Unsa ang Gusto sa Matag Bishop nga Mahibaloan sa mga Miyembro sa Iyang Ward
Ang tagsulat nagpuyo sa Utah, USA.
Ania ang walo ka kamatuoran nga akong nakat-unan sa akong pagserbisyo isip bishop.
Aduna koy talagsaong oportunidad nga makaserbisyo isip bishop. Niadtong mga tuiga, daghan ko og nakat-unan nga mga leksyon kay sa akong masulti. Apan nakakat-on ko og walo ka kamatuoran nga nagtuo ko nga nasinati sa matag bishop. Samtang kini nga lista wala maglakip sa tanan, ako kining paningkamotan sa pagpaambit sa unsay gilauman sa matag bishop nga mahibaloan sa mga miyembro sa iyang ward.
1. Ang bishop tinuod gayud nga nagmahal sa matag miyembro sa iyang ward.
Ang gugma sa usa ka bishop alang sa iyang ward konektado sa gugma sa Langitnong Amahan ug ni Jesukristo alang sa matag usa kanato. Kon ang bishop motan-aw sa mga miyembro atol sa miting sa sakrament, ang kalooy ug pagsabut mokunsad diha kaniya sa paagi nga lahi sa bisan unsa nga iyang nasinati. Kon ang bishop mobarug ug mopaambit kon unsa niya kamahal ang mga miyembro sa ward, ang iyang mga pagbati kinasingkasing gayud ug tinuod. Hibaloi nga ang imong bishop nahigugma nimo, nagpakabana kanimo, ug nagpangga kanimo labaw pa sa imong nahibaloan.
2. Ang bishop masuportahan sa pisikal, emosyonal ug espiritwal nga paagi pinaagi sa hugot nga pagtuo ug mga pag-ampo sa mga miyembro.
Ang usa ka bishop mogahin og daghang oras sa pagserbisyo. Kanunay siyang mogahin og daghang mga oras sa simbahan sa Dominggo ug dugang nga mga gabii sa semana human sa trabaho aron sa pagbisita, pag-interbyu, ug pag-atiman sa mga miyembro sa iyang ward.
Ang bishop makahimo niini matag semana tungod sa hugot nga pagtuo ug mga pag-ampo sa mga miyembro sa ward. Isip bag-ong natawag nga bishop, dili mapugngan nga motulo ang akong luha matag higayon nga makadungog ko og miyembro nga mag-ampo nga “panalangini ang bishop.” Ang inyong mga pag-ampo sa hugot nga pagtuo tinuod gayud nga matubag, ug ang bishop makadawat ug mobati sa makasuporta nga impluwensya niadto nga mga pag-ampo. Ang Ginoo motubag niadtong matinud-anon nga mga pag-ampo diha sa mga ulo sa mga bishop sa Simbahan.
3. Ang bishop kanunay nga mobati nga dili angayan sa calling (bisan human sa tulo o upat ka tuig).
Diyutay ra kaayo ko og nailhan nga mga bishop kinsa mibati nga tinud-anay silang “andam” alang sa calling. Hinoon, nasayud ko nga “kinsa ang tawagon sa Ginoo, ang Ginoo mopasarang.”1 Samtang nasayud ang bishop nga nag-anam siya pagkahimong sarang, manlimbasug usab siya sa pagbati nga morag dili gayud niya mabuhat og maayo ang calling. Himoon niya ang iyang labing maayo aron mohatag og maalamon nga tambag kon gikinahanglan, aron dili makasilo og mga tawo, ug aron mahiangay sa Espiritu, apan maghunahuna gihapon siya usahay kon maayo ba niyang pagkatuman ang iyang calling.
