“Ia Tatou Ola Faalagolago Ia i Tatou Lava ma Ia Tutoatasi”
A o talia ma mulimuli le Au Paia o Aso e Gata Ai i le lalolagi atoa i mataupu ma aoaoga faavae a le Ekalesia i le taimua i le ola-tutoatasi, ua latou selesele i faamanuiaga o le “faamoemoega sili atu, toafilemu, ma le alualu i luma.”
A o lei avea o ia ma se tagata o le Ekalesia, sa faaalu e Pita le tele o lona soifua tagata matua e tulitulimatagau ai le manuia i mea tautupe. Sa foliga i le vaai mai i fafo, sa pei lava na ia mauaina. Aua, sa ia anaina ma faagaoioia ni nai pisinisi.
Ina ua talosagaina e se taitai o le Ekalesia i le lotoifale i Midlands i Sisifo, Egelani, ia Pita e auai i se vaega mo le taulimaina o mea tautupe patino na ofoina atu e ala i le taulamua a le Ekalesia mo le ola tutoatasi, sa le talitonu o ia o le a aoao atu e le kosi se mea ia te ia. Ae peitai, o le taimi lava na amata auai ai Pita i le vaega, sa vave ona ia iloaina na tele lava mea na tatau ona ia aoaoina.
“O le kosi e le na o mea tautupe e faatatau i ai; ua na o le afa lena o le tala,” o lana faamatalaga lea. “O le mea aupito taua ia te au o le aoao lea e faatuatua i le Tama Faalelagi—i le ala e tuuina mai ai e Ia ia i tatou uma faamanuiaga faaletino ma tatala faitotoa i le ola tutoatasi moni, pe afai tatou te mulimuli i Lana taitaiga faaleagaga.”
I le avea ai ma se sui o se vaega o mea tautupe patino, na aoao ai e Pita tomai moni e pei o le mataituina o tupe faaalu a le aiga, faia ma le ola i se paketi, faaitiitia o aitalafu, ma le sefe mo le lumanai. O le faaaogaina o nei tomai, faapea ma le faaalia o le faatuatua ia Iesu Keriso ma le galue malosi, na toe totogiina ai e Pita ma lona faletua se aitalafu tele.
“Ua ou faalogoina se lagona māmā tele ma saoloto atu e aunoa ma le matau lea e o mai faatasi ma aitalafu ma le le fuafuaina tatau o mea tautupe,” o lana tala lea. “Ua ou lagonaina le tele o faamanuiaga a le Tama Faalelagi i se auala ou te lei lagonaina muamua lava. Ua ou aoaoina le ala e talosagaina ai o Ia ma faalogo atu i Ana tali pe a ou manaomia le fesoasoani i au pisinisi faaletino.”
Taimua o le Ola Tutoatasi
O le ola tutoatasi e sili atu nai lo na o le i ai o se galuega lelei, teuina o taumafa, po o tupe i le faletupe. Nai lo o lena, o “le tomai, tautinoga, ma le taumafaiga e saunia mea faaleagaga ma faaletino e manaomia o le olaga mo le tagata lava ia ma le aiga. A ola-tutoatasi tagata o le [Ekalesia], o le a sili atu ona lelei lo latou auauna atu ma tausia isi”1 a o latou faamuamua le galue o se mataupu faavae taiala i o latou olaga.
Ua aoao mai Peresitene Thomas S. Monson: “O le ola-tutoatasi o se taunuuga lea o a tatou galuega, ma e lagolago ai isi gaoioiga uma faaleuelefea. O se elemene taua i lo tatou soifua manuia faaleagaga faapea foi ma le faaletino. … ‘Ia tatou galulue mo mea tatou te manaomia. Ia tatou ola faalagolago ia i tatou lava ma ia tutoatasi. E leai lava se isi mataupu faavae e mafai ona maua ai le faaolataga. O le faaolataga o se mataupu patino i le tagata lava ia, ma e tatau ona tatou galueaiina lo tatou lava faaolataga i mea faaletino faapea foi ma mea faaleagaga.’”2
I lalo o le taitiaga a taitai perisitua i le lotoifale, e silia ma le 500,000 le Au Paia o Aso e Gata Ai i le silia ma le 100 atunuu ua auai i le taimua o le ola-tutoatasi talu mai le 2014. Ua faalauiloa atu nei e le Ekalesia le taimua i Amerika i Matu atoa.
