Jemedwōj Ilan̄ Ej Kea Kōn Pejnej eo Aō
Buyisile Zuma
KwaZulu-Natal, South Africa
Kōmeļeļe jān Allen Garns
Āinwōt juon m̧am̧a ļalem nejin im ejjeļo̧k pāleen, iaar en̄jake an ļap eddo ko aō n̄an kakke aikuj ko an baam̧le eo aō. Ij jerbal wōt jān m̧weo imō, ak jerbal eo aō ejabwe n̄an kakke aikuj ko an baam̧le eo aō. Iaar kobaļo̧k ilo juon kurup in un̄n̄are peid make bwe in kar maron̄ ekkatak wāween kōkm̧anm̧anļo̧k jekjek eo ipād ie.
Iaar en̄jake im̧we jān juon kurup etan “Starting and Growing My Business” im ikar kālet bwe in kar keke im wia kake pāāk. Ekkā aō keke pāāk n̄an lukwōn bon̄ ālkin aō rool tok jān aō jerbal.
Iaar jerbal juon lukwōn bon̄ kōn jet kein wia ko rej aikuj dedeļo̧k ilo jibbon̄ in raan eo juon im ekar bōjrak an mejin eo jerbal. Ekar lukwōn bon̄, kōn menin ejjeļo̧k rikōm̧m̧an mejin n̄an jipan̄. Mejin eo ekar wōr an kein jerbal jiddik ilo nien make, ak ijjan̄in kar kōmadmōd mejin m̧okta. Ejjeļo̧k aō jeļā ia eo in jino jene.
Innām katak in ilo My Foundation bok eo ņa etan “Exercise Faith in Jesus Christ” eaar jiktok ilo kōlmenļo̧kjeņ eo aō. Ilo tōre eo, iaar jeļā ke ij aikuj likūt aō lōke ilo Irooj. Iaar bukwelōlō im akweļap: “Jemedwōj Ilan̄, jouj im jipan̄ eō kōmadmōd mejin in bwe in maron̄ kōm̧m̧ane aikuj ko an riwia ro aō bwe ren maron̄ bōke n̄e ejibbbon̄. “Jemedwōj Ilan̄, jipan̄ eō!”
Innām juon en̄jake ejeņoļo̧k bwe in bōk jikuru tōraipōr eo jān nien kein jerbal jiddik ko im kōjerbale n̄an iuunļo̧k juon iaan baat ko ilo māājin eo. Iaar kōm̧m̧an āindein, pedped eļap kōn tōmak eo aō. Iaar bōk kūtwō ke ij bar kajjieon̄ kajjoe mejin eo. Ekar jerbal!
Iaar maron̄ tōpar raan eo me kein wia ko rej aikuj kar dedeļo̧k ie. Iaar kile ta eo ej āinwōt n̄e Jemedwōj Ilan̄ im Jisōs Kraist rej āinwōt ro mōtta ilo pejnej eo aō. Ijeļā bwe inaaj jeraam̧m̧an ilo aō kappukōt iien ko rem̧m̧an bwe in mour kōn ta ko iaar ekkatak ilo kurup in un̄n̄are peid make eo.