Mataupu 2
Ua Lava le Mamalu
A o tuua e le Au Paia ma Polika Iaga le Sugar Creek, sa nofo ai pea i Navu ia Luisa Pratt, e fasefulu ma le tolu ona tausaga, ma sauniuni ai e tuua le aai faatasi ma lana fanau teine laiti e toafa. O le tolu o tausaga na muamua atu, na valaauina ai e le Alii lana tane, o Addison, i se misiona i Motu o le Pasefika. Talu mai lena taimi, o le le faatuatuaina o le tautua o meli feaveai i le va o Navu ma Tubuai, o le motu i Farani Polenisia lea sa auauna atu ai Addison, na faigata ai ona fesootai ma ia. O le tele o ana tusi ua ta’i fia masina le umi ae faatoa taunuu mai, ae o nisi na sili atu ma le tausaga le leva.
O le tusi aupito lata mai a Addison na faamanino mai ai, o le a le fetaui le taimi e oo mai ai i le fale ma le taimi latou te o atu ai i sisifo. Sa faatonuina o ia e le Toasefululua e nofo ai pea i Motu o le Pasefika seia oo ina latou valaau mai e foi atu pe auina mai ni faifeautalai e sui ia te ia. I se tasi o taimi, sa faamoemoe ai Polika e auina atu nisi faifeautalai i atumotu ina ua uma ona maua e le Au Paia ia faaeega paia, ae o le savaliga toatele mai Navu na tolopoina ai lena fuafuaga.1
Sa manao Luisa e alu i le malaga e aunoa ma lona toalua, ae o le mafaufau e uiga i ai na popole ai o ia. Sa le fiafia i le tuua o Navu ma le malumalu, ma sa le fiafia foi i le manatu o le malaga i taavale solofanua i luga o Mauga Papa. Sa manao foi o ia e vaai i ona mātua ua pulapula lagoto soifua i Kanata—atonu e mo le taimi mulimuli lava—a’o le’i o atu i sisifō.
Afai na te faatauese atu ana povi toso taavaletoso, e mafai ona lava se tupe e asiasi atu ai i ona matua ma totogi ai pasese mo lona aiga i se vaa e alu atu i le talafatai o Kalefonia, ma faapea ona aloese ai mai le malaga i luga o le laueleele.
Na toeitiiti lava a mautu le manatu o Luisa e o atu i Kanata, ae sa i ai lava se mea na ia lagonaina le le fetaui. Sa tonu ia te ia e tusi atu ia Polika Iaga e uiga i ona atugaluga e faatatau i le malaga i luga o le laueleele ma lona manao e vaai i ona matua.
Sa ia tusi atu, “Afai e te saunoa mai o le malaga i taavaletoso e toso e povi o le auala sili lea ona lelei mo le faaolataga, o le a ou auai i ai ma lo’u loto ma lo’u malosi atoa, ma ou te talitonu e mafai ona ou lavātia e aunoa ma se faaseā e pei o se isi lava tamaitai.”2
I se taimi puupuu ane, na taunuu ane ai se avefeau ma le tali a Polika. “O maia. O le laveaiga i povi toso taavaletoso o le auala aupito saogalemu lea,” sa ia fai atu ai ia te ia. “O le a faafetaui i tatou e Uso Pratt i le vaomatua, i le mea tatou te malolo ai, ma o le a matuai le fiafia lava pe afai e le i ai lona aiga faatasi ma i matou.”
Sa mafaufau Luisa i le fautuaga, saunia lona loto ia faafeagai ma le auala faigata na i luma atu, ma filifili ai e mulimuli i le tino autu o le Au Paia, e tusa lava pe ola pe oti ai.3
O le tautotogo lena, sa faataalise ai le aufaigaluega e faauma le malumalu a’o le’i oo i lona faapaiaga faalauaitele i le aso 1 o Me, Sa latou faia se fola piliki e faataamilo i le faatanoa o le vai papatisoga, faapipii ia laupapa teuteu i o latou tulaga, ma vali ia puipui. Sa alu le ao atoa o faia le galuega ma sa masani ona faia seia tau lava i le po. Talu ai ona sa itiiti tupe a le Ekalesia e totogi ai le aufaigaluega, o le toatele o i latou sa ositaulagaina vaega o o latou totogi ina ia mautinoa na saunia le malumalu e faapaia i le Alii.4
O le lua o aso a’o lumanai le faapaiaga, na faauma ai e le aufaigaluega ona vali le potutele mo potopotoga i le fogafale muamua. O le aso na sosoo ai, na latou saluina ai i fafo le pefu ma otatoa o le potu tele ma tapena ai mo le sauniga. Sa le mafai e le aufaigaluega ona faauma nai vaega laiti o potu uma lava, ae na latou iloaina, o le a le taofia e na mea le Alii mai le taliaina o le malumalu. O le talitonu e faapea ua latou faataunuuina le poloaiga a le Atua, na latou valiina ai upu “Ua silasila mai le Alii i la tatou osigataulaga” i luga a’e o pulelaa e faasolo i puipui i sasae o le potutele o potopotoga.5
O le nofouta ai i le aitalafu na latou nofo aitalafu ai i le aufaigaluega, na faasilasila ai e taitai o le Ekalesia e faapea, o le sauniga muamua o le faapaiaga o le a faia o se fuafuaga mo foai agaalofa. Sa talosagaina i latou na auai atu e foai atu se talā e fesoasoani e totogi ai le auleipa le tagolima.
