O Le Malaga a Sieni
E alala le tusitala i Texas, ISA.
Niu Ioka, ISA, 1843
Sa vaavaai atu Sieni Manning i le tafetafea ese atu o le vaa mai le uafu e agai atu i le Vaituloto o Erie. Sa ia lagonaina le pei na tafetafea ese atu ai ma ana moemitiga.
Na faatoa tasi le tausaga ua tea talu ona auai o ia i Le Ekalesia a Iesu Keriso o le Au Paia o Aso e Gata Ai, ma na filifili ai e mei atu ina ia faatasi ma isi Au Paia i Navu. Sa latou malaga atu ma lona tina ma le toafitu o isi tagata o lona aiga i le Alavai i Erie e agai atu i Pafalo, Niu Ioka. Ae peitai, i Pafalo, sa le faatagaina ai i latou i luga o le vaa ona o le lanu o o latou pa’u.
“O le a le tatou mea o le a fai nei?” sa fesili lemu ane ai lona tuagane o Isaako.
Sa toe lagona siuleo o le fesili i le ea malulu. O Navu sa 800 maila (1,287 km) lona mamao. Sa mafai lava ona togi o latou solo ma toe foi i le fale, pe taumafai foi e malaga i se taimi mulimuli ane. …
Ae sa le mafai ona faatali Sieni! Sa ia iloa na moni le Tusi a Mamona. Na toe fetalai mai le Atua e ala i perofeta. Na manaomia ona latou oo atu ma lona aiga i Navu.
Sa faasasao e Sieni ona tauau ma tilotilo atu i sisifo. “Tatou savavali.”
Ma sa latou savavali. Seia oo ina masaesae o latou seevae. Seia oo ina mavetevete ma tafetotoi o latou vae, ma sa tatau ona latou tatalo ina ia faamaloloina. O nisi taimi sa latou momoe ai i fafo, ma sa matuai mafiafia lava le sau malulu ma sa pei o le toulu o le kiona. Sa faamatau atu nisi o tagata e faafalepuipui i latou, ona na manatu o i latou o ni tagata pologa na sosola. Latou te lei iloa o le au aiga o Manning sa o se aiga uli saoloto. Ma sa latou savavali pea, ma pepese i viiga e faapasi ai le taimi.
Sa latou latalata atu i Navu ae latou tau atu loa i se vaitafe.
“E leai se auala laupapa,” sa fai mai ai Isaako.
Sa luelue le ulu o Sieni. “Ia, o lona uiga o le a tatou asa atu ai.” Ina ua laa o ia i totonu o le vai, sa oo le vai i ona tapuvae. Sa faasolosolo malie atu pea o ia i luma. Sa oo le vai i ona tulivae ma sa tea ma ona puimanava. E oo ane i le taimi na oo atu ai i le ogatotonu o le vaifate, ua tau le vai i lona ua! O le mea na laki ai, sa lei toe sili atu se loloto o le vai, ma sa sopoia saogalemu uma le auaiga o Manning.
Ma na faapea ona latou taunuu atu ai i Navu. Sa mafai ona iloa atu e Sieni ia puipui maaele matagofie o le Malumalu o Navu i luga o se maupuepue e iloa atoa atu ai le vanu. E ui lava ina sa lei uma i lena taimi, ae sa maofa tele ai o ia. Sa taitai atu i latou e se tasi i le maota sa nofo ai le Perofeta o Iosefa.
Sa tu mai se tamaitai umi, lauulu uliuli i le faitotoa. “Susu mai i totonu, susu mai i totonu!” sa ia valaau mai ai. “O a’u o Ema Samita.”
O nai isi minute na sosoo ai, sa nenefu. Sa feiloai atu Sieni i le Perofeta, ma sa ia faatulagaina ni nofoa faataamilo i le potu mo le auaiga uma o Manning. Sa saofai ifo ma le faafetai Sieni i le nofoa ma faalogologo atu a o faailoa atu i latou e Iosefa i tagata uma sa i ai iina, e aofia ai lana uo o Dr. Bernhisel. Ona faliu ane lea o Iosefa ia Sieni, “O oe lea sa taitaia si vaega toaitiiti lenei a ea?” sa ia fesili atu ai.
“O lea lava, lau susuga!” na tali atu ai Sieni.
Sa ataata Iosefa. “Ia faamanuia oe e le Atua! Ou te fia faalogo la i le tala i a outou malaga.”
Sa faamatala atu Sieni e uiga i o latou vae na faamanualia ma le momoe i le kiona ma le sopoiaina o le vaitafe. Sa faalologo ma le filemu tagata uma. “Ae sa lei leaga,” sa ia faamaeaina ai. “Sa matou o i le ala ma le olioli, ma pepese i viiga ma faafetai i le Atua mo Lona agalelei e le uma ma le alofa mutimutivale ia i matou i le faamanuiaina o i matou, puipuia o i matou, ma le faamaloloina o o matou vae.”
Sa faapea ona leai se pisa mo sina taimi. “O le a sou manatu i lena mea, Fomai?” Sa iu ina fai atu Iosefa, ma po le tulivae o le alii [fomai]. “Pe le o le faatuatua ea lena?”
“Ana faapea o au, tafefe ua ou toe solomuli ma toe foi atu i lo’u aiga!” O le tautino mai lea a Dr. Bernhisel.
Sa luelue le ulu o Iosefa ma toe liliu atu ia Sieni ma lona aiga: “Ia faamanuia outou e le Atua. Ua outou i ai faatasi ma ni uo.”