Oloa ma Punaoa Fou

O se aotelega lenei o oloa ma punaoa fou na faaavanoaina atu talu ai nei e le Ekalesia.

Tala o tusitusiga paia ma tusi valivali. Ina ia uunaia le suesueina o tusitusiga paia faaletagata lava ia ma faaleaiga, ua faamatuuina atu nei e le Ekalesia ni punaoa fou o tala o tusitusiga paia, e amata atu i se faasologa o tusi e valivali ua mamanuina mo tamaiti i le vaitausaga 2–8. O loo maua lomiga PDF mauafua i le scripturestories.lds.org, ma e mafai ona oka ni lomiga ua uma ona lolomiina i le store.lds.org ma Faletusi tutotonu.

O tusi valivali o le a faaliliuina i ni gagana lea e maua ai lomiga a le AAG o tusitusiga paia. O le a maua lomiga ua faaliliuina i le faagasologa o le 2017, e amata i gagana Sipaniolo, Potukale, Farani, Iapani, Korea, Saina (masani), Siamani, Rusia, ma Italia.

Tusitusiga Paia. Ua fofogaina atu e le Au Peresitene Sili se faaliliuga fou o le fusitolu o tusitusiga paia i le gagana Farani, o loo maua i le écritures.lds.org ma i le polokalama feaveai o le Potutusi o le Talalelei. E aofia i le faaliliuga se suiga laitiiti o faaupuga i se tasi o tatalo o le faamanatuga. Sa latou fofogaina atu foi o loo maua le fusitolu ua faaliliuina i le gagana Kalaotia i luga o le initoneti. O lomiga ua lolomiina o le fusitolu i le gagana Kalaotia, Rusia, ma Iselani sa faaavanoaina atu foi lata mai nei.

Fesoasoaniga mo aiga o loo fetaiai ma le tosina atu i le itupa e tasi. Ina ia fesoasoani i tagata e tali atu ma le faautauta ma le totoa pe a latou fetaiai ma le tosina atu i le itupa e tasi i o latou lava aiga, ma isi tagata o le Ekalesia, po o isi nofoaga, o punaoa e aofia ai le saite fou mormonandgay.lds.org ma le Autu o le Talalelei ua faafouina i le tosina atu i le itupa e tasi (i le faaPeretania), e aofia ai ma fesili e fesiligia soo ma aoaoga a le Ekalesia.

Ua Faafouina Polokalama o le Potutusi o le Talalelei (Gospel Library App) O le polokalama o loo faaaogaina e tagata i le lalolagi atoa e suesue ai i tusitusiga paia, saunoaga o konafesi, ma isi anomea, na i ai se faafouga tele talu ai nei mo le iOS ma le Android. I le lomiga e 4, o meafaigaluega mo le suesueina ua sili atu ona manino, ua sili atu ona ogatusa ia vaega ma faatinoga, ma ua maua ia vitio fou o aoaoga. Talu ai ua mafai nei ona tusi faamatalaga o anotusi uma, ua mafai ona e faamamafa atu, faaopoopo ni manatu faaalia, fesootai, faailoga, ma faatulaga ia anotusi uma i ni api. Ua mafai ona e tusia faamatalaga o vitio, ulutala o mataupu o le mau ma fesoasoani i suesuega, lisi i tusi lesona eseese, viiga ma pese o le Peraimeri, ma le tele o isi mea.

Ua Faafouina le Polokalama o Meafaigaluega a le AAG O le lomiga 3.2.0 o le polokalama feaveai o Meafaigaluega a le AAG ua faigofie ai ona auai atu i le malumalu. O vaega faaopoopo ua faatagaina ai tagata ina ia vaai i lo latou malumalu ua atofaina, sue le malumalu aupito lata ane e lima, faafesootai se malumalu po o le iloa po o le a le taimi ua fuafuaina e tapuni ai, ma ia faamanatu mai ao lei faamutaina le aoga o a latou pepa faataga.