Mau ’īritira’a ’āpī nō te mau pāpa’ira’a mo’a

I roto i te mau ’ōpuara’a ’īritira’a pāpa’ira’a mo’a tei ha’amanahia i te mau matahiti i ma’iri, tē vai nei te Buka a Moromona nā roto i te reo burmese, efik, georgian, navajo, pohnpeian, sesotho ’e tshiluba ’e te ’īritira’a nō nā toru buka pāpa’ira’a mo’a nā roto i te reo vava marite, afrika’ans, amharic, arabia, bislama, heleni, hiligaynon, hindi, hmong, lao, lingala, mārē, peresia, polane, serebia, setswana, sinhala, slovak, slovenian, tahiti, tamil, telugu, tok pisin, turkish, twi, urdu ’e yoruba.

I roto i te hō’ē rata nō te 9 nō ’atopa 2017, ’ua tāpura te Peresidenira’a Mātāmua i teie mau ’ōpuara’a ma te tu’u i te hō’ē fa’anahora’a ’āpī e nehenehe ai te mau ta’ata e tuatāpapa i te mau tuha’a mātāmua o te ’īritira’a ’a tīa’i noa atu ai ’ia hope te ’īritira’a.

« ’A nu’u noa ai te ’īritira’a, e pūharahia te mau tuha’a i oti i terā taime ’e terā taime », tē parau nei te rata. « E matara teie mau tuha’a, noa atu ā ’aita i ’oti pauroa, i ni’a i te LDS.org ’e i roto i te fa’anahora’a ’āfa’ifa’i o te Vaira’a buka ’evanelia, ē hope noa atu te ’īritira’a » Te pūharara’a mātāmua o te tahi mau reo, e ha’amata ïa i te 30 nō novema 2017. ’Ia oti te ’īritira’a ’e te mau hi’opo’ara’a ’e te mau ha’amanara’a, e monohia te mau pūharara’a mātāmua i te pūharara’a hope’a, ’e e nene’i-ato’a-hia te reira.

Tau matahiti te maoro te ’īritira’a nō te mea e hi’opo’a-māite-hia te ’īritira’a nō te mau pāpa’ira’a mo’a. Nō reira, tei te mau ta’ahira’a rau te mau ’ōpuara’a. I roto i te mau ’īritira’a mātāmua e pūharahia, e mau ’īritira’a ïa tei hi’opo’ahia e te tahi mau feiā fa’atere i tō ’outou iho fenua. E pūharahia te tahi atu mau tuha’a i terā taime ’e terā taime. Te mau ’īritira’a tei fātata roa i te oti, e’ita ïa te pūharara’a tātuha’a e ravehia.

Tē ani nei te Peresidenira’a Mātāmua i te mau melo ’e te mau feiā fa’atere ē, ’a nu’u noa ai ’aore rā ’a tīa’i noa ai te ’ōpuara’a ’īritira’a, ’ia « fa’a’ohipa-noa-hia te ’īritira’a e vai ra nō te mau Hīro’a Fa’aro’o, te mau pure ’ōro’a ’e te pure bāpetizora’a ē tae noa atu te otira’a te ’īritira’a ’āpī ».

’Ua ’īritihia ’e tē vai nei te ’īritira’a o te mau nene’ira’a a te ’Ēkālesia nō te mau pāpa’ira’a mo’a i roto i te rahira’a reo i muri nei : Te Bibilia, 3 ; te nene’ira’a au a’e o te Bibilia e ’ere nā te ’Ēkālesia, 95 ; te Buka a Moromona, 90 ; Tahi mau tuha’a nō te Buka a Moromona, 21 ; ’e Te Parau Ha’api’ira’a ’e te mau Parau Fafau ’e te Poe Tao’a Rahi, 58.