O Se UigaFaa-Keriso
Saunia e Elder David A. Bednar
O Le Korama a Aposetolo e Toasefululua
Mai se saunoaga na tuuina atu i le Tauaofiaga a Ekalesia i le Iunivesite o Polika Iaga–Idaho i le aso 25 Ianuari, 2003.
O Iesu, o le sa sili ona puapuagatia, ua silisili ona agaalofa ia i tatou uma o e ua sili ona itiiti o tatou mafatiaga.
MALAMALAMA O LE LALOLAGI, SAUNIA E Howard Lyon
Na aoao mai e Elder Neal A. Maxwell (1926–2004) se mataupu faavae na faagaeetia loloto ai au ma ua avea ma taulaiga o le tele o au suesuega, manatunatuga, ma mafaufauga loloto. Sa saunoa o ia, “Semanu e leai se Togiola pe ana le seanoa le uiga o Keriso!”1 Talu ona ou faalogo i lenei faamatalaga tuusao ma le anoa, ua ou taumafai ai lava e aoao atili i ai ma ia malamalama lelei i le upu “uiga.” Sa ou mafaufau loloto foi i le sootaga i le va o le uiga o Keriso ma Lana Togiola—ma aafiaga o lena sootaga mo i tatou taitoatasi i le avea ai ma ni soo.
O le Uiga o le Alii o Iesu Keriso
Atonu o le faailoga sili o le uiga o le mafai lea ona iloa ma tali lelei atu i isi tagata o e o loo feagai ma le luitau po o le faigata tonu lea e sili ona tuusao ma faamalosi le oo mai i o tatou luga. Mo se faataitaiga, ua faaalia le uiga i le mana e iloatino ai le mafatiaga o isi tagata ae o loo tatou mafatia foi i tatou lava; i le tomai e iloa ai le fiaaai o isi pe a tatou fiaaai; ma le mana e aapa atu ai ma faasafua atu galuega alofa mo le tiga faaleagaga o isi pe a tatou i ai i le totonugalemu o o tatou lava faanoanoaga faaleagaga. O le mea lea, o le uiga e faaalia i le vaavaai atu ma le aapa atu i fafo atu ae o le tali masani ma le faalenatura o le manatu o le tagata ia te ia lava ma ona manaoga. Afai o se vaega lea o sea gafatia o le uiga faaletagata, ona avea lea o le Faaola o le lalolagi ma faataitaiga atoatoa o lena uiga e tumau ma e moni le alofa.
Faataitaiga o le Uiga o Keriso
O Le Toasefululua Lenei na Auina Atu e Iesu, saunia e Walter Rane
I le afeafe aupito i luga i le po o le Tausamaaga Mulimuli, o le po tonu lea o le a Ia oo ai i puapuaga e sili le ogaoga e lei tupu lava i lalolagi uma sa foafoaina e Ia, sa fetalai atu ai le Alii e uiga i le Fesoasoani ma le manuia:
“O mea ia ou te fai atu ia te outou manu o tatou o nonofo.
“A o le Fesoasoani, o le Agaga Paia lea, e auina mai e le Tama i lo’u igoa, o ia lava na te aoao ia te outou i mea uma lava, e faamanatu mai foi o ia ia te outou i mea uma ua ou fai atu ai ia te outou.
“Ou te tuuina atu ia te outou le manuia, o lo’u manuia ou te avatu ai ia te outou; ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau” (Ioane 14:25–27).
O le silafiaina o le a matuai aafia patino o Ia lava i le leai uma o le fesoasoani ma le manuia, ma i se taimi lea atonu na popole ma matau ai Lona loto, sa aapa atu ai le Matai ma ofo atu i isi na lava faamanuiaga semanu e mafai ma o le a mafai ona faamalosia ai o Ia.
I le Tatalo maoae o le Faatoga, lea na fofogaina tonu lava a o lei maliu atu Iesu ma Ona soo i le auvai o Ketarono i le Faatoaga o Ketesemane, sa tatalo ai le Matai mo Ona soo ma mo tagata uma “e faatuatua ia te au ona o la latou upu;
“Ina ia tasi i latou uma; faapei o oe, le Tama, o i totonu ia te au. …
“… Ina ia faaatoatoaina i latou ia tasi; ina ia iloa ai foi e le lalolagi, ma e auina mai au, ma e alofa mai ia te i latou, faapei ona e alofa mai ia te au. …
“Ua ou faailoa atu foi lou suafa ia i latou, ou te faailoa atu ai foi: ina ia i totonu ia te i latou lou alofa ua e alofa mai ai ia te au, o au foi i totonu ia i latou” (Ioane 17:20, 21, 23, 26).
