Katakin ilo Wāween eo an Rilo̧mo̧o̧r
Juon Eļbōn ilowaan Kūlaaj Ruum̧ eo
Kweilo̧k in ko̧o̧njeļ ko an rūkaki rejjab ukōt wōt wāween ad katakin, rej ukōt wāween ad ekkatak.
Mzwakhe Sitole ej jelm̧ae juon apan̄. Āinwōt būreejtōn eo an Jabōt Jikuuļ ilo juon ward, ewōr juon an eddo letok in Anij n̄an jipan̄ kōkōm̧anm̧anļo̧k wāween ekkatak im katakin gospel ilo ward eo.1
Ak membōr ro an ward eo an ilo Johannesburg, South Africa, ewōr ippāer, ilo jet jekjek, kadkadin mour ko eļap aer oktak im eļap kōtmāne ie. Jet remeļetlet; ro jet rejjab. Elōn̄ rekar katakin bwe juon rijikuuļ ej aikuj in ron̄jake, jab kōnono. Ro jet rej jelm̧ae apan̄ in ilo m̧anit ko aer rej meļeļe bwe jim̧or em̧m̧aan im kōrā ro rej aikuj in bōk koņaer katakin ilo imōnjar eo im ilo m̧weo.
“Ewōr ippād armej ro remaron̄ kōnono kajin ko jet,” Brother Sitole ej ba. “Ak Jetōb eo ekōņaan in im̧we kajjojo armej.”
Ke kweilo̧k in ko̧o̧njeļ an rūkaki ro im Katakin ilo Wāween eo an Rilo̧mo̧o̧r eo kar kwaļo̧k tok kadkadier iiō eo ļo̧k, ward ko im branch ko ilo aolepān Kabun̄ in rekar jino kōm̧m̧an kweilo̧k in ko̧o̧njeļ ko an rūkaki ro n̄an ekōnono, ekkatak kōn, im kamminene ta aorōk in katakin ilo wāween eo an Rilo̧mo̧o̧r eo.
En̄in ej iien eo me Brother Sitole ekar jino lo wāween an kweilo̧k in ko̧o̧njeļ eo an rūkaki ro maron̄ kōjeraam̧m̧an ward eo an. Apan̄ ko ilo m̧anit maron̄ kōnono kaki, bōk koņaan ilo kūlaaj maron̄ ļapļo̧k, im jibadbad ko roktak an membōr ro maron̄ erom̧ kōjeraam̧m̧an ko.
Āinwōt elōn̄ ro jet ipeļaakin laļ in, Brother Sitole ekar kile bwe Irooj ejjab kōjerbal kweilo̧k in ko̧o̧njeļ eo an rūkaki ro n̄an baj ukōt wāween katakin; E kōjerbali n̄an barāinwōt ukōt wāween ad ekkatak.
Juon Būruabōl ewōr juon an Jibadbad
Juon iaan mennin ello ko rem̧m̧an n̄an Brother Sitole ekar āinwōt an rūkaki ro kareel rijikuuļ ro bōk koņaer ilo ekkatak ko aer make, aolep rej jeraam̧m̧an jān ļapļo̧k in n̄an maron̄ loe jibadbad ko roktak maron̄ litok.
Meļeļe jab in ekar itok n̄an Brother Sitole ilo juon iien kweilo̧k in ko̧o̧njeļ eo an rūkaki ro, ke juon uwaan ward eo ekar kwaļo̧k būrabōļ eo an em̧m̧aan ro repilo im eļbōn eo, kōn juon wōt jibadbad. Būrabōļ eo ej kwaļo̧k wāween an em̧m̧aan ro jiljino repilo kōmeļeļeik oktak ko an juon eļbōn (neen ej āinwōt juon joor kōm̧m̧an jān dōkā ak aaen, teeļ eo an ej āinwōt juon to, bo̧tin ej āinwōt tāān̄ in dān, im ko eierļo̧k wōt) kōnke er kajjojo rej kōmeļeļeik kajjojo m̧ōttan eoktak.2
“Ak baj ļōmņak eļbōn eo ej bōk jikin katakin gospel eo,” Brother Sitole ej ba. “Innām jenaaj aikuj in kōmaron̄ an kajjojo uwaan kūlaaj eo kwaļo̧k jibadbad ko aer, bwe ippān doon jen itok n̄an juon wōt meļeļe kōn wāween an gospel eo kōjeraam̧m̧an kōj aolep.”