O le taimua ua aofia ai kosi ma punaoa “e fesoasoani i tagata o le Ekalesia ia aoao ai ma faatino mataupu faavae o le faatuatua, aoga, galue malosi, ma faalagolago i le Alii. O le taliaina ma ola ai i nei mataupu faavae,” ua saunoa mai le Au Peresitene Sili, “o le a mafai ai ona [tatou] maua faamanuiaga faaletino na folafola mai e le Alii.”3
Fiafia ma Faamoemoe [o le a Manuia]
Na leai se faamoemoe o Maria Edilene Romão. Sa ona le maua se galuega, o ia o se tina nofotoatasi, ma sa i ai sana fanau e tausi.
O le taimi lena na valaaulia ai o ia e ni tagata se toalua o lana uarota i Santa Catarina, Pasila, i se faigalotu a le ola tutoatasi. Ina ua uma le faigalotu, sa faapea ona auai loa Maria i se vaega e fesoasoani i le sueina o sana galuega.
“O le taimi muamua lea o lou olaga, na ou talitionu ai i se lumanai lea e mafai ai ona ou tausia ai lou aiga,” o lana tala mai lea. “Sa ou talitonu o le a fesoasoani mai le vaega o le ola tutoatasi ia suia lou olaga.”
Sa faapena lava.
I le 12 vaiaso na sosoo ai, sa tuuto atu e Maria o ia lava i lana vaega, i ana suesuega, ma ana tautinoga. Sa galue ma se malosi fou na ia mauaina agai atu i ana sini. Sa ia faataitaia auala o faatalanoaga mo ni galuega. I totonu o le lua vaiaso, sa ia faamautuina ai se faatalanoaga na ono faamanuiaina mo se galuega. O lena faatalanoaga sa ia maua ai se galuega.
“Ua suia e faavavau lou olaga,” o le tala lea a Maria, o le ua le toe tauivi e fafaga lona aiga. “O le taimi nei ua ou fiafia, naunau, onosai, ma faamoemoe o le a manuia mea uma. Ou te talitonu o loo soifua le Tama Faalelagi ma e alofa ia te au. Ou te iloa a faaali atu lou faatuatua ia Iesu Keriso, e faamanuiaina au.
“O Le Meafaigaluega Aupito Lelei”
Na saunoa Elder Robert D. Hales o le Korama a Aposetolo e Toasefululua: “O le faalagolago ia i tatou lava o se auala i se iuga maualuga atu. O la tatou sini laualuga lava o le avea e faapei o le Faaola, ma e faalauteleina lena sini e ala i la tatou auaunaga lē manatu faapito i isi. E faateleina pe faaitiitia lo tatou tomai e auauna atu ai e ala i le maualuga o i ai lo tatou faalagolago ia i tatou lava.”
Na faaopoopo mai Elder Hales, seiloga lava ua tatou faalagolago ia i tatou lava, “ona mafai lea ona tatou faaa’aoa’o i le Faaola i le auauna atu ma faamanuiaina isi.”4
Na iloa e Sergio Galbuchi lena upumoni mo ia lava ina ua amataina sana lava pisinisi a o lei leva ona valaauina o ia e le au peresitene o le siteki e avea ma tagata faapitoa o le siteki mo le ola tutoatasi. O le i ai o le faatuatua, tomai, ma le malamalama na ia mauaina o se sui o le komiti, na tatalaina ai e Sergio ma lona faletua o Silivia, se faleoloa i Buenos Aires lea na faatauina ai “mea taulima ma mea taumafa” a Atenitina.