Sa ou fesili faafia au lava i fesili nei ao ou mafaufau loloto i lenei mea ma isi mea na tutupu ao latalata atu i le taimi o Ona mafatiaga ma Lona faalataina: Na mafai faapefea ona vave tatalo o Ia mo le manuia ma le lotogatasi o isi e muamua atu i Ona Ia lava tiga? O le a le mea na mafai ai ona Ia sailia le fesoasoani ma le filemu mo i latou o o latou manaoga sa matuai itiiti atu nai lo Ona manaoga? A o fetaomi atu i Ona luga le natura pau o le lalolagi na Ia foafoaina, na mafai faapefea ona Ia matuai uai atoatoa atu ma le faapitoa tele i luga o tulaga ma atugaluga o isi? Na mafai faapefea e le Matai ona aapa i tua atu ae o se tagata e maualalo atu semanu e manatu ia te ia lava? Ua tuuina mai i se faamatalaga a Elder Maxwell le tali i fesili mamana taitasi nei:
“O uiga o Iesu na alagatatau ai ona tuuina mai le lagolagosua na manaomia e faatino ai Lana togiola ofoofogia. Ana leai le uiga tulaga ese o Iesu, po ua le mafai ona i ai se togiola tulaga ese. O Lona uiga ua faapea ona Ia ‘[mafatia i] faaosoosoga o ituaiga eseese uma’ (Alema 7:11), ae sa ‘le gauai atu’ o Ia i faaosoosoga (MF&F 20:22).”2
O Iesu, o le sa sili ona puapuagatia, ua silisili ona agaalofa ia i tatou uma o e ua sili ona itiiti o tatou mafatiaga. E moni lava, o le ogaoga o mafatiaga ma le agaalofa e mafana tele le fesootaiga ma le loloto o le alofa na lagonaina e le tagata e faia le auaunaga.
Sailia Malosi o le Alofa Mama
E mafai ona tatou saili i le olaga nei ia faamanuiaina i le, ma atinae elemene e tatau ai o se uiga faaKeriso. E moni, e mafai e i tatou o tagata soifua ona taumafai i le amiotonu e maua meaalofa faaleagaga e o faatasi ma le gafatia e aapa atu ai i tua atu ma tali lelei atu i isi tagata o e o loo feagai ma le luitau po o le faigata tonu lea e sili ona tuusao ma faamalosi le oo mai i o tatou luga. E le mafai ona tatou maua se na gafatia e ala i le na o le finafinau po o le naunautai patino. Nai lo o lena, tatou te faalagolago i luga ma manaomia “galuega, ma le alofa mutimutivale, ma le alofa tunoa o le Mesia Paia” (2 Nifae 2:8). Ae o “lea fuaitau i luga o lea fuaitau, ma lea mataupu i luga o lea mataupu” (2 Nifae 28:30) ma “i le aluga o [le] taimi” (Mose 7:21), ona mafai lea ona tatou aapa i tua atu ao lilifa atu lo tatou tulaga faaletino i le liliu mai i totonu.
Sei ou fautua atu e faapea, e ao ia te oe ma au ona tatalo, faanaunau, taumafai, ma galulue e atiae se uiga faaKeriso pe afai tatou te faamoemoe e maua le meaalofa faaleagaga o le alofa mama—o le alofa mama lea o Keriso. O le alofa mama e le o se amioga po o se uiga tatou te maua faapitoa e ala i le faaalia o lo tatou lava filiga ma le naunautai. E moni, e tatau ona tatou faamamalu i a tatou feagaiga ma ola agavaa ma fai mea uma tatou te mafaia e agavaa ai mo le meaalofa; ae e iu ina maua i tatou e le meaalofa o le alofa mama—tatou te le mauaina (tagai i le Moronae 7:47). O le Alii e fuafuaina pe afai, ma po o afea foi tatou te maua ai meaalofa faaleagaga uma, ae e ao ona tatou faia mea uma i lo tatou malosi ia mananao ai, moomoo, valaaulia, ma agavaa ai mo meaalofa faapena. A o faateleina lo tatou galulue i se agaga e talitutusa ma le uiga o Keriso, ona atonu lea o loo tatou faailoa atu i le lagi i se auala sili ona mamana lo tatou naunau mo le meaalofa paia faaleagaga o le alofa mama. Ma e manino lava e faamanuiaina i tatou i lenei meaalofa ofoofogia pe a faateleina lo tatou aapa i tua atu ae o le tagata natura o i totonu ia i tatou o le a masani lava ona liliu mai i totonu.
O Iesu o le Keriso o le Alo e Toatasi na Fanaua e le Tama Faavavau. Ou te iloa o loo soifua o Ia. Ma ou te molimau atu, o Lona uiga ua mafai ai ona tatou maua avanoa mo le tino ola pea ma le ola e faavavau. Tau ina ia tatou aapa atu i fafo e ui ina lilifa atu lo tatou tulaga faaletino i le liliu mai i totonu.