4. Ang Espiritu sa Dios motrabaho pinaagi sa bishop kon manambag siya og mga miyembro sa ward.
Sa dihang gipangutana kon unsay labi nakong gimingawan sa pagserbisyo isip bishop, akong sultihan ang mga tawo nga gimingaw ko sa kusog nga impluwensya sa Espiritu nga nag-uban sa awtoridad sa usa ka bishop. Kon naghupay man niadtong nawad-an og mga minahal, nakigsulti niadtong nanlimbasug og dili matinud-anon nga mga kapikas, o nag-awhag sa mga tawo sa paghinulsol, ang Espiritu nga anaa sa usa ka matinud-anong bishop mao ang Espiritu sa Dios ug ang espiritu sa pagpadayag.
Bag-o lang nga dunay kanhi miyembro sa ward nga nangayo nako og tabang aron sa pag-atubang og pipila ka personal nga mga isyu. Mibalhin siya ngadto sa usa ka bag-ong ward ug dili siya sigurado kon gusto ba niyang moduol sa iyang bag-ong bishop alang sa giya. Akong gipaambit kaniya ang unsay kadaghan na nakong napaambit sukad ko na-release, nga mao nga samtang malipay ko nga motabang, wala na ako maghupot sa mga yawe nga gihuptan sa usa ka bishop ug nga kadto nga mga yawe mahimong importante sa paghatag sa suporta nga iyang gikinahanglan. Misugyot ko nga makigsulti siya sa iyang bishop. Nakigsulti ko kaniya paglabay sa duha ka semana, ug miingon siya nga nakigkita siya sa iyang bishop ug daw nahibalo na daan ang iyang bishop kon unsa ang iyang mga problema ug unsa ang labing maayong paagi sa pagtabang kaniya. Samtang posibleng masayop ang bishop, ang Ginoo modasig kaniya, mogiya kaniya, ug mopanalangin og mga kinabuhi pinaagi sa iyang mga pulong.
5. Ang bishop dili perpekto; usahay siya mismo masayop ug usahay sayop ang mga butang nga iyang mahimo.
Ang mga bishop, bisan pa sa ilang calling, mortal nga mga tawo. Aduna silay mga kasaypanan, mga kahuyang, mga pagpihig, ug ilang kaugalingong personal nga mga problema. Ang Espiritu mopasarang sa tawo nga naghupot sa katungdanan sa bishop, apan ang bishop usa gihapon ka tawo ubos sa samang mga problema ug mga kahuyang nga atong giatubang.
Kini nga pagkaamgo kinahanglang dili mopaminos sa pagtahud nga atong ipakita sa iyang calling o sa pagtagad nga atong ihatag sa iyang tambag. Ang bishop nasayud gayud sa iyang mga kahuyang ug naningkamot sa pagbuntog niini o sa pagpugong niini aron dili makaapekto sa iyang pagserbisyo isip bishop. Bisan unsaon niya sa pagpaningkamot, kanunay gayud nga dili siya hingpit.
6. Ang bishop mobati nga dili igo ang iyang pagkakita sa mga miyembro sa ward o igo ang iyang pagbuhat og maayo.
Kada adlaw ang bishop maghunahuna kon kinsa pa ang mahimo niyang tabangan o iya untang gitabangan nianang adlawa. Ganahan unta ko nga kanunay nga makig-istorya sa matag miyembro, apan duna koy full-time nga trabaho, akong pamilya, ang programa sa kabatan-onan, ug pipila ka mga miyembro sa ward nga dunay dakong panginahanglan. Wala lang gyuy igong panahon aron regular nga makigkita sa matag miyembro.
Bisan pa niana, isip usa ka bishop, ang Espiritu usahay miaghat nako sa pagbisita og piho nga miyembro nga naglisud. Sa daghang higayon, kadto nga mga pagbisita nasugdan sa ilang pag-ingon, “Nahibalo ko nga moari ka.” Ang Espiritu nga among nabati kasagaran talagsaon kaayo samtang pareho namong naamguhan nga ang pagbisita usa ka ebidensya nga ang Dios motubag sa mga pag-ampo.
