E Popole le Tama Faalelagi i La’u Pisinisi
Buyisile Zuma
KwaZulu-Natal, Aferika i Saute
Ata na tusia e Allen Garns
I le avea ai ma se tina nofofua ma se fanau e toalima, sa ou lagonaina ai le mamafa o le tiutetauave o le tausiga o lo’u aiga. Ou te faigaluega o se teufale i fale o aiga, ma e le lava [tupe] mai la’u galuega e tausi ai lo’u aiga. Sa ou auai i se vaega o le ola faalagolago o le tagata ia te ia lava, ina ia mafai ona ou aoao ai i auala e faaleleia ai lo’u tulaga.
Sa musuia au e le vaega “Amataina ma le Faaolaina o La’u Pisinisi” ma ou filifili ai o le a ou suiina ma faatau atu ni taga e ufiufi ai ulo e kuka umi ai meaai. Ou te suiina lava ia taga seia oo i le leva o le po pe a ou foi mai i la’u galuega ao.
Sa ou faigaluega i le leva o se tasi o po i se oka tele sa tatau ona uma i le taeao na sosoo ai, ae pe loa ma la’u laau suisui. Sa tuneva le po, ma sa leai ni fai masini na avanoa e fesoasoani mai. Sa aumai faatasi le masini ma lona tamaipusa o meafaigaluega, peitai ou te lei faia muamua lava se masini. Sa matuai ou le iloa po o fea e amata ai.
Ona ou manatuaina lea o le lesona i le tusi lesona O Lo’u Faavae na faaautuina “Faatinoina o le Faatuatua ia Iesu Keriso.” I lena taimi, sa ou iloaina sa manaomia ona tuu lo’u faatuatuaga i le Alii. Sa ou pau ifo i ou tulivae ma augani atu: “Le Tama Faalelagi, faamolemole fesoasoani mai ia te au e faaleleia lenei masini, ina ia mafai ona ou faamaeaina le oka mo au tagata faatau e piki i le taeao. “Le Tama Faalelagi, faamolemole fesoasoani mai ia te au!”
Sa faapea ona ou maua se uunaiga manino e aumai le vili faovilivili mai le tamaipusa o meafaigaluega ma faaaoga e oomi ai i totonu se vaega faapitoa o le laau suisui. Sa ou faia faapea, ma le faalagolago atoa i lo’u faatuatua. Sa taofi la’u manava ao ou toe kiina le laau suisui. Sa ola!
Ma sa mafai ona ou ausia le aso na faagata ai le oka. Sa ou iloaina le faapeī o le i ai o le Tama Faalelagi ma Iesu Keriso o ni paaga faipisinisi. Ou te iloa o le a faaauau ona faamanuiaina au a o ou saili mo avanoa e faaaoga ai mea ua ou aoaoina i le vaega o le ola faalagolago o le tagata ia te ia lava.