Unsa ka Maloloy-on ang Ginoo
Ni Elder Quentin L. Cook
Sa Korum sa Napulog Duha ka mga Apostoles
Ang bag-o nga pipila ka volume nga kasaysayan sa Simbahan motabang kanato sa pagtuman sa atong mga pakigsaad pinaagi sa pagpadako sa atong panumduman sa nabuhat sa Manluluwas kanato.
Sa unang higayon sa dul-an usa ka gatus ka tuig, ang bag-o nga pipila ka volume nga kasaysayan sa Simbahan gimantala ubos sa direksyon sa Unang Kapangulohan ug sa Korum sa Napulog Duha ka mga Apostoles. Giulohan og Mga Santos: Ang Istorya sa Simbahan ni Jesukristo sa Ulahing mga Adlaw, kini nga istorya sa kasaysayan nagsulti sa tinuod nga istorya sa ordinaryo nga mga tawo nga nahimong mga Santos pinaagi sa Pag-ula ni Jesukristo (tan-awa sa Mosiah 3:19). Ang unang volume, Ang Sumbanan sa Kamatuoran, 1815–1846, nakompleto na ug gihubad ngadto sa 14 ka pinulongan aron maapud-apod ngadto sa daghang dapit sa kalibutan.
Ang Mga Santos mao ang istorya kon giunsa pagpahiuli sa Dios ang Iyang walay katapusang pakigsaad tungod sa Iyang gugma alang sa Iyang mga anak. Gipakita niini kon giunsa pagpahiuli sa Ginoo ang Iyang ebanghelyo aron sa paghatag og paglaum ug kalinaw sa mga panahon sa kagubot, pagsulay, ug pag-antus. Gipakita usab niini kon sa unsang paagi ang gipahiuli nga mga pakigsaad mosangput ngadto sa kahimayaan pinaagi ni Jesukristo.
Tingali magdahum ka nga ang istorya magsugod diha ni Joseph Smith, apan ang Mga Santos nagsugod niadtong 1815 sa pagbuto sa usa ka bulkan sa Indonesia, nga miresulta sa daghang kamatayon, sakit, ug kagubot. Kini nga punto sa sinugdanan gipili base sa unsay gipadayag sa Ginoo kon giunsa Niya sa pagpahiuli sa mga pakigsaad nga naghigot kanato ngadto sa Manluluwas ug nagtugot kanato sa pagbuntog sa tanang problema sa kinabuhi:
“Busa, Ako ang Ginoo, nahibalo sa katalagman nga moabut diha sa mga lumulupyo sa yuta, mitawag sa akong sulugoon si Joseph Smith, Jun., ug namulong ngadto kaniya gikan sa langit, ug mihatag kaniya og mga sugo; …
“Nga ang akong walay katapusan nga pakigsaad unta mapahimutang” (D&P 1:17, 22).
Gikan sa pangbukas nga eksena niini ngadto sa tibuok kalibutan nga pag-apud-apod niini, ang Mga Santos nagtimaan ngadto sa mga anak sa Dios bisan asa nga kini ang istorya sa ilang pakigsaad sa Dios, kinsa nasayud sa ilang kalisdanan. Pinaagi sa Iyang propeta, gibag-o sa Dios ang mga pakigsaad nga dili mowagtang sa kadautan, kagul-anan, pag-antus, ug panagbulag tungod sa kamatayon apan nagsaad og pagkaayo pinaagi sa Pag-ula sa Manluluwas, nagbalaan ug naghatag sa atong kinabuhi og talagsaong kahulugan, ug nagsiguro kanato nga ang mga relasyon nga atong gimanggad dinhi sa yuta molungtad sa kahangturan, “pagaubanan sa walay katapusan nga himaya” (tan-awa sa D&P 130:2).
Ang unang walo ka mga kapitulo sa Ang Sumbanan sa Kamatuoran namantala na sa mga isyu niini nga magasin sa tibuok tuig. Ang isyu niining bulana nagtapos sa gisumpay-sumpay nga mga kapitulo gikan sa Mga Santos, apan ang istorya nagpadayon diha sa saints.lds.org, diha sa Gospel Library app, ug sa giimprinta (pag-order sa store.lds.org). Dapiton ko ikaw nga mopadayon sa pagbasa niini sa bisan asa niini nga mga matang sa media.