“Ou te manatu o le ola faalagolago ia i tatou lava, o se auala lea e faaaoga ai le faatuatua,” na fai mai ai Sergio. I se taimi na muamua atu, la te lei maua ai ma Silivia le fiafia i le manuia lea sa la faamoemoe i ai, o lea sa tumau ai ona avea le faatuatua ma totonugalemu o a laua taumafaiga. Peitai, a o la faatalitali mo le manuia i tulaga tautupe, sa la galulue malosi ma faamanuiaina ai tagata faatau i a laua oloa ma a laua taumafaiga faafaifeautalai.
“E toatele ni tagata sa faapea ona ma masani i ai,” o le tala lea a Sergio. “Ma na ma maua le avanoa e foai atu ai kopi o le Tusi a Mamona.”
O le taimi muamua lava, na faailoa atu ai e le komiti o le ola tutoatasi a le siteki ni tagata se toa 10 i le siteki a Sergio o e na manaomia le fesoasoani i le ola tutoatasi. Ae, na auai ai ma epikopo.
“O le taimi nei ua matou iloa e 35 tagata o loo manaomia le fesoasoani,” o le tala lea e Sergio a o faatupulaia le taumafaiga. “Sa valaaulia taitoatasi i latou e o latou epikopo e auai i vaega.”
Sa tuputupu ae lo latou faatuatua, sa latou faia suiga na manaomia, ma sa latou faaaogaina ni tomai fou.
Sa faaopoopo mai Sergio, “Soo se taimi lava matou te talanoa ai ma taitai perisitua, ou te taumafai e faailoa atu ia i latou o le meafaigaluega aupito lelei lenei ua matou mauaina mai le Au Peresitene Sili.” “E sili atu nai lo soo se tupe e mafai ona tuuina atu e fesoasoani ai i se tasi, ma o ona aoaoga e manino atu nai lo o le tele o mea e faaaoga na ou aoaoina i le taimi na avea ai au o se tagata aoga i le iunivesite.”
O le mea aupito taua, o i latou e faamaeaina a latou kosi e 12 vaiaso o le ola tutoatasi e avea ma soo sili atu le lelei o Iesu Keriso, ma iloa ona faaaoga o latou tomai e atinae ai le malo o le Atua.
“O le vaega lenei o le [ola tutoatasi] e le nao a matou pisinisi e taulai atu i ai; e taulai atu foi i a matou mafutaga ma le Atua ma isi,” na fai mai ai Sergio. “E faapea ona avea i matou ma ni soo e sili atu le lelei o Iesu Keriso i le aluga o le tolu masina lea na faaalu i lenei vaega. E moni lava, atonu o le a fesoasoani se pisinisi ia i matou ia atili ola tutoatasi ai, ae o le faamoemoega tupito lava o le, ia auauna atu ai.”
Tuputupu Ae ma le Faatinoga
Na saunoa Peresitene Iosefa F. Samita (1838–1918), “Ua avea ma se aoaoga faavae i taimi uma a le Au Paia o Aso e Gata Ai le, o se tapuaiga e le i ai se mana e laveai ai tagata i le faaletino, ma faia ia latou manuia ma fiafia iinei, e le mafai ona faalagolago i ai e laveai i latou faaleagaga, e faaea i latou i le olaga a sau.”5
E le tatau la ona tatou tetei ai, aua e ala i le malolosi i le faaletino, tatou te malolosi ai foi i le faaleagaga. Na molimauina lava e Elder David ma Sister Theresa Nish, o e na auauna atu o ni faamisiona i le ola tutoatasi i le Atu Solomona, lena sootaga [o le manuia faaletino ma le faaleagaga] i tagata o le Ekalesia iina.
“O le tuputupu ae faaleagaga ma le auai atu i le malumalu na manino lava le faamaonia ai o mataupu faavae, tomai, ma mausa o loo aoaoina i le O Lo’u Faavae ma le faamalamalamaga atoa o loo i le O Lo’u Auala i le Ola Tutoatasi,” o le la tala mai lea e uiga i tamaitusi o le polokalama taulamua. “O loo [la] fesoasoani i tagata ia alualu i luma faaleagaga faapea ma le faaletino, lea e taitai atu ai i le ola tutoatasi faaleagaga ma faaletino.”
