Elder John C. Pingree Jr.
Fitugafulu o le Pulega Aoao
“O la’u molimau na fausia i le faagasologa o taimi, i lea taimi ma lea taimi, e ala i le mauaina o tali i tatalo, o le lagonaina o le Agaga ao faitauina tusitusiga paia, salamo, ma le auauna atu i le Alii,” o le tala lea a Elder John C. Pingree Jr., o le na lagolagoina i le aso 1 o Aperila, 2017, o se Fitugafulu o le Pulega Aoao.
Sa soifua mai i le 1966, i le Aai o Sate Leki Iuta, ISA, ia Carmen ma John C. Pingree Sr., na te faafetaia le tuuto o ona matua i le fesoasoani e mamanuina lona olaga.
“O le aso na sosoo ai ina ua ou fanau mai, sa tusi ai e lo’u tamā se tusi ia te a’u,” o le tala lea a Elder Pingree. “Sa ia teuina lena tusi, ma mulimuli ane, ina ua ou aluese e auauna atu i se misiona talai, sa ia lafoina mai ia te a’u. Sa i ai i le tusi le tele o itulau o lana molimau ma lesona sa ia manao ia ou aoaoina i le faagasologa o lo’u olaga. A o o’u faitau i ai, sa molimau mai le Agaga ia te au o mea sa ou aoaoina e uiga i le talalelei toefuataiina a Iesu Keriso e ala mai i o’u matua o ni upu moni.”
Sa auauna atu Elder Pingree i le Misiona a Massachusetts Boston, i le gagana Sipaniolo.
Sa ia maua ni tikeri i le gagana Peretania ma le Saienisi Faaupufai mai le Iunivesite o Iuta ma le faailoga o le matuaofaiva o le pulega faapisinisi mai le Aoga Faapisinisi a Harvard. Sa ia faaipoipo atu ia Anne Pugsley ia Mati 1990, ma o i laua o ni matua o se fanau e toalima.
O le tele o lana matata faalegaluega na taulai atu i le fesoasoani atu i isi. Sa avea o ia ma peresitene o se faalapotopotoga o fesoasoaniga faafomai ma se sui peresitene o ni kamupani se lua o le tausiga o le soifua maloloina.
Sa avea o ia ma peresitene o le Misiona a Texas Houston mai le 2011 i le 2014 ma sa ia auauna atu o se Fitugafulu Eria, peresitene o le siteki, epikopo, peresitene o le korama a toeaina, ma se faiaoga o le inisitituti ma le seminare.
“Na fetalai mai le Alii, ‘Afai e te manao i ai, o le a avea oe ma ala o le faia o mea lelei e tele i lenei tupulaga’ (MF&F 11:8),” na saunoa ai Elder Pingree. “Ia te a’u, o loo fetalai mai le Alii, ‘E mafai ona ou faaaogaina oe ia faia se lelei i olaga o isi tagata, pe a e faataga mai a’u.’ Afai tatou te vaavaai atu mo ni avanoa, o le a faaaoga i tatou e le Tama Faalelagi e faamanuia ai se isi tagata.”