En̄in ej etke rūkaki ro ilo ward eo an Brother Sitole rej jijet ipeļaakiin juon tebōļ ilo iien kweilo̧k in ko̧o̧njeļ an rūkaki—n̄an jipan̄ ilo ekōnono eo. “Ej kakeememej bwe aolep ewōr jon̄an wōt juon ainikier,” ej ba.
Ekkar n̄an Aikuj ko Aer
Ilo Tokyo, Japan, Natsuko Soejima ekar pere e ke emaron̄ em̧m̧an an katakin. “Ke ikar bōk kūr in n̄an erom̧ juon rūkaki in Jabōt Jikuuļ an jodikdik ro,” ej ba, “Ikar ba n̄an bisop eo bwe inaaj mijak. Ak ekar ba bwe kūr eo ekar jān Anij, kōn menin ikar bōke.”
Āinwōt juon kūrub, kūlaaj eo eaar kakor e kōnke kajjojo apan̄ ko raar kwaļo̧k. Ruo iaan jodikdik ro ewōr aer utame in jaron̄ron̄. Jet iaan membōr in kūlaaj eo rekar em̧m̧akūt tok n̄an Japan jān laļ ko jet remaron̄ kōnono wōt kajin English. Ekar barāinwōt mijak kōn iiō eo eoktak ikōtaan e im ro uwaan kūlaaj eo.
Innām, ilo kweilo̧k in ko̧o̧njeļ eo an rūkaki, Sister Soejima ekar lo juon uwaak. “Kōm kar kōnono kōn iakwe kajjojo ro uwaan kūlaaj eo, katak etāer, jar kōn er juon illo̧k juon, im katakin—tōl jān Jetōb eo—ekkar n̄an aikuj ko aer,” liin ej kōmeļeļeik, “kōn menin en̄in ta eo iaar jino kōm̧m̧ane.” Liin ekar barāinwōt kōm̧m̧ane bar men ko jet ekar katak ilo ko̧o̧njeļ eo: “Ikar kōjerbal naan ko me rej kwaļo̧k aō iakwe.”
Tōprak ko? “Būruwō eaar oktak. Ikar jino en̄jake aō iakwe n̄an rijikuuļ ro aō. Ikar kea kōn ro rekar jako im kar jar kōn er barāinwōt. Iien eo wōt ej jem̧ļo̧k juon katak, ikar bar jino kōpooj katak eo juon, bwe en wōr aō iien ļōmņak kōn wāween ko rem̧m̧an n̄an katakin. Ikar jiōbļo̧k kōn lan̄lōn̄.”
Uwaak ko Rejeno̧lo̧k
Brad Wilson, būreejtōn eo an Jabōt Jikuuļ ilo Minnesota, USA, ej lale bwe rūkaki ro ilo kweilo̧k in ko̧o̧njeļ eo an rūkaki ren jab ro̧o̧l n̄an m̧weo im̧weer m̧ae iien rej kōnono kōn wāween aer naaj oktak kōn wōt ta eo rekar katak.
“Jej ļoor laajrak eo em̧ōj letok ilo Teaching in the Savior’s Way,” Brother Wilson ej ba. “Jej kōnono kōn en̄jake ko an rūkaki ro, innām jej kōnono kōn juon iaan unin kōnono eo kar elmakote. Āinwōt juon eo ej kapidodoik juon jerbal, ij kajjitōk kajjitōk ko im kōkaduduiki ļōmņak ko. Innām jej kōmmālmel kilen kōjerbale. Kōm̧ij jepeļļo̧k n̄an elōn̄ kurub ko reddik im kōnono, ‘Ta eo enaaj oktakļo̧k aō kōm̧m̧ane itok wōt jān kweilo̧k eo am rainin?”