Usa ka Balaan nga Sundanan ug Plano
Ang Mga Santos nagpadayon sa balaang sundanan diin ang mga propeta, isip kabahin sa ilang pagpangalagad, mogamit sa nangagi aron sa pagtabang kanato nga makat-on kon kinsa kita ug makita ang mga katuyoan sa Dios diha sa atong kinabuhi. Sa mga kasulatan, daghang mga propeta mosugod sa ilang pagtudlo pinaagi sa pagsaysay og mga istorya mahitungod sa kalooy sa Ginoo sa ilang mga katigulangan.1 Si Moroni miawhag sa mga mambabasa sa Basahon ni Mormon nga “mahinumdom unsa ka maloloy-on ang Ginoo” sa tibuok kasaysayan “ug palandonga kini sa inyong mga kasingkasing” (Moroni 10:3). Ang pagpamalandong sa kaayo sa Dios nag-andam kanato sa pagdawat sa saksi sa Espiritu, nga nagtudlo kanato “sa mga butang ingon nga sila gayud mao, ug sa mga butang ingon nga sila gayud mahimo unya” (Jacob 4:13; tan-awa usab sa Moroni 10:4–5).
Ang pagkasayud nga nagplano ang atong Langitnong mga Ginikanan alang sa atong kalipay ug kahimayaan sa katapusan naghatag kanato og panglantaw, naghatag kanato sa pagkatawo isip minahal nga mga anak sa balaan nga mga ginikanan, ug nagpadako sa atong pagsalig sa Ginoo, bisan sa mga panahon sa kalisdanan. Ang paghinumdom sa kaayo sa Ginoo makapanalipod usab kanato batok sa garbo ug sa mga kakuyaw sa kauswagan. Si Mormon misulat kalabut sa usa ka panahon sa dihang ang mga Nephite “misugod sa pagtubo sa hilabihan nga pagkaadunahan.” Apan dili sama sa ubang panahon sa Basahon ni Mormon dihang gipasagdan sa katawhan nga ang garbo ug katigayunan mosangput sa ilang pagkapukan, misunod sila og lahi nga dalan niining panahuna: “Apan bisan pa sa ilang kaadunahan, o sa ilang kalig-on, o sa ilang kauswagan, sila wala mabayaw sa garbo sa ilang mga panan-aw; ni sila dugay sa paghinumdom sa Ginoo nga ilang Dios; apan sila nagmapainubsanon sa ilang mga kaugalingon sa hilabihan diha sa iyang atubangan.” Gituman nila ang ilang mga pakigsaad ug nagpabilin nga matarung tungod kay “sila nahinumdom unsa ka dako ang mga butang nga nahimo sa Ginoo alang kanila” (tan-awa sa Alma 62:48–50).
Ang Mga Santos nagtudlo og mga leksyon nga sama niini ug daghan pa. Makatabang kini nimo nga makakita sa paggiya sa Ginoo sa imong kinabuhi samtang dili direktang gisinati nimo ang mga pagsulay sa pagtuo, mga kasubo ug mga kalipay, ang mga pinadayag ug determinasyon sa dili perpekto nga mga tawo kinsa nahigugma sa Ginoo ug kinsa mibati sa Iyang gugma.
Samtang magbasa ka, makadiskubre ka og bag-o nga mga panabut ug kahulugan bisan sa mga istorya nga nadunggan na nimo kaniadto. Walay eksena sa kasaysayan sa Simbahan nga mas naila kay sa Unang Panan-awon ni Joseph Smith, apan ang Mga Santos nagtabang kanato nga mas makasabut kon sa unsang paagi nanlimbasug si Joseph aron mapahiuyon ang unsay iyang gibati diha sa iyang kasingkasing ngadto sa unsay naa sa iyang hunahuna.
Ang kinasingkasing nga tinguha ni Joseph nga mabati ang pagpasaylo sa Manluluwas wala matuman tungod kay nakaobserbar siya nga walay usa sa mga simbahan nga anaa ang nagtudlo “sa ebanghelyo ni Jesukristo ingon nga narekord diha sa Bag-ong Tugon.”2 Sa iyang hunahuna namalandong si Joseph hain nga simbahan ang husto o kon sayop ba silang tanan. Naglaum siya pag-ayo diha sa iyang kasingkasing nga usa kanila ang husto aron iyang makita ang kalinaw nga iyang gitinguha. Tungod kay wala magkauyon ang iyang hunahuna ug ang iyang kasingkasing, nadiskubrihan ni Joseph nga mahimo siyang mangutana sa Dios. Miadto siya sa kakahoyan aron mag-ampo. Didto iyang nakita ang Amahan ug ang Anak, kinsa mipasaylo kaniya ug misulbad sa iyang problema sa paagi nga wala gayud niya mahunahuna.3
Si Joseph, ang iyang pamilya, ug ang daghan pang mga tawo nga midawat sa gipahiuli nga pakigsaad sa Ginoo gusto nga mobati sa gugma sa Dios alang kanila, makakat-on kon unsaon nila nga mas maduol Kaniya, ug mamaayo ang mga relasyon ngadto sa mga minahal. Ang Mga Santos nagsaysay sa ilang mga istorya.
