai e le Tama Faalelagi ona faaali mai muamua ia i tatou po o fea le filifiliga sili ona lelei i tulaga uma, ua Ia tuuina mai ia i tatou le faitalia e galue ai e tusa ai ma mataupu faavae o le talalelei ma agai i luma ma le faatuatua. Ou te leʻi manatu o le filifilia o se tasi ma te potu faatasi i le kolisi o le a i ai se aafiaga tumau i loʻu olaga, ae na tupu. Ina ua uma ona ou aapa atu ia Holly na ou iloaina ai na faatagaina aʻu e le Alii e fai laʻu lava filifiliga lelei, ma sa faamanuiaina au ona o lena mea. Ona sa ou agai i lalo le ala sa ou lagona e sao, na mafai e le Tama Faalelagi ona faailoa mai se tagata ofoofogia i loʻu olaga.
Ou te le iloa po o le a se mea semanu e tupu pe ana faapea ou te faia isi filifiliga laiti ma se uiga faaKeriso—pe ana ou tuuina laʻu komepiuta i autafa ina ua nofo se teineitiiti i ou tafatafa e ‘ai lana meaai i le lotoa, po o le tatalaina atili o oʻu talitonuga ina ua taʻu mai e se uo ia te au o loo i luga o le pa e uiga i tapuaiga. Atonu na ou le lagonaina se tulei malosi faaleagaga i na taimi, ae sa ou iloa o ni mea lelei e fai, ma ou te mautinoa o le a suia e le Atua e avea ma se faamanuiaga mo i latou uma na aofia ai. Ona sa ou filifili e leai se mea e faia, o le a le mafai lava ona ou iloa le mea atonu e tupu.
E masani ona tatou tauivi e faia filifiliga pe a le tuuina mai ia i tatou se musumusuga tuusao po o se tali. I na taimi, nai lo le faatalitali mo se moli lanumeamata mai le Atua, ua mafai ona tatou faaaogaina la tatou meaalofa o le faitalia e filifili ai le lelei mo i tatou lava. Na aoao mai Mamona, “O mea uma e valaau mai ia fai le lelei, ma faatauanau mai ia talitonu ia Keriso, ua auina mai i le mana ma le meaalofa a Keriso; o le mea lea e mafai ai ona outou iloa ma le malamalama atoatoa ua mai le Atua” (Moronae 7:16).
Ma o le isi taimi e te feagai ai ma se filifiliga, mafaufau ia te oe lava, “E lelei?” aua o mea lelei uma e mai le Atua. E pei lava ona le faatuai le Faaola e fai mea lelei, e mafai ona tatou faatuatuaina i tatou lava e filifili e fai mea lelei i aso taitasi, i auala tetele ma laiti. Ma o le a suia e le Atua na filifiliga lelei i mea maoa’e.