Ron Goodson, juon rūkaki in doulul eo an tikōn ro ilo ejja ward eo wōt, ej ba bwe ekar bwilōn̄ kōn an lo wāween an Brother Wilson “kooje” ko̧o̧njeļ eo. “Kōm kar kōnono kōn wāween an Rilo̧mo̧o̧r eo naaj kar katakin,” ej ba. “Innām ilo am̧ en̄jake Jetōb eo, kwōj ļōmņak, ‘Juon in men ij aikuj in kajjieon̄ kōm̧m̧ane ilo kūlaaj eo aō.’ Kōļmenļo̧kjeņ kōn an Rilo̧mo̧o̧r eo ukōt wāween am̧ katakin. Edikļo̧k an juon men me ‘Ij aikuj kōpooj juon katak,’ im ļapļo̧k kōn, ‘Ta eo tikōn rein rej aikuji im ekōjkan aō maron̄ jipan̄ er men eo?’”
Ļein ej keememej an je jōnōļ eo an, “Ikar pād ilo kweilo̧k in ko̧o̧njeļ eo an rūkaki rainin, im erkein ta ko ij aikuj in kōm̧m̧ani.” Ilo m̧ool, jōnōl eo an eborak kōn noot ko. Ej kiiō m̧aanjabpopo m̧okta: “Jino m̧okta im kwōj bōk im̧we ko aolepān wiik eo.” Ej kajjitōk ippān tikōn ro ta eo ej waļo̧k ilo mour ko aer: “Eļapļo̧k aō wājabdikļo̧k ilo jipan̄ er ilo aō lukkuun jeļā kōn er.” Im ej kajjitōk ippān tikōn ro n̄an jipan̄ katakin: “Ilo aer kōm̧m̧ane menin, rej katak eļapļo̧k barāinwōt.”3
Ikar Etal Wōt Im Al
“Ilo ko̧o̧njeļ eo am, kōm kar kōnono kōn wāween an al maron̄ karuwaineneiktok Jetōb eo,” Jocelynn Herrington, juon rūkaki in Būraimere ej ba ilo ejja ward eo ilo Minnesota. “Tokālik, ikar katakin ilo Sunbeams. Ikar ļōmņak, ‘Inaaj al iien eo rej kōļar, im enaaj em̧m̧an.’ Ikar jino al, im er aolep rekar bōjrak im ron̄jake. Innām ikar etal wōt im al. Ekar karuwaineneiktok Jetōb eo, im ke ekar bōjrak aō al, rekar jab keroro, ak rekar kōttar aō jino kōnono. Kōm kar kōnono kōn men eo [ilo ko̧o̧njeļ eo] barāinwōt, n̄an kwaļo̧k naan in kam̧ool eo am̧ n̄e enej wōr am iien em̧m̧an n̄an kwaļo̧k. Kōn menin, ikar kwaļo̧k aō naan in kam̧ool ilo naan ko me remaron̄ in meļeļe.”
Sister Herrington ej ba bwe ej kam̧oolol rūkaki ro an Būraimere ilo aer kobatok ilo kweilo̧k ko an ko̧o̧njeļ. “Kōm̧ kar kōnono kōn am katakin ro rerūtto,” ej ba, “ak Brother Wilson enaaj ba, ‘Ak katakin jodikdik ro? Ak katakin ajri ro reddik?’ Ej bōktok bwe kōm̧in keememej bwe aolep iiō ko roktak.”
Jān Ko̧o̧njeļ n̄an Ko̧o̧njeļ
Adam Martin, juon būreejtōn an Jabōt Jikuuļ ilo Calgary, Alberta, Canada, ej ba bwe ej kam̧oolol kōn elmakot ko jān ward ko̧o̧njeļ eo. “Būreejtōn eo an Doulul eo an Kōrā ro ak būreejtōn eo an doulul eo an em̧m̧aan ro renaaj ba, ‘Kōm̧ naaj kōņaan bwe rūkaki ro ren pedped wōt ioon men in,’ kōn menin kōmij bōklōn̄ tak men eo ilo [kweilo̧k] in ko̧o̧njeļ eo an rūkaki,” ej ba.
Ke kweilo̧k ko an ko̧o̧njel an rūkaki raar m̧oktata ijjino, rūkaki ro raar jab kanooj jeļā ta eo kōtmene kake, kōn menin eaar leļo̧k kūr ko im kwaļo̧k kadkad in bok in kaminene ko rej pād ilo teaching.lds.org. “Kiiō em̧ōj an ijjino jerbal eo,” ej ba. “Rejeļā bwe ej jikin eo eņ n̄an kōnono kōn ta ko rej waļo̧k.”
