O Le Avea o le Konafesi ma Vaega o o Tatou Olaga

Mafaufau e faaaoga nisi o gaoioiga nei ma fesili e fai ma vaega amata mo suesuega faaletagata lava ia pe faaleaiga.

Mo Tamaiti

Itulau 86: Na valaaulia i tatou e Peresitene Thomas S. Monson ina ia faitau le Tusi a Mamona i aso uma, ma folafola mai, “O le a faaali atu e le Agaga Paia ia te outou lona moni.” E faaopoopo atu i au lava suesuega, e mafai ona e faia se mausa o le suesueina o le Tusi a Mamona i aso taitasi faatasi ma lou aiga. E mafai ona foi faatino ni vaaiga po o le taalo i taaloga e fesoasoani e manatuaina ai fuaiupu taua ma tala. Alu i le friend.lds.org ma vaavaai i le 2016 Liahona mekasini mo tala o le Tusi a Mamona, siata faitau, ma isi mea.
Itulau 117: Sa faamatalaina e Elder Gary E. Stevenson le auala na faalogo ai lona tama i le Agaga Paia ma faasaoina ai o ia mai se gata uogo. Fesili i ou matua pe mafai ona faia se tou talanoaga faaleaiga i le fesili, E faapefea ona fesoasoani le Agaga Paia ia te oe? Faasoa atu ni taimi sa lapataia ai, faamafanafanaina ai, pe molimau mai ai le Agaga Paia ia te oe. E mafai ona e tusiaina i lalo ma faia se tusi.
Itulau 87: Sa aoao mai Sister Joy D. Jones, e mafai ona e saunia e osia feagaiga paia mulimuli ane e ala i le aoaoina e tausia folafolaga i le taimi nei. Seti se sini ma folafola e mulimuli i ai. Fai atu i se paga e siaki mai oe ma ia mautinoa o loo e tausia lau folafolaga.
Itulau 90: Na faasoa mai e Elder Yoon Hwan Choi ni fautuaga mai lona tama: “Aua e te vaavaai solo, vaai i luga!” O nisi taimi tatou te tosina ai ma galo le taulai atu i le Tama Faalelagi ma Iesu Keriso. O lea ia faamanatu ia te oe lava ina ia vaai i luga! E mafai ona e tautaua se ata o Iesu i totonu o lou potu. Alu i fafo ma vaai i luga i le lagi. Faaalu sina taimi filemu i aso taitasi e mafaufau ai e uiga i le Tama Faalelagi ma Iesu Keriso ma lagonaina le Agaga.

Mo Le Autalavou

Itulau 93 ma le 117: Ua e fesili ia te oe lava: E mafai faapefea ona ou maua pea le Agaga? E mafai faapefea ona ou iloa le siufofoga o le Agaga Paia? E faapefea ona fesoasoani mai le Agaga Paia ia te au? Sa taliina e Elders Ronald A. Rasband ma Gary E. Stevenson fesili nei ma le tele o isi fesili. “Ua ia i tatou le tiutetauave e aoao ina ina iloa Lana uunaiga i o tatou olaga ma tali atu,” o le tala lea a Elder Rasband. E mafai faapefea ona e faia lena tiutetauave?
Itulau 33: Na sii mai ai e Elder Ulisses Soares se vaega o le mau autu o le Mutuale: “Ole atu ma le faatuatua, aua lava nei masalosalo. Aua o lē masalosalo e tusa ia ma le peau o le sami ua sousou i le matagi ma felafoaiina ai” (Iakopo 1:5–6). E faapefea ona e le masalosalo? Amata e ala i le faamalosia o lou faatuatua ia Iesu Keriso. Suesue atili e uiga ia te Ia. Manatua le taimi na e lagonaina ai Lona alofa ma le filemu.
Itulau 86 ma le 9: Na valaaulia i tatou e Peresitene Thomas S. Monson, “Afai e te le o faitauina le Tusi a Mamona i aso taitasi, faamolemole ia fai loa.” Ma sa fesili Sister Carol F. McConkie: “O tatou tuueseina le telefoni, lisi e le muta o mea e fai, ma popolega faalelalolagi? O le tatalo, suesue, ma le usiusitai i le afioga a le Atua e valaaulia ai Lona alofa faamamaina ma faamalolo e oo mai i totonu o o tatou agaga.“ Fuafua se taimi i aso uma e faitau ai le Tusi a Mamona ma tuu se faamanatu i lau api o fuafuaga, po o i lau telefoni.

