Mga Tanong at mga Sagot

“Bukod sa panalangin at pag-aaral ng mga banal na kasulatan, ano ang pinakamainam na paraan para mapalakas ang aking patotoo?”

Malamang na hindi kaagad dumating ang iyong patotoo. Lalago ito sa bawat espirituwal na karanasan—gaya ng nakasaad sa mga banal na kasulatan, “taludtod sa taludtod, tuntunin sa tuntunin” (2 Nephi 28:30). Pagkatapos ay kailangan mong pangalagaan at palakasin ang iyong patotoo, tulad ng binhing lumalago (tingnan sa Alma 32:28–43). At gaya ng isang halaman na hindi mabubuhay sa tubig lamang, walang iisang “pinakamainam” na paraan upang palakasin ang inyong patotoo. Kailangan mo ng kombinasyon ng mga paraan.

Ang panalangin at pag-aaral ng mga banal na kasulatan ay tunay na mabubuting paraan para mapangalagaan ang iyong patotoo. Habang pinag-aaralan mo ang ebanghelyo at nananalangin nang may tunay na layunin para malaman kung totoo ang isang bagay, tutulungan ka ng Espiritu Santo na madama ang katotohanan ng ebanghelyo (tingnan sa Moroni 10:4–5).

Mapalalakas mo rin ang iyong patotoo sa pamamagitan ng pagsunod sa mga kautusan. Kapag ipinamumuhay mo ang isang alituntunin ng ebanghelyo—gaya ng pag-aayuno, pagpapanatiling banal sa araw ng Sabbath, o pagtanggap ng sakramento—nagsisimula kang magkaroon ng patotoo kung paano at bakit ito totoo, sa halip na basta ito ay totoo. Sinabi ni Jesus na kapag pinili mong “gawin ang kanyang kalooban,” iyong “makikilala ang doktrina [o mga turo]” (Juan 7:17).

Ang isa pang paraan para mapangalagaan mo ang iyong patotoo ay sa pamamagitan ng pagbabahagi nito. Sinabi ni Pangulong Boyd K. Packer (1924–2015), Pangulo ng Korum ng Labindalawang Apostol na, “Ang patotoo ay matatagpuan sa pagbabahagi nito!” (“The Candle of the Lord,” Ensign, Ene. 1983, 54; Tambuli, Hulyo 1983, 34). Maibabahagi mo ang iyong patotoo sa simbahan at sa seminary, sa tahanan, at sa mga kaibigan. Kapag ginagawa mo ito, maaaring magpatotoo ang Espiritu Santo sa iyo na ang ibinabahagi mo ay totoo.

Habang pinalalakas mo ang iyong patotoo sa maraming paraan, ito ay lalago at lalalim, at makadarama ka ng kapayapaan at kagalakan.

Sumama sa mga Missionary

Ang gawaing misyonero ang pinakamabisang paraan para mapalakas ko ang aking patotoo. Sa tuwing sumasama ako sa mga missionary, nadarama ko ang pagmamahal ni Cristo.

Joy D., edad 19, Leyte, Philippines

Sikaping Maging Disipulo

Mapalalakas mo ang iyong patotoo sa pagsisikap na maging palaging tunay na disipulo ni Jesucristo. Ang pagsunod sa mga kautusan ng Diyos ay nagpapatatag sa atin sa ating patotoo, at dahil dito ang ating patotoo ay lalong lumalakas at nagiging handa para sa kaharian ng Diyos (tingnan sa D at T 76:79). Maaari mo ring palakasin ang iyong patotoo sa pamamagitan ng pagbabahagi nito.

Elder Mule Simon, edad 23, Democratic Republic of the Congo Lubumbashi Mission

Magmisyon

Ang pagmimisyon ay magpapalakas sa iyong patotoo at sa patotoo ng ibang tinuturuan mo. Sa misyon matututo kang umasa nang lubusan sa Panginoon at hindi sa sarili mong lakas. Ang misyon ay magpapalakas sa iyo, at habang pinaglilingkuran mo ang Panginoon at ginagawa ang Kanyang gawain, palalakasin nito ang iyong patotoo.