Kanunay usab akong malingaw sa pag-abiabi nga akong nadawat diha sa mga pultahan niadtong mga aktibo, “wala maglisud” nga mga miyembro. Kining buotan nga mga tawo mosimba matag semana, matinud-anong moserbisyo sa mga calling, walay grabe nga dayag nga mga hagit, ug sa kasagaran dili kanunay makadawat og mga pagbisita gikan sa mga lider sa priesthood. Mapasalamaton sila nga makaangkon og gamay nga panahon nga makig-atubang sa ilang bishop. Kaninyong tanan ako moingon, “Salamat! Padayon! Hibaloi nga ang inyong bishop nahigugma kaninyo ug mobisita pa kon makahimo siya.”
7. Ang inyong bishop tinud-anay gayud ug matinuoron nga nagkinahanglan kaninyo sa pagpangalagad sa usag usa.
Isip usa ka bishop, sa matag higayon nga sultihan ko nga ang usa ka miyembro sa ward naglisud, kanunay akong mangutana, “Kinsa man ang mga home ug visiting teacher?” Usa kini ka paagi sa pagtimbang-timbang nga ang mga panginahanglan sa miyembro matubag sa pagkakaron ug sa umaabut. Ang bishop, nga molihok nga walay tabang gikan sa ubang mga miyembro sa ward ug stake, limitado ra og mga kapanguhaan. Sigurado nga makabisita—ug mobisita— siya sa mga tawo nga anaa sa kalisud. Apan uban sa mga kapanguhaan sa priesthood ug Relief Society nga mahimong anaa kaniya, ang iyang pagserbisyo mapadak-an.
Mao kini ang gipasabut sa pagpangalagad. Adunay mga higayon nga ang pipila kanato makalimot nganong mangalagad kita sa usag usa: Ang Ginoo misugo kanato nga “maghigugmaay … ang usa sa usa” (Juan 13:34). Hibaloi nga ang inyong bishop mogamit sa pagpangalagad isip usa ka dinasig nga paagi nga “mas maanaa” sa kinabuhi sa mga miyembro sa ward.
8. Gusto sa bishop nga makabuhat siya sa tanan alang sa iyang panon.
Bisan kanus-a, adlaw man o gabii, panalangin man kini sa priesthood, pagtambag sa nagpabadlong nga anak, o pagdali-dali ngadto sa nahitaboan sa aksidente, gusto niyang buhaton ang bisan unsa nga gikinahanglan sa usa ka miyembro. Dili niya kanunay mabuhat ang tanan, ug tingali dili siya ang tukma nga tawo sa matag sitwasyon, apan ayaw kahadlok sa pagpangayo og tabang kon gikinahanglan ninyo kini. Hibaloi nga ang bishop anaa aron sa pagserbisyo niana nga mga panahon ug nga pareho kamong mapanalanginan pag-ayo sa pagtinabangay.
Mibati ko og kamapainubsanon sa akong sagradong oportunidad nga makaserbisyo niining balaan nga calling. Sa akong pagserbisyo, milambo ko gikan sa pagtuo ngadto sa kahibalo. Wala na ko magtuo nga ang ebanghelyo tinuod; nasayud ako nga kini tinuod. Wala na ko magtuo nga ang Dios nakaila kanako; nasayud ako nga ang Dios nahibalo gayud sa matag usa kanato, sa atong inadlaw nga pagpakabuhi ug sa atong personal nga mga panlimbasug. Dugang pa, nasayud ko nga naglihok Siya pinaagi sa Iyang mga sulugoon, ilabi na niadtong naghupot sa mga yawe sa priesthood. Nasayud ko nga dili gayud ako makaserbisyo isip bishop kon wala maghunahuna ang Dios niini nga buhat. Ang kamatuoran sa ebanghelyo ug ang gugma sa Dios alang sa Iyang mga anak ang nakapahimo sa matag bishop sa pagserbisyo.