Juon iaan kweilo̧k ko rekar kōm̧m̧an pedped ioon an rūkaki ro ļoor Jetōb eo. “Kōm kar kōnono kōn m̧aanjabpopo eo em̧m̧an ak kōm kar jab inepata kōn am katakin aolep men ilo katak eo,” ej ba. “Juon sister ekar ba bwe aolep iien ej en̄jake an aikuj in kōnono kōn aolep aitōm̧ ko ilo laajrak in katak eo an. Komaron̄ loe bwe ekar jab lukkuun aikuj bwe en katakin aolepān katak eo iien eo kōm kar kōnono kōn im̧we kein ilo am̧ tōl juon iien ekōnono.
Pukot Uwaak ko Ippān Doon
Kajjojo jekjek in katakin ej letok iien ko rem̧m̧an, idajon̄jon̄ ko, im kōjeraam̧m̧an ko. En̄in etke ko̧o̧njeļ ko relukkuun wājabdik, kōnke rej kōtļo̧k an rūkaki ro, kōn jipan̄ eo an Jetōb eo, pukot im loe uwaak ko n̄an idajon̄jon̄ ko rejeno̧lo̧k.
Geoffrey Reid, juon stake būreejtōn an Jabōt Jikuuļ ilo Arizona, USA, ej ba kweilo̧k in ko̧o̧njeļ an rūkaki ro em̧m̧an tata an jerbal n̄e rūkaki ro rej meļeļe bwe jibadbad eo aer ej n̄an kapilōk: “Innām rej lale bwe ren maron̄ jipan̄ doon.”
Stake eo, ej ba, ej pedped wōt ioon aer jipan̄ rūkaki ro etal jān aer ļōmņak, “Em̧m̧an ke aō katakin?” n̄an ļōmņak, “Ewi wāween an armej ro bōk ennaan eo?”
Marisa Canova, rūkaki in Būraimere eo ilo stake, ej ba ilo uwaak eo n̄an juon im̧we ekar en̄jake ilo kweilo̧k in ko̧o̧njeļ eo an rūkaki, ej rōjan̄ ro uwaan kūlaaj in Valiant 8 n̄an jar kōn doon. Menin ekar wājabdik, ak emaron̄ jab jerbal ilo ejja wāween in wōt n̄an kūlaaj eo an ro rerūtto. “Jar kōn aolep membōr ro ilo juon kūlaaj in Gospel Doctrine ekilep emaron̄ juon men etarjān jon̄an,” ej ba. “Ilo m̧ool, rūkaki ro rej ba, ‘Ilo am̧ ļōmņak ewi wāween am maron̄ kōjerbale menin n̄an kūlaaj eo am?’ Im kōmij lo uwaak ko ippān doon.
“Ta eo me ij kam̧oolol kōn kweilo̧k in ko̧o̧njeļ ko an rūkaki,” ej ba, “ej bwe rej letok ad iien n̄an kejōkļo̧kjeņ kōn wāween ad kōm̧m̧ane im ta eo jej kōm̧m̧ane. Ejipan̄ n̄e jej bōk jipan̄ im kakkobaba, en̄jake bwe kom̧ij aolep jerbal n̄an bōk ejja kōttōbar eo wōt. Ij barāinwōt kōņaan ukoktak in kōļmenļo̧kjeņ ko me elōn̄ armej rej bōktok n̄an ekōnono eo. Ej jipan̄ eō ļōmņak kōn men ko ilo m̧ool iban kar ļōmņak kaki n̄a make.”
Ilo ad bōk koņaad im kwaļo̧k ippān kweilo̧k in ko̧o̧njeļ eo an rūkaki, visōn eo ad kōn eļbōn eo ņae etan “katakin gospel eo” ej jino alikkar ļo̧k. Āinwōt Brother Sitole ilo Africa, elōn̄ membōr ro ipeļaakin Kabun̄ in rej lo bwe ilo ad maron̄ katakin ilo wāween eo an Rilo̧mo̧o̧r eo ej em̧m̧anļo̧k, ej ukōt jab wōt wāween ad katakin ak barāinwōt wāween ad ekkatak.