Pagsalig sa Ginoo panahon sa mga Pagsulay
Ang volume 1 sa Mga Santos naglakip sa makatandog sa kasingkasing nga istorya ni Amanda Barnes Smith ug sa iyang pamilya, kinsa misunod sa mga sugo sa Ginoo ug nagbuhat sa Iyang kabubut-on.4 Ang bana ni Amanda ug usa sa iyang mga anak gipatay sa mabangis nga paagi uban sa 15 pa ka mga Santos sa Ulahing mga Adlaw nga nagkampo sa usa ka gamay nga pamuy-anan diha sa Shoal Creek sa Missouri. Ang Ginoo misuporta ni Amanda agi sa makalilisang nga kasinatian, mitubag sa iyang mga pag-ampo, mihatag kaniya og kaisug, ug nakapahimo niya sa pag-ayo sa iyang anak nga grabing nasamdan.5
Ang Mga Santos nagpakita kon sa unsang paagi si Amanda nakakat-on sa pagsalig sa Ginoo agi sa grabing kalisud. Nagsaysay usab kon unsay nakat-unan ni Joseph Smith mahitungod sa kamaayo sa Dios bisan sa mga panahon sa pag-antus. Nagpakita kini nga ang pagkahibalo sa mga pamaagi sa Ginoo naghatag kanato og mahangturong panglantaw, nagtabang kanato nga makakita sa mga butang kon unsa gayud kini karon ug sa umaabut, ug nagtabang kanato sa pagpakita og pagtuo nga ang Ginoo motabang kanato sa paglahutay sa mga panahon sa kalisdanan.
Sa dihang nahibaloan ni Propeta Joseph ang nahitabo sa pamilya ni Amanda ug sa uban diha sa Shoal Creek, gibati niya nga mas maayo pa nga mabilanggo siya o mamatay kay sa tugutan nga pamatyon ang mga Santos. Pagkasunod adlaw misulay siya sa pakigsabut og malinawon nga solusyon uban sa militia sa Missouri, kinsa nangandam na sa pag-ataki sa dakong pamuy-anan sa mga Santos sa Far West. Hinoon, gidakop si Joseph ug gihimong binilanggo.
Paglabay sa dul-an lima ka bulan, nagpabilin si Joseph nga dinakpan, gibilanggo sa usa ka tugnaw, gamay nga selda ilawom sa yuta sa Liberty, Missouri. Naghunahuna siya kon asa mitago ang Dios ug unsa ka dugay nga maagwanta Niya ang pagpaminaw sa mga paghilak sa mga biyuda ug mga ilo. Nag-ampo siya, “O Ginoo, hangtud kanus-a sila mag-antus niini nga mga kadautan ug dili makatarunganon nga mga pagdaug-daug, sa dili pa malukmay ang imong kasingkasing ngadto kanila, ug ang imong kasingkasing mobati og kalooy ngadto kanila?” (D&P 121:3).
Ang Mga Santos nagtudlo kanato nga ang kalisdanan dili ebidensya sa kasuko sa Ginoo, o pagkuha sa Iyang mga panalangin. Ang oposisyon usa ka bahin sa plano sa Dios sa paglunsay kanato ug pag-andam kanato alang sa usa ka mahangturon, celestial nga padulngan (tan-awa sa 2 Nephi 2:11). Nakat-unan ni Joseph nga ang walay kinutubang pag-antus sa Manluluwas nakapahimo Niya sa pagtabang kanato kon mag-antus kita ug sa katapusan mobayaw kanato (tan-awa sa Alma 7:11–13). Agi og tubag sa magul-anong pangamuyo ni Joseph, ang Ginoo misulti og daghang matang sa mga hagit sa wala pa motapos og:
“Kon ang mga apapangig gayud sa impyerno mobuka ug moabli sa ba-ba og dako diha kanimo, ikaw masayud, akong anak, nga kining tanan nga mga butang makahatag kanimo og kasinatian, ug alang sa imong kaayohan.
“Ang Anak sa Tawo mikunsad ubos kanilang tanan. Labaw pa ba ikaw kaniya?” (D&P 122:7–8).
