ALU i le LOTU
“Ina ia manatua pea o ia ma tausi i ana poloaiga” (Moronae 4:3).
“Faatali, e le i uma lau banchan,” na fai mai ai Tina. Na tulei e Tina ia ipu mafolafola laiti o fualaʻau faisua latalata ia Juhyuk.
Sa tilotilo Juhyuk i lana ti o le taeao. Sa tuai o ia! E masani lava o lona uso matua e fesoasoani ia te ia e sauni mo le lotu. Ae o lona uso na malaga i fafo o le taulaga, o lea na tatau ai lava ia Juhyuk ona alu na o ia i le aso.
“Ua lelei Tina,” o le tala lea a Juhyuk. Sa ia faanatinati e faauma lana mea’ai. Ona ia fusia lea o lona Tina ma savali loa mo le faitotoa.
Na taofia o ia e Tina. “Ua ia te oe lau telefoni?”
Sa uu i luga e Juhyuk. “Ioe. E mafai ona ou lafoina se feau tusitusia [text] i la’u faiaoga Peraimeri pe a i ai se faalavelave.”
“Ma se ofu mafanafana i lalo o lou ofu talaloa? Ua malulu.”
Sa faaali atu e Juhyuk ia Tina lona ofu mafanafana.
Sa luelue atu le ulu o Tina. Sa telea’i atu Juhyuk i le auala. O leo uma o le aai na maua ai e ia le fiafia. E ese le manaia o le nofo i se tasi o aai pito sili ona tele i Korea i Saute!
Ae sa moomoo pea Juhyuk ia faatasi lona uso ma ia. La te o faatasi i le tele o taimi i le lotu.
“Ou te iloa le auala,” o lana tala lea ia te ia lava. Ma e sao lelei, e lei leva ae ia taunuu i le nofoaga muamua e faatali ai le pasi.
Ae sa na o ia iina. Sa ese lena mea. Sa ia siakiina lana uati. Pei a ua ia misia le pasi! O lea la ua tatau ona ia faatali mo leisi pasi.
Ina ua mavae ni nai minute, na amata ona potopoto mai isi tagata. Mulimuli ane, sa sosolo atu se pasi lanumoana sesega. Sa pe’a Juhyuk i sitepu o le pasi, totogi le ave pasi, ma nofo i lalo.
Ta-tink!
Sa siakiina e Juhyuk lana telefoni ina ua uma na tatagi le faailoilo o le feau tusitusia. O le feau mai lana faiaoga Peraimeri.
“O e i luga o le pasi? Manatua, a e leiloa, e mafai ona matou o atu e su’e oe!”
Sa ia ataata ma toe tali atu i lana feau tusitusia. “Ioe. O lea ua ou i ai i le taimi nei.”
Ua na o se malaga puupuu lava i le pasi. O le pasi lona lua e tatau ona ia tietie ai mo le sili atu ma le itula.
Sa tilotilo atu Juhyuk i le taimi ma faauu. Sa lei manao o ia e misi le lotu. E fiafia o ia i le vaega o le tatalo o le faamanatuga lea e faapea mai, “manatua pea o Ia.” O lona uiga ia manatua pea Iesu. Ma na manao Juhyuk e faia le mea lena.
Ina ua valaaulia o ia ma lona uso e le uso o lona tina ma lona toalua i le lotu i ni nai masina talu ai, na ia feiloai i faifeautalai. Na aoaoina i la’ua uma e Elder Kim ma Elder Moon e uiga ia Iesu. O le tele o mea na aoaoina e Juhyuk e uiga ia Iesu, o le tele foi lea o lona fiafia e mafaufau ia te Ia.
Ta-tink!
“Ua sui lau pasi?” o le feau feaveai lea.
“Leai,” o lana tali lea.
Na tu le pasi i le auala pisi lea na manaʻomia ai e Juhyuk ona oso ese ai e sui lana pasi. Sa fesili atu o ia i le ave pasi pe ua taunuu lana pasi lona lua.
“Ua e misia,” o le tala lea a le ave pasi. “O le isi pasi e taunuu mai i le 15 minute.”
“Ia ua lelei,” o le tala lea a Juhyuk. “Faafetai lava!”
Mulimuli ane, ina ua mavae le tietie ai i le pasi lona lua, na faatopetope atu Juhyuk i totonu o le faletapuai. Na faavanoa mai e lona aunt ma uncle se nofoa mo ia. Na ia taunuu ma le manuia!
Na mafaufau Juyuk e uiga i mea uma na ia faia ina ia oo atu ai i le lotu. Na ia mafaufau i tagata uma na fesoasoani ia te ia i le ala. Na ia lagona sa fiafia le Tama Faalelagi na i ai o ia iina.
Na fai e Juhyuk se tatalo lemu. “Faafetai i Lou Afio, Tama Faalelagi, ua mafai ona ou sau i le lotu i lenei aso.”