Faataitai le Faatuatua

Saunia e Karee Brown

Mekasini a le Ekalesia

E faavae i se tala moni

“Ou te faaali foi ia te oe lo’u faatuatua i a’u galuega” (Iakopo 2:18).

Sa popo faatopetope e Klarie le polo i lalo le malae. O le mea lenei, o lona manatu lea. O le teineitiiti pito sili ona umi ma saoasaoa i le au sa paga ma Klarie i le taaloga atoa. Ae o lea ua paga ma le isi teineitiiti. O le avanoa lenei a Klarie!

Sa vave ona faliu ese mai le isi teine taalo ma seti ona vae. Ona ia oso loa lea i luga ma togi. Na lele atu le polo i le ea ao taofia e Klarie lana manava. Faamolemole alu i totonu.

Na fafao lelei lava le polo i le ato.

Na tuuina atu e le au a Klarie ia te ia ni faamalo i le po atu o lima [high fives]. Ona tilotilo ifo ai lea o Coach Garcia i le taimi ma ili lana faaili. “Ma o le iuga lena o faataitaiga! Lelei tele, tagata uma! O le a ou vaai ia te outou uma taeao. Ia mautinoa e lava lelei le tou malologa aua o le a tatou faia ni tuuga pupuu se tele.”

Na oi Klarie ma savali atu e aoina ana mea. Ona ia vaai atu lea ia Coach Garcia o talotalo atu ia te ia e alu atu.

“Malo, Klarie,” o lana tala lea. “Lelei tele lou taalo ananei. Ou te iloa e te galue malosi i taimi o faataitaiga, ma ou te mitamita ia te oe.”

“Faafetai,” o le tala lea a Klarie ma se ata tele.

Sa ataata pea o ia a o savali atu i le taavale a lona tina. Ma a o la agai atu i le fale, sa ia toe matamata i lana togi mulimuli i lona mafaufau. Aemaise lava le fafao lelei o le polo i le ato. Sa tau le mafai ona ia matauina le lauga o le konafesi na faalogologo i ai Tina.

Ae e i ai se mea na tosina atu i ai lona mafaufau. Na faapea mai le failauga, “E tatau lava ona tatou faaavanoaina se taimi e matua faaaoga ai lo tatou faatuatua.”* O upu “matua faaaoga” na foliga mai o se mea e faalogo ai i faataitaiga pasiketipolo.. E Faapefea ona e faaaoga lou faatuatua? o lona manatu lea. E te tamoe ma le faatuatua? Pe popo le faatuatua e pei o se polo?

Na faasaga atu Klarie ia Tina. “E faapefea ona e faaaoga lou faatuatua?” na ia fesili atu ai.

Na ataata atu Tina. “E faapefea ona e lelei atili i le pasiketipolo?”

“Ou te faataitai,” o le tala lea a Klarie. “E ta’u mai e lo’u faiaoga ia te a’u le auala ou te lelei atili ai. Ma a fai a matou toleniga, ou te taumafai malosi ia sa’o la’u faatinoga.”

“E faigofie?”

“Leai!” Na fai mai ai Klarie, ao ia manatua le tiga o ona vae ina ua uma a latou tuuga pupuu. “E tatau ona ou faataitai soo.”

Sa luelue le ulu o Tina. “E finagalo le Tama Faalelagi ia tatou faatuatua ia te Ia, ae e tatau ona tatou galulue i ai. Na Ia tuuina mai ia i tatou auala e faataitai ai ma lelei atili.”

“E pei o le a?”

“E fesili mai ia i tatou e talanoa atu ia te Ia i le tatalo. E pei o la tatou faiaoga [coach]. Na te tuuina mai tusitusiga paia ia i tatou. E pei o Sana tusi taalo. Ma Na te musuia perofeta e faamalosia i tatou e aoao o se aiga. O le matou aiga e pei—”

“Pei le matou autaalo!” Na faalavelave atu ai Klarie.

“Sa’o lelei lava! O le au a lo tatou aiga e galulue ma faataitai faatasi,” o le tala lea a Tina. “O le a la le mea e tupu pe a e alu i faataitaiga, a Klarie?”

“Ou te lelei atili,” sa ia fai atu ai. Sa mafaufau o ia i le lelei o ona lagona ina ua ulu lana togi mulimuli aua sa galue malosi i faataitaiga mo le tele o vaiaso.

“E sa’o. Pe a tatou faataitai, o loo tatou faatinoina lo tatou faatuatua. E fesoasoani lena ia tatou molimau ia malosi atili. Ma e faafiafiaina ai i tatou.”

E lei mafaufau lava Klarie i le faatuatua faapena. Sa ia faalogo o le faatuatua e pei o se fatu laau. Ae na te le iloa e mafai ona pei o le taalo pasiketipolo! Sa mafaufau o ia i le auala na faia ai e le faiaoga lana fuafuaga masani mo la latou ‘au. Atonu e mafai ona ou faia se fuafuaga faataitai foi, sa ia mafaufau ai, ae mo le faatuatua! O le taimi lava na ia taunuu ai i le fale, sa ia maua ai se api lapoa ma amata ona tusitusi:

Tatalo—taeao ma le afiafi
Suesueina o tusitusiga paia—aso uma
Lotu—Aso Sa uma

Atonu o le faatinoina o le faatuatua e le pei lava o le taalo pasiketipolo. Ae o le faataitaiga o le faataitaiga. Sa ia lagona le mafanafana ma le fiafia i totonu ao ia tilotilo atu i lana fuafuaga. Sa ia faatuatua i le Tama Faalelagi ma iloa o le a Ia fesoasoani ia te ia!