Elder Bailey Peaali’I Williams, edad 19, Singapore Mission

Ibahagi ang Alam Mong Totoo

Natutunan ko na ang isa sa mga pinakamagandang paraan para mapalakas ang aking patotoo ay ang pagbabahagi nito sa iba. Sa tuwing ibabahagi ko ang pinaniniwalaan ko at alam kong totoo ito—gaano man ito kasimple o kaliit—nakadarama ako ng pag-aalab sa aking dibdib, at dumarating ito nang may mas malakas na pagpapatibay sa aking puso na ang mga bagay na sinabi ko ay totoo! Sa madaling salita, nadarama kong pinalalakas ang aking patotoo.

Douglas S., edad 20, São Paulo, Brazil

Makinig sa Espiritu Santo

Ang pagsisimba, pagbabasa ng mga banal na kasulatan, pakikinig sa mga mensahe ng kumperensya, at marami pang iba ay makatutulong lamang sa pagpapalakas ng iyong patotoo kung makikinig ka sa Espiritu Santo. Patutunayan Niya sa iyo ang katotohanan. Palaging pakinggan ang Espiritu Santo, dahil nariyan Siya at tutulong para palakasin ang iyong patotoo.

Alyssa B., edad 16, Virginia, USA

Maging Higit na Katulad ni Cristo

Mapapalakas natin ang ating patotoo sa pagiging higit na katulad ni Cristo. Napalakas ko ang aking patotoo nang ipahayag ko ang dalisay na pag-ibig ni Cristo at naglingkod sa iba tulad ng ginawa ng Tagapagligtas.

Kyung Jin P., edad 17, Seoul, South Korea

Ibahagi ang Iyong Patotoo

Ang isang mabuting paraan upang mapalakas ang iyong patotoo ay ibahagi ito. Kung minsan kapag ibinabahagi mo ang iyong patotoo, natatagpuan mo ito. Maaari ka ring mag-ayuno para malaman mo mismo kung totoo ang itinuturo sa iyo. Pareho ko nang nagawa ang mga ito, at talagang napalakas nito ang aking patotoo.

Porter S., edad 12, Idaho, USA

Paglingkuran ang Iba

Bukod sa panalangin at pag-aaral ng mga banal na kasulatan, palagay ko ang pinakamainam na paraan para mapalakas ang iyong patotoo ay sa pamamagitan ng paglilingkod. Kapag naglilingkod tayo sa iba, ipinakikita natin sa Diyos na may malasakit tayo sa Kanyang mga anak. At matatanggap din natin ang Espiritu kapag ginagawa natin ang gawain ng Diyos. Alam ko na maraming beses na akong nakatanggap ng kapanatagan sa mahihirap na panahon at mga sagot sa mga tanong habang naglilingkod ako.

Caroline J., edad 18, Utah, USA

Ang mga sagot ay nilayong makatulong at magbigay ng pananaw, hindi bilang mga opisyal na pahayag ng doktrina ng Simbahan.

Pangangalaga sa Iyong Patotoo

Pangulong Henry B. Eyring

“Gaya ng lumalagong halaman, [ang patotoo ay] kailangang alagaan dahil kung hindi ito ay malalanta. … Ang pagsunod sa mga kautusan ay bahagi ng pangangalagang kailangan ninyo sa inyong patotoo.”

Pangulong Henry B. Eyring, Unang Tagapayo sa Unang Panguluhan, “Isang Buhay na Patotoo,” Liahona, Mayo 2011, 125.

Susunod na Tanong

Paano ko maaanyayahan ang Espiritu sa aking tahanan samantalang nag-aaway at nagtatalo ang mga tao roon?

Ipadala ang iyong sagot at, kung nais mo, isang high-resolution na larawan bago sumapit ang Nobyembre 15, 2017, sa liahona.lds.org (i-klik ang “Submit an Article”) o sa pamamagitan ng e-mail sa [e-mail].

Isama lamang ang mga sumusunod na impormasyon: (1) buong pangalan, (2) kapanganakan, (3) ward o branch, (4) stake o district, (5) nakasulat na pahintulot mo, at, kung wala ka pang 18 taong gulang, ang nakasulat na pahintulot ng iyong magulang (tinatanggap ang email) na ilathala ang iyong sagot at larawan.

Ang mga sagot ay maaaring i-edit ayon sa haba o paglilinaw.