Mo Talavou Matutua

Itulau 62: O a ni sini o loo ia te oe mo lou olaga? O sini mo lau galuega, aiga, ma e oo lava i taaloga ma mea e fiafia ai e lelei, ae “o tatou sili aupito sili ona faamuamua e tatau ona ogatusa ma le fuafuaga e faavavau a le Tama Faalelagi,” na aoao mai ai Elder M. Russell Ballard. E faapefea ona ogatusa au fuafuaga ma le fuafuaga a le Tama Faalelagi mo oe? E mafai faapefea ona sili atu ona e taulai i le sini o le ola ai e faavavau ma le Tama Faalelagi ma Iesu Keriso?
Itulau 39: I le amataga o lenei tausaga, sa valaaulia ai e Peresitene Russell M. Nelson talavou matutua e “faapaiaina se vaega o [latou] taimi i vaiaso taitasi i le suesueina o mea uma sa fetalai mai ai ma faia e Iesu e pei ona tusia i [tusitusiga paia]” (“Perofeta, Taitaiga, ma le Tulafono Faalelagi” [faigalotu i le lalolagi atoa mo talavou matutua, 8 Ian., 2017], broadcasts.lds.org). Sa ia toe taua lenei valaaulia i le konafesi aoao o se tasi o ana vaega autu e fa i le mauaina o le mana o le Faaola i o tatou olaga. Suesue le lauga a Peresitene Nelson ina ia aoao ai pe mafai faapefea ona e mauaina le “mana ua lava e taulimaina ai avega, faafitauli, ma faaosoosoga o o tatou aso.”
Itulau e 100 ma le 26: Pe e te manao ea i se faafanua o le ala mo lou olaga? Sa aoao mai Elder Dallin H. Oaks, “Ona ua i ai ia i tatou le upumoni e uiga i le Aiga Atua ma lo tatou sootaga ia i Latou, o le faamoemoega o le olaga, ma le natura o lo tatou taunuuga e faavavau, ua tatou maua ai le faafanua sili ma le faamautinoaga mo la tatou malaga i le olaga faaletino.” Sa aoaoina uma e i laua ma Elder Weatherford T. Clayton lena malamalama o le fuafuaga o le faaolataga e mafai ona fesoasoani i o tatou luitau o aso nei. Suesue i a laua savali ma ole atu i le Tama Faalelagi pe mafai faapefea ona tuuina mai e upumoni e faavavau se faafanua o le ala i lou olaga.
Itulau 104: E mafai ona faaosofia le fefe, ae na aoao mai Peresitene Dieter F. Uchtdorf “ma o le a le suia ai lava i tatou i tagata e fiafia i le mea sao ma le e manao ia usiusitai i le Tama Faalelagi.” E mafai faapefea e le alofa mama o Keriso ona avea “o le vaifofo tofia mai le lagi” i lou fefe?

Mo Tagata Matutua

Itulau 86: A o tatou suesue ma le agaga tatalo ma mafaufau loloto i le Tusi a Mamona i aso taitasi, sa saunoa mai Peresitene Thomas S. Monson, “o le a tatou i ai i se tulaga e lagona ai le siufofoga o le Agaga, e tetee atu ai i faaosoosoga, e faatoilalo ai le masalosalo ma le fefe, ma maua ai le fesoasoaniga a le lagi i o tatou olaga.” Faaletagata lava ia ma faaleaiga, ia faatu se sini e faitau le Tusi a Mamona i aso uma.
Itulau 39: Ia auai i le lui na tuuina atu e Peresitene Russell M. Nelson i autalavou matutua (tagai i luga “Mo Talavou Matutua”). E mafai faapefea ona e fetuunaia lenei lui ia te oe lava ma i lou aiga? Talanoaina faamanuiaga e oo mai mai le aoao atili e uiga i le Faaola.
Itulau 93 ma le 117: A o e faitauina saunoaga a Elder Ronald A. Rasband ma Elder Gary E. Stevenson, vaavaai mo ni auala ia maua ai pea le Agaga ma le auala e fesoasoani mai ai le Agaga ia te oe. Faailoa mai ni auala e faateleina ai Lana uunaiga i lou olaga.
Itulau 39 ma le 62: Sa uunaia e Peresitene Russell M. Nelson ma Elder M. Russell Ballard tagata o le Ekalesia e suesue i le “ O Le Keriso Soifua: O Le Molimau a le Au Aposetolo” (tagai i totonu o le faavaa pito i luma). Na saunoa mai Elder Ballard, “Tuu se kopi i se mea e mafai ona e iloa atu ai, ma faaalu se taimi e iloilo ai faamatalaga taitasi o loo maua i lenei molimau musuia e uiga ia Keriso.” I le avea ai ma se aiga, faitau le “O Le Keriso Soifua” ma talanoa i mea ua outou aoaoina.
Itulau 127 ma 97: Sa aoao mai Elder Quentin L. Cook, o lo tatou faavae o le faatuatua ua fausia “ona atiae malie—tasi le fola, tasi le aafiaga, tasi le luitau, tasi le faafitauli, ma tasi le faamanuiaina i le taimi e tasi.” Sa saunoa mai Elder L. Clayton, “O le faasa’oina o mausa laiti o le faatuatua i aso taitasi, o se auala lea e tasi e sili ona lelei e faamalosia ai i tatou e faasaga atu i faafitauli o le olaga, po o a lava.“ O le a se mea e mafai ona e faia i aso taitasi e faamalosia ai lou faavae o le faatuatua?