Reyna I. Aburto
Fesoasoani Lua, Au Peresitene Aoao o le Aualofa
Sa soifua mai Sister Reyna I. Aburto i Managua, Nicaragua, ia Noel Blanco ma Delbi Cardoza i le 1963. “O o’u matua sa galulue malolosi e le aunoa ina ia la saunia mea manaomia mo i matou,” o le tala lea a Sister Aburto. “Sa ou mauaina se taimi sili ona fiafia i lou laitiiti.”
I le faatoa tea o le vaeluapo i le aso 23 Tesema, 1972, ao iva ona tausaga, sa taia ai Managua i se mafuie. “Sa faasaoina a’u ona sa i ai se fasi meafale i tua atu o a’u, peitai sa utia o’u vae.” O le faalogoina o le la fe’eei ma lona tina, na o mai ai tuaoi ma toso mai i laua i fafo mai le fale ua faaleagaina. I mea ua faaleagaina, na latou maua ai le tino o lona tuagane matua i le moega i tafatafa o lona moega. “O meatotino faalelalolagi sa nao ni mea e le tumau, ae o le mea taua o lo matou aiga,” o lana tala lea.
Ina ua 21 ona tausaga, sa malaga mai Sister Aburto ma lona aiga i le Iunaite Setete. A o nofo ai i San Francisco, Kalefonia, sa faafeiloai atu o ia i faifeautalai ma filifili ai e sau i le lotu. “O le taimi lava na ou laa ai i totonu o lena fale, sa ou lagonaina le Agaga. O le konafesi lea a le siteki, ma sa ou lagonaina faapea o savali taitasi uma sa mo a’u,” o lana tala lea. Sa papatisoina o ia i le 1989.
I le taimi lea, sa ia feiloai ai ia Carlos Aburto, ma avea i laua ma ni uo. Sa faaauau pea ona la fetusiai, e oo lava i le taimi ina ua siitia atu Sister Aburto i Orem, Iuta. Sa la faaipoipo i le aso 8 Me, 1993, i le Malumalu o Jordan River Iuta. O i la’ua o ni matua o se fanau e toatolu.
Sa lagolagoina Sister Aburto, i le aso 1 o Aperila, 2017, i le Au Peresitene Aoao o le Aualofa, na galue i le matagaluega o faaliliuga mo le silia ma le 25 tausaga, e aofia ai ma le Novell Inc. ma Lemoine International. Ua la anaina nei ma lona toalua se tamai pisinisi faaliliu. Sa ia aoga i le faaenisia i le Iunivesite a Amerika Tutotonu i Managua, Nicaragua, mo tausaga e fa ma sa maua se tikeri lagolago i le saienisi faakomepiuta mai le Kolisi o le Setete o le Vanu o Iuta i le 1997.
Sa auauna atu Sister Aburto i ni valaauga eseese o le Ekalesia, e aofia ai le avea ma sui o le au faatonu aoao o le Peraimeri mai le 2012 i le 2016.