O Le Faamanuiaga o le Toesea
Mulimuli ane, ina ua uma ona ma taumafai mo se taimi umi, sa ma faatalitali mo le ma tama muamua. Maʻeu le fiafia ma lagona! Sa sologa lelei mea uma. O lo ma afafine na amata ona malosi, tuputupu ae, ma o tagata uma na siomia i ma’ua sa fiafia e pei o i ma’ua mo le faamanuiaina i lenei afafine ua leva ona faatalitali i ai.
Ae na amata ona i ai faafitauli. O se faafitauli e le masani ai o le toto ma le ate na lamatia ai le pepe ma aʻu. Na maua foi e fomai le toto ua potopotoi i le afuafu o le pepe. Ina ua atoa le ono masina, sa manaomia le fanau mai o le ma tama teine.
Ina ua fanau mai o ia, sa i lalo ifo o le pauna (0.5 kk) lona mamafa ma na fuaina na o le 10 inisi (25 sm) le umi. I le falemai na taua o ia e tausimai o le matou “fitafita laitiiti.” Ae o le fa aso talu ona fanau mai, na faasolo vaivai ma maliu ai o ia. O le fanauina o loʻu afafine ma ou alu i le fale e aunoa ma ia i oʻu lima ma vaai i ana mea laiti i le fale na ou maua ai le tiga e le mafaamatalaina!
Sa ou malaga ma lana tamai pusa maliu i oʻu vae mo le lata i le 190 maila (300 km) seia oo ina matou taunuu i lo matou nuu o Garruchos ma tanumia ai o ia iina. E i ai taimi e mafai ai ona ou lagonaina lona faatasi mai, e peiseai na ia paʻi mai i oʻu foliga ma lona lima. O loʻu toalua, o Gustavo, na faapaiaina le tuugamau, ma matou tanumia ai o ia.
Na matou faaaluina aso e tolu i le fale o oʻu matua, lea na o mai ai tagata e asi i matou. O nisi e le malamalama i le auala e mafai ai e le Atua ona faatagaina lenei mea e tupu ia i ma’ua. Ae ma te le’i fesiligia lava le Alii. Na ia filifilia i ma’ua e avea ma matua o lenei tagata faapitoa, o lenei tamai agelu, o le na manaomia ni nai aso i lenei lalolagi e faataunuu ai lana misiona. Ma te leʻi vaʻai i lenei mea o se faʻasalaga poʻo se tofotofoga. Na ma vaaia o se faamanuiaga. Ua avea nei ma o ma tiute le agavaa e toe faatasi ma ia.
E aumaia e le talalelei ia i maua le malamalama, malosi, ma le faamoemoe o se tasi aso e mafai ai ona tausia o ia. Ioe, ma te faanoanoa i nisi o taimi, ma o nisi taimi ma te lagona ai le leai o se aoga. Ae o le Agaga e faamafanafanaina i ma’ua.
O loo ma taumafai ia maua se isi pepe, ma ma te iloa e tutupu mea e tusa ai ma le fuafuaga a le Alii ma le taimi. E alofa le Tama Faalelagi ia i tatou ma o le a le tuulafoaiina lava i tatou. E maeu lo ma’ua loto faafetai ia te Ia mo le saunia o se ala mo i matou e nonofo faatasi ai o se aiga i se aso.