Ua faamatala mai e Cheryl Redd, o se taitai faamaopoopo o le ola tutoatasi i Iuta, ISA, le ala ua fesoasoani ai mataupu faavae faaleagaga o le polokalama taimua i lona alualu i luma faaletino: “Ua ou iloaina o nei mataupu faavae ma faiga faavae e mafai ona faatatau i vaega uma o o tatou olaga. O nei mafutaga faaleaoaoga ua fesoasoani ia te au ou te tulimatai atili atu ai i ou tiutetauave o se ava ma se tina. Ua ou maua nei meafaigaluega e malamalama lelei ai i mea tautupe a [lo’u] aiga. Ua ou vaaia le ala, o le galulue faatasi ma o tatou taitoalua e pulea mea tautupe, i se isi itu, o se pisinisi. Tatou te manaomiaina nei meafaigaluega ina ia manuia ai o tatou aiga.”
I le Ekalesia aoao, o lenei vaaiga mamao faateleina, ua faaliliuina i le faamaoni faateleina ma le malosi faaleagaga. O se taunuuga, ua faateleina ai le tautino o le au paia e auai i le lotu, totogi sefuluai, ma tumau le agavaa mo le malumalu.
“Na ta’ina atu i ai lo’u mafaufau,” o le tala lea a se tagata fou o Siaosi Echevarría e uiga i le polokalama taulamua o le ola tutoatasi. Fai mai Siaosi, o le e aveina se taavale laupasese i Peru, na fesoasoani le polokalama taimua ia te ia e maua ai se molimau o le talalelei a o faatumulia o ia i se manao ia alualu i luma o ia lava. O le taimi nei, ua faamoemoe ia avea ma se fai eletise, e faaleleia tamai taavale laiti ia ua tele tausaga o ia aveina.
Fai mai o ia, “E le tatau ona tatou nofonofo ma faatalitali ia tutupu ni mea ia i tatou.” “E tatau ona tatou galulue.”
“O Le A Faamanuiaina Ai Lou Olaga”
Ua selesele e le Au Paia o Aso e Gata Ai i le lalolagi atoa ia faamanuiaga folafolaina a le Alii a o latou aoao ma le filiga, ola, ma faaaoga mataupu faavae o le ola-tutoatasi faaleagaga ma faaletino. E ui e mafai ona manuia ai tagata uma, ae ua faapitoa ona faamanuiaina e le polokalama taimua i latou atonu e leai pe o manaomia foi le faamalolosia i le ola tutoatasi faaletino ma faaleagaga. O le Tupe Faaagaga mo Aoga e lagolagoina le polokalama taimua o le ola tutoatasi e ala i le fesoasoani ia i latou ia faia se fuafuaga mo aoaoga faamasani faaleaoaoga ia faaaoga ai punaoa manaomia.
O loo folafola mai i tusitusiga paia le fesoasoani a le Alii a o tatou galulue agai atu i le ola tutoatasi. Na fetalai mai o Ia, “O lo’u faamoemoe o le faia lea o mea mo la’u au paia” (MF&F 104:15).
O le saunoa ai e uiga i lena faamoemoega, ua tautino mai ai e le Au Peresitene Sili e faapea: “O lenei faaaliga o se folafolaga mai le Alii o le a Ia saunia ni faamanuiaga faaletino ma tatala faitotoa o le ola tutoatasi, o le mafai lea e i tatou ona saunia mea e manaomia o le olaga mo i tatou lava ma tagata o o tatou aiga.”
Pe a tatou suesue, faaaoga, ma aoao atu nei mataupu faavae i tagata o aiga, ua folafola mai e le Au Peresitene Sili, “o le a faamanuiaina ai lou olaga. O le a e aoao pe faapefea ona e faatinoina lou auala e agai atu ai i le ola tutoatasi atili. O le a faamanuiaina oe ma se faamoemoega sili atu, toafilemu, ma le alualu i luma.”6