Fesoasoani Atu e Tasi le Penitala i le Taimi
Sa amata muamua lava ina ua faatulaga e le matou siteki se galuega fesoasoani e fesoasoani ai i tagata sulufai. Sa ou fiafia lava i le galuega fesoasoani, o lea na ou fai atu ai i lou tina e faamatala atu i lou faiaoga e uiga i ai, ma sa manao loa lou faiaoga e fai faatasi se mea ma le vasega fa. Ina ia faia se faataitaiga mo le galuega fesoasoani, sa ma o atu ai ma lou tuafafine o Mati i lea aiga ma lea aiga e talosagaina ni foai.
Na oo mai le aso e faaali atu ai le galuega fesoasoani i tamaiti uma o le vasega fa. Sa ou lagona sina fefe laitiiti. O le mea moni, sa matuai ou palaai lava, ae sa ou faia lava le mea sili na ou mafaia. Sa ou tau atu i isi tamaiti uma o le vasega fa, sa matou manaomia ni taga meaaoga mo tagata sulufai. Sa ou faamatala atu e uiga i le ma o i lea aiga ma lea aiga, ma tuu atu ia i latou se lui e taumafai ia sili atu i latou nai lo au i le mauaina o ni tupe. E silia ma le 100 ni taga [meaaoga] na matou faia faatasi. Sa matou tuuina i ai ni tamai api, penitala, ma isi sapalai o meaaoga. Sa matou faaopoopo foi i ai ma se faamatalaga puupuu e faapea, “Susu mai i Siamani.”
Sa ma aveina atu ma lou tina ia taga i le tolauapiga o tagata sulufai. Ou te le faapea atu sa manaia le tolauapiga, ae sa i ai se malae taalo, ma se vaega e aoao ai mataupu faaleatamai. Sa i ai se nofoaafi i talane o le tolauapiga lea sa matuai pao lava, ma sa fai mai tamaiti ia te au, sa pei lava o le pao o le felelei o vaalele tau i Syria ma isi nofoaga faapena. Atonu sa pei o le pao o pomu i tamaiti o e na faalogo i ai i o latou atunuu moni.
Sa ou feiloai i nisi o tamaiti i le tolauapiga matou te tupulaga, e aofia ai Tanielu, o se tagata taalo lelei i le mu. Ou te lei maua se avanoa ma te mu ai ma ia, lea sa le manaia, ona ou te fiafia foi i le mu, ae sa latou valaaulia au e taalo fisipolo [foosball] ma le ping-pong. Sa fai mai tama ia te au, na latou misia o latou aiga ma sa mananao lava e o ese mai le tolauapiga ae toe o i le aoga.
Ina ua uma ona matou taaalo fisipolo ma le ping-pong, sa ma tufatufaina atu loa taga [meaaoga]. Ua ou lagona le fiafia ona ua mafai ona ou faia se mea agalelei mo tamaiti o loo nonofo i tolauapiga.