Joļo̧k “Mwil eo an Jodikdik in Raan KEIN”
Meļo̧kļo̧k ta eo laļ in ej ba. Elmen an Jemedwōj Ilan̄ kalimjōk eok? Kwōj maron̄ reilo̧k n̄an visōn eo An kōn aorōk eo am̧.
Laļ in elōn̄ men ko ej ba kōn jodikdik ro rainin. Kwomaron̄ jeļā jet men ak kar ron̄ an ro jet elootan kōn “ajri in raan kein.” Ekanooj lōn̄ ekkatak ko im bōnbōn ko kōn kom̧—am̧ alooj, ta eo kwōj wiaiki, ak ewi jon̄an am̧ m̧ad.
Ak Būreejtōn Russell M. Nelson, Būreejtōn eo an Doulul eo an Jon̄oulruo Rijilōk ro, eaar ba “ejjab jejjet” ke ej ron̄ an ro rietale ro kwaļo̧k ekkatak ko aer kōn rūm̧m̧and ded. “Im ilo m̧ool,” eaar ba “ejjab lukkuun itok limou kōn ta in rietale rein rej ba kōn kom̧ jān ta in Irooj ej ba n̄an eō kōn kom̧.”1
Irooj ejjab aikuj etale ko ak wōn kwe bwe en jeļā kajiemi. Ejjab kalimjōk eok āinwōt juon bōnbōn ak āinwōt an ro jet jon̄e wāween an “laļ in” kajjieon̄ kwaļo̧k kadkadimi.
“Ejjab iakwe wōt eok kōn wōn kwe rainin ak barāinwōt kōn aibojooj ilo armej im meram eo am enaaj waļo̧ktok im ikdeleel n̄an oktak” Būreejtōn Dieter F. Uchtdorf, Rikakpilōklōk eo Kein Karuo ilo Būreejtōnji eo Kein Kajuon ekar ba.2
Anij ejjab kalimjōk wōt kwe; Ej iakwe eok.
Kōņaan ke rubwe m̧ōņakjeņ ko an laļ in? Jino kalimjōk eok make ilo wāween an Jemedwōj Ilan̄ im ro karejeraņ me ekar kālet Er kalimjōk eok. Kōņaan ke ekajet armej? Kiiō ej iien n̄an oktak im kōm̧m̧ane! Āinwōt juon eo 12 iiō rettan, Kraist eaar kakeememej ro jinen im jemān ilaļ bwe “ej aikuj kōm̧m̧ane jerbal eo [An] Jemen” (Luk 2:49).
Eaar jab lukkuun dik, im bar kwe. Kōn menin kajjitōk eo juon ej: Elmen am̧ tin kōm̧m̧ane jerbal eo an Jemedwōj Ilan̄?
An “jerbal” ej bōk tok “mour jab wabanban im mour indeeo an armej” (Moses 1:39), bwe kwōn maron̄ in kōm̧m̧ane jerbal eo an Jemedwōj Ilan̄ kwōn kōm̧m̧ane ijo koņam em̧m̧antata n̄an bōk jibadbad eo am̧ im n̄an erom̧ juon eo ej jipan̄ ro jet bōk jibadbad eo aer barāinwōt.
Kiiō ej iien n̄an bōk eddo kōn ilju im jekļaj eo am̧ make. Ta eo kwōmaron̄ kōm̧m̧ane kiiō n̄an lukkuun lale bwe kwōn erom̧ eo Jemedwōj Ilan̄ ekōņaan bwe kwōn erom̧, ejjab wōt ilo mour indeeo ak barāinwōt ilo mour in?
Kwōj kōņaan ke m̧are ilo tampeļ? Kālet kiiō n̄an erreeo ilo kōļmenļo̧kjeņ, naan, im kōm̧m̧an. Kwōj ke lo eok make am̧ ekkatak ilo juon university? Ejaaki kapāāl in ekkatak ko kiiō. Kwōnaaj ke pojak n̄an jerbale juon mijen? Kakkobaba Preach My Gospel n̄an am̧ ekkatak gospel eo (eļaptata jepta 3). Kwōj kōņaan ke kake aikuj an juon baam̧le? Katak kilen kōm̧m̧ani im kōjparok jāān kiiō.
Kwomaron̄ barāinwōt mije men ko me rekam̧ōņōņōik eok kiiō. Em̧m̧an ke ippam̧ bōnbōn? Kōjan̄jan̄ piano? Jeje bwebwenato? Dāpiji wōt! Lale eļan̄n̄e ewōr wāween ko kwōmaron̄ kōkm̧anm̧ani ļo̧k, ilo kūlaaj ko, katak ko ilo online, jie ko, jerbal ko, im ko eierļo̧k wōt.
Rubwe m̧ōņakjeņ eo im kōkm̧anm̧anani ļo̧k men ko! Bōk eddo kōn ilju im jekļaj eo am̧. Ta eo kwōj kōm̧m̧ane n̄an erom̧ em̧m̧antata. Email e kōm̧ bwe kōmin jeļā liahona@ldschurch.org ak likūt jidik ennaan ilo LDS Youth Facebook ak Instagram pages.