2017
N̄an kakkobaba ilo jar im ekkatak jeje ko rekwojarjar, ta eo em̧m̧antata bwe in kōkajoorļo̧k naan in kam̧ool eo aō?
October 2017

Kajjitōk ko im Uwaak ko

“N̄an kakkobaba ilo jar im ekkatak jeje ko rekwojarjar, ta eo em̧m̧antata bwe in kōkajoorļo̧k naan in kam̧ool eo aō?”

Naan in kam̧ool eo am̧ emaron̄ jab itok ilo iien en wōt. Enaaj eddōkļo̧k ilo jetōb jidik kōn jidk—āinwōt an jeje ko rekwojarjar ba, “ļain im bar ļain, ijin jidik im ijjuweeo jidik” (2 Nipai 28:30). Innām kwomaron̄ ņa kōņin im kōkajoorļo̧k naan in kam̧ool eo am̧, āinwōt an juon ine eddōk ļo̧k (lale Alma 32:28–43). Im āinwōt juon menin eddōk eban kalle n̄e ewūtidikdik wōt, ejjeļo̧k juon wāween “em̧m̧antata” n̄an kōkajoorļo̧k naan in kam̧ool eo am̧. Kwōj aikuji wāween ko rem̧m̧anļo̧k.

Jar im ekkatak jeje ko rekwojarjar rej lukkuun wāween ko n̄an naajdik naan in kam̧ool eo am̧. Ilo am̧ ekkatak gospel in im jar kōn bōro em̧ool n̄an jeļā men eo em̧ool, Jetōb Kwojarjar enaaj jipan̄ eok en̄jake m̧ool eo an gospel in (lale Moronai 10:4–5).

Komaron̄ bar kōkajoorļo̧k naan in kam̧ool eo am̧ ilo am̧ pokake kien ko. N̄e kwōj mour kake pedped in gospel in—āinwōt jitlo̧k, kōjparok raan in Jabōt im kokwojarjare, ak bōk kwojkwoj eo—kwōj jino bōk juon naan in kam̧ool kōn wāween im etke em̧ool, ijeļo̧kin an baj m̧ool. Jisōs eaar ba bwe n̄e kwōj kālet n̄an “kōm̧anm̧an ankilan,” kwōnaaj “jeļā katak eo” (Jon 7:17).

Bar juon wāween n̄an naajdik naan in kam̧ool eo am̧ ej ilo wāween kwaļo̧k e. Būreejtōn Boyd K. Packer (1924–2015), Būreejtōn eo an Doulul eo an Jon̄oulruo Rijilōk ro, eaar ba, “Juon naan in kam̧ool ej waļo̧k ilo am̧ kwaļo̧k kake!” (“The Candle of the Lord,” Ensign, Jān. 1983, 54; Tambuli, Juļae 1983, 34). Komaron̄ kwaļo̧k naan in kam̧ool eo am ilo m̧ōnjar eo im jemenere, ilo m̧weo, ak ippān ro m̧ōttam̧. N̄e kwōnaaj kōm̧m̧ane, Jetōb Kwojarjar enaaj kam̧ool n̄an eok bwe ta eo kwar kwaļo̧k e em̧ool.

Ilo am̧ kōkajoorļo̧k naan in kam̧ool eo am̧ ilo elōn̄ wāween ko reoktak, enaaj juļ im kajoorļo̧k im kwōnaaj en̄jake ineem̧m̧an im m̧ōņōņō.