Elder Patrick Kearon
Peresidenira’a o te Hitu ’Ahuru
I te tāvinira’a ’oia ’ei peresideni nō te ārea nō Europa, ’ua ’ite mata Elder Patrick Kearon i te tere o e piti mirioni tītīhoria tei horo ’ē i te mau tama’i i te mau fenua piri Hiti’a o te rā nō te ’imi i te pāruru i Europa. ’Ua parau ’oia : « I muri a’e i tō’u hi’ora’a i roto i tō rātou mata ’e te fa’aro’ora’a i tō rātou ’ā’amu, ’oia ato’a te ri’ari’a i te horo-’ē-ra’a ’e tō rātou tere fifi nō te ’imi i te hō’ē vāhi ha’apūra’a, e’ita roa atu vau e riro fa’ahou mai muta’a ra ». « E ’ohipa fa’auru mau ’ia ’ite i te mau mea tā te mau melo o te ’Ēkālesia nā te ao ato’a nei i hōro’a nō te tauturu i teie mau ta’ata ’e teie mau ’utuāfare tei ’ere roa ».
’Ua pāturuhia Elder Kearon ’ei Hitu ’Ahuru Hui mana fa’atere rahi i te 3 nō ’ēperēra 2010, ’e ’ua pi’ihia i te peresidenira’a o te Hitu ’Ahuru i te 1 nō ’ātete 2017.
’Ua fanauhia ’o Elder Kearon i Carlisle, Cumberland, Peretāne i te ’āva’e tiurai 1961, e Paddy ’e ’o Patricia Kearon. Nō te mea tē tāvini ra tōna pāpā i roto i te nu’u reva nō Peretāne, ’ua haere ’o Elder Kearon i te ha’api’ira’a i te fenua piri Hiti’a o te rā ’e i Peretāne.
I te tuatāpapara’a ’oia nō ni’a i te ’Ēkālesia, ’ua tai’o ’oia i te hō’ē ’īrava i roto i te Buka a Moromona tei nā ’ō mai ē : « Tē vai nei te mau ta’ata ’ia noa’a tō rātou ’oa’oa » (2 Nephi 2:25). « ’Ua ta’i terā ’īrava i roto i tō’u tari’a », tē parau ra Elder Kearon. « I roto i te orara’a o te mau ta’ata tā’u i fārerei, ’ua ’ite au i te faufa’a e roa’a i tō tātou orara’a nā roto i te pe’era’a i te a’ora’a a te Fa’aora ’ia fa’aitoito ». ’Ua tomo ’oia i roto i te ’Ēkālesia i te pō Noela 1987.
’Ua fārerei ’oia ia Jennifer Carole Hulme ’a haere ai teie tamahine i te ha’api’ira’a i Peretāne nā roto i te fare ha’api’ira’a Brigham Young University. ’Ua fa’aipoipohia rāua i roto i te hiero nō Okland (California) i te matahiti 1991 ’e ’ua ora na i Peretāne ē tae roa tōna pi’ira’a i te matahiti 2010. E maha tamari’i tā rāua.
’Ua ora ’oia ’e ’ua ’ohipa ho’i i Peretāne, i Arabia, ’e i te Fenua Marite i roto i te mau taiete huru rau mai te ea, te mā’a, te utara’a ’e te pereo’o, ’e ’ua ha’amau ato’a ’oia i tāna iho taiete tūreiara’a. ’Ua ’ohipa ato’a ’oia i roto i te orara’a tīvira ’e te orara’a huira’atira ’e ’ua tāvini ’oia i roto i te mau tōmite fa’aterera’a o te pū tauturura’a, o te fare ha’api’ira’a, o te pū tauturu taiete ’e o te fare ha’api’ira’a teitei.
’Ua rahi te mau pi’ira’a tā Elder Kearon i tāvini i roto i te ’Ēkālesia, ’ei tauturu pāpa’i parau pāroita, peresideni Feiā ’Āpī Tamāroa, tauturu i roto i te ’episekōpora’a, peresideni ’āma’a, peresideni titi ’e Hitu ’Ahuru ārea.