I le taeao o le aso 1 o Me, na tuua ai e Elvira Stevens e sefulufa tausaga ia lana tolauapiga i sisifo o Misisipi ma sopoia le vaitafe ina ia auai i le faapaiaga. O se teineitiiti matuaoti sa le’i leva ona siitia atu lona aiga i Navu ae maliliu ona matua, ae o lea ua nonofo nei Elvira ma lona uso ua faaipoipo. Ona na leai se isi tagata o lana tolauapiga na mafai ona auai faatasi ma ia mo le faapaiaga, o lea sa alu ai na’o ia.
O le iloa ai e faapea, atonu o le a tele ni tausaga faatoa toe fausia se isi malumalu i Sisifo, o lea na faataunuuina ai e le au aposetolo ia faaeega paia o nisi o tagata talavou nofofua, e aofia ai ma Elvira. O lenei la, i le tolu o masina mulimuli ane, sa a’ea’e atu ai o ia i faasitepu e toe agai atu i faitotoa o le malumalu, ma foai atu lana talā, ma maua ai se nofoaga i totonu o le potu tele o potopotoga.6
Sa amatalia le sauniga i se viiga mai se aufaipese. Ona faia lea e Orson Hyde le tatalo o le faapaiaga. “Ia foai mai Lou Agaga e mafuta iinei,” sa ia aioi ai, “ma tau ina lagona e tagata uma se faatosinaga paia i o latou loto sa fesoasoani Lona aao i lenei galuega.”7
Sa lagona e Elvira le mana faalelagi i totonu o le potu. Ina ua uma le sauniga, sa toe foi atu o ia i lana tolauapiga, ae sa toe foi mai o ia mo le isi sauniga na sosoo ai i le lua o aso mulimuli ane, ma le faamoemoe ia toe lagona ai lea lava mana e tasi. Sa tuuina atu e Orson Hyde ma Uilifoti Uitilafi ni lauga e uiga i galuega o le malumalu, perisitua, ma le toetutu. Ae lei faamae’aina le fonotaga, na viia e Uilifoti le Au Paia mo le faamaeaina o le malumalu e ui lava o le a tatau ona latou lafoaiaina.
Sa ia saunoa atu, “E faitau afe le Au Paia ua maua o latou faaeega paia i totonu [o le malumalu], ma o le a le pe lava lea malamalama.” “Ua lava le mamalu lenei mo le fausiaina o le malumalu.”
Ina ua uma le sauniga, sa toe foi atu Elvira i lana tolauapiga, ma toe sopoia ai le vaitafe mo le taimi mulimuli.8 O le taimi lea, na faaalu e le Au Paia i Navu le taimi atoa na totoe o le ao ma le po e tapena ai ma aveese nofoa, laulau ma isi meafale seia oo ina gaogao le malumalu ma tuu atu ai i aao o le Alii.9
Na mamao lava i luma i le ala, na malolo ai Polika ma le Tolauapiga a Isaraelu i se nofoaga na ta’ua o Mosquito Creek, e le mamao mai le Vaitafe o Misuri. Sa latou fiaaai, e lua masina na tuai ai ma le taimi atofaina, ma matuai matitiva lava.10 Ae sa maua’i lava Polika e auina atu se vaega e muamua atu i luga o Mauga Papa. Sa talitonu o ia, na manaomia ona faatini e se vaega o le Au Paia le malaga i lena vaitau, aua o le umi lava e feofeoai ai le Au Paia e aunoa ma se nofoaga mautu, o le a taumafai foi ona fili e faataapeape i latou pe poloka lona auala.11
Peitai, sa silafia e Polika, o le faalavalavaina o se vaega faapea o le a afaina ai punaoa o le Au Paia. E toaitiiti na i ai ni tupe po o ni sapalai faasili, ma na faatapulaa ni avanoa na tuuina mai e Iowa mo ni galuega totogi. Ina ia feola i laufanua vaoa, e toatele le Au Paia na faatau atu a latou meatotino taugata i le ala pe na galulue i soo se ituaiga galuega ia maua ai ni tupe mo meaai ma sapalai. A o agai atu le tolauapiga i sisifo ma tau leai ni tagata o nuu, o le a na ona atili faigata ai ona maua nei avanoa.12
Sa mamafatū foi isi mataupu ia Polika. O tagata o le Au Paia sa le’i auai i le vaega na muamua atu, sa manaomia se nofoaga e nonofo ai mo le taumalulu. Sa mananao le au Omaha ma isi tagatanuu Moni o e sa aināina le laueleele i sisifo o le Vaitafe o Misuri, e faataga le Au Paia e tolauapi iina i le taimi o le taumalulu, ae sa mumusu sui o le malo e faataga i latou e nofoia fanua na puipuia e Initia mo se vaitaimi umi.13
Sa silafia foi e Polika, o le Au Paia mamai ma limavaivai o i Navu, sa faalagolago i le Ekalesia e ave atu i latou i sisifō. Mo se taimi, sa faamoemoe ai o ia e fesoasoani atu ia i latou e ala i le faatau ese atu o meatotino taua i Navu e aofia ai le malumalu. Ae e oo ane i le taimi lea, e le’i faamanuiaina lava lenei taumafaiga.14
I le aso 29 o Iuni, na iloa ai e Polika e toatolu ni alii ofisa mai Fitafita a le Iunaite Setete na o mai i Mosquito Creek. Na faasilasila e le Iunaite Setete le taua ma Mekisiko, ma na faataga e Peresitene James Polk ia alii e saili se autau e toa 500 o le Au Paia mo se osofaiga faamiliteli i le gataifale o Kalefonia.15