Ang pagsinati niini nga mga butang sa atong kaugalingon makahatag kanato og kalooy nga sama kang Kristo alang niadtong gisakit. “Ang akong kasingkasing kanunay nga mas malumo human niini kay sa kaniadto” nakaamgo si Joseph samtang anaa sa bilanggoan. Nanghinaut siya nga nakauban unta niya ang mga Santos aron sa paghupay ug paglipay kanila. “Wala nako kini masabti sama sa akong pagsabut karon,” mipasabut siya, “kon wala pa unta ako masakiti sa mga pagpaantus nga akong naagian.”6
Usa ka rason nga ang Unang Kapangulohan ug Korum sa Napulog Duha ka mga Apostoles mipahimo ug miaprubar sa Mga Santos mao nga makatabang kini sa matag usa kanato sa pagsinati niini nga mga butang pinaagi sa mga istorya sa uban. Atong makat-onan gikan kang Amanda nga bisan kon ang Dios sumala sa Iyang walay kinutuban nga kaalam dili mopugong sa mga kadautan o pag-antus, nagmahal Siya kanato ug naghunahuna Siya kanato. Nakadungog Siya sa atong mga pag-ampo ug Siya maloloy-on ug mabination.
Gipahiuli nga mga Panalangin sa Templo
Walay laing dapit nga mas napakita kanato kana nga kalooy ug kamabination kay sa templo. Sa sentro niini, ang Mga Santos mao ang istorya sa gipahiuli nga mga panalangin sa templo. Ang unang volume natapos samtang ang liboan ka mga Santos sa Ulahing mga Adlaw nakadawat sa sagradong mga ordinansa sa Templo sa Nauvoo niadtong 1846. Ang ikaduhang volume matapos sa pagpahinungod sa Templo sa Salt Lake ug sa pagsugod sa mga Santos sa pagdawat sa mga ordinansa didto niadtong 1893. Ang ikatulong volume matapos sa pagsugod sa mga Santos sa Europe sa pagpundok ngadto sa templo sa Switzerland niadtong 1955. Ang ikaupat nga volume modala sa istorya hangtud karon, sa dihang ang mga templo nagkatap sa yuta ug ang mga Santos sa tibuok kalibutan nakadawat sa mga ordinansa sa kahimayaan, sama sa napanan-awan sa mga propeta sa dugay nang panahon.
Diha sa balay sa Ginoo mohimo kita og mga pakigsaad ug matugahan sa gahum sa pagbuntog sa mga epekto sa Pagkapukan, lakip sa mga dautan ug pag-antus niini nga kalibutan. Makadawat kita og proteksyon ug sa katapusan gahum aron mobangon sa Pagkabanhaw, ma-seal ngadto sa mga minahal hangtud sa kahangturan.
Ang Mga Santos motabang kanato sa pagtuman sa mga pakigsaad pinaagi sa pagpadako sa atong mga panumduman sa balaanon nga mga paagi. Motabang kini kanato sa paghinumdom kon unsay nabuhat sa Manluluwas alang kanato. Kon walay mga rekord sa mga kahimoan sa Dios kaniadto, dili kita mahimong “mahinumdom unsa ka maloloy-on ang Ginoo ngadto sa mga katawhan” (Moroni 10:3). Tungod niini nga mga rason utangan kita sa Ginoo ug sa mga Santos kinsa mirekord sa ilang mga kasinatian sa Iyang gugma alang kanila. Ang Ginoo misugo ni Joseph Smith sa pagrekord sa iyang mga kasinatian (tan-awa sa D&P 21:1). Misugo Siya og usa ka historian sa Simbahan nga maglihok ubos sa direksyon ni Joseph “[mag]tipig sa talaan ug sa kasaysayan sa simbahan sa kanunay” (D&P 47:3). Misugo Siya nga ang kasaysayan maglakip sa “tanan nga mga butang nga alang sa kaayohan sa simbahan, ug alang sa nagtubo nga mga kaliwatan” (D&P 69:8).
Naghunahuna niini nga mga pagpadayag ug sa pakigsaad nga kanunayng mohinumdom sa Manluluwas, ang Unang Kapangulohan ug Korum sa Napulog Duha ka mga Apostoles misugod sa pagplano sa Mga Santos 10 ka tuig na ang milabay. Karon moawhag kami nimo sa pagbasa niini, mosalig nga makatabang kini nimo sa pagsabut sa plano sa Dios, makakita kon unsa ka maloloy-on ang Ginoo, matinud-anong molahutay atol sa maayo ug ngil-ad nga mga panahon, magbaton og kalooy nga sama kang Kristo alang sa uban, ug motuman sa mga pakigsaad nga modala kanimo ngadto sa kahimayaan.