“Savali Faatasi ma A’u”

Saunia e Peresitene Henry B. Eyring

Fesoasoani Muamua i le Au Peresitene Sili

President Henry B. Eyring

O lo tatou faauuga i le perisitua o se valaaulia mai le Alii e savavali faatasi ma Ia, ia faia mea Na te faia, ia auauna atu i le ala o auauna atu ai o Ia.

O’u uso pele o le perisitua, o lo’u faamoemoega i le asō o le faamautinoa atu ia te outou ma faamalosiau atu ia te outou i la outou auaunaga faaleperisitua. I se isi itu, e talitutusa lava ma le faamoemoega ou te manatu sa i ai a le Faaola ina ua Ia feiloai i se alii talavou mauoa lea sa fesili atu, “Se a se mea lelei ou te faia ou te maua ai le ola faavavau?” (Mataio 19:16). Atonu na outou o mai i lenei konafesi, e pei ona alu atu lenei alii talavou i le Faaola, mafaufau pe na taliaina la outou auaunaga. Ma i le taimi lava e tasi, atonu o e lagona e tele isi mea e fai—atonu e sili atu! Ou te tatalo ina ia mafai ona ou faailoa atu le faamaoniga alofa a le Alii i mea ua uma ona outou faia, ao ofoina mai foi se vaaiga faamalosiau i mea atonu tou te mafaia, faatasi ai ma Lana fesoasoani, ona ausia o se o umiaina Lana perisitua paia.

Na talosagaina le alii talavou mauoa e faatau atu mea uma sa ia te ia ma avatu i e matitiva ma mulimuli i le Faaola; atonu e le manaomia e lo outou agai i luma i le lumanai lena mea, ae e moomia ai se fuataga o le ositaulaga. Soo se itu lava, ou te faamoemoe o le a le mafua i la’u savali lou “[alu] ese ai … ma le tiga” e pei ona faia e le alii talavou. (Tagai Mataio 19:20–22.) Ae, ou te talitonu o le a outou “o i o outou ala ma le olioli” (MF&F 84:105) ona tou te mananao e faaleleia ma e tou te manatu tou te mafaia.

E ui i lea, o se mea masani le lagona o le le atoatoa pe a tatou mafaufau i mea na valaau mai le Alii ia i tatou e fai. O le mea moni, afai e te fai mai ia te a’u ua e lagonaina atoa e mafai ona faataunuuina ou tiute faaleperisitua, atonu ou te popole e te le o malamalama e uiga i ai. I se isi itu, afai e te fai mai ia te a’u ua e lagona le fiu ona ua e le gafatiaina le galuega, ona ou fia fesoasoani atu lea ia te outou ia malamalama i le auala o faalautele ai ma faamalosia ai e le Alii e o umiaina Lana perisutua ina ia faia mea e le mafai ona latou faia na o i latou.

E moni lenei mea mo a’u i lo’u valaauga e pei foi o outou i o outou valaauga. E leai se tasi o i tatou e mafai ona faia le galuega o le perisitua, ma faia ia lelei, ao faalagolago patino lava i lo tatou lava atamai ma taleni. Ona e le o sa tatou galuega lenei—o le [galuega] a le Alii. Pau lava la le auala e faataunuu ai o le faalagolago atu ia te Ia, pe o oe o se tiakono fou faamoemoeina faatoa valaauina ma se galuega e aumai sina vaega o le mana faaleagaga i le sauniga o le faamanatuga; po o se faiaoga o aiga talavou ua tofia e le Alii ia alofa ma auauna atu i se aiga e te le iloa ma e foliga mai e le mananao i lou alofa po o lau auaunaga; po o se tamā o silafia e tatau ona e pulefaamalumalu i lou aiga i le amiotonu, ae atonu e te le o mautinoaina le auala e fai ai, ma ua le lava le taimi, ona ua vave ona tuputupu ae na tamaiti ma ua foliga matuai faigata ma vevesi le lalolagi.

Afai la ua e lagonaina sina lofituina, ia avea lena mea o se faailoga lelei. Ua tau atu ia te oe e mafai ona e lagonaina le tulaga o le faatuatuaga ua tuu atu e le Alii ia te oe. O lona uiga o loo i ai sou malamalamaaga laitiiti i le tulaga moni lava o le perisitua.

E toalaiti lava nai tagata i le lalolagi o i ai lena malamalama. Atonu e oo lava ia i latou o e mafai ona tauloto mai se faauigaga talafeagai e le o malamalama moni i ai. E i ai nisi mau, e ala i le mana o le Agaga o latou tauaveina, e mafai ona faateleina lo tatou lagona o le ofo tele e faatatau i le perisitua paia. O nisi nei o na mau:

“O le mana ma le pule o le … Perisitua Mekisateko, o le umia lea o ki o faamanuiaga uma faaleagaga o le ekalesia—

“O le mauaina o le avanoa e maua ai mealilo o le malo o le lagi, e tatala mai ai le lagi ia te i latou, e mafuta ai ma le faapotopotoga aoao ma le ekalesia a le Ulumatua, ma olioli i le mafutaga ma le afio ai o le Atua le Tamā, ma Iesu le puluvaga o le feagaiga fou.

“O le mana ma le pule o le … Perisitua Arona, o le umia lea o ki o le auaunaga a agelu” (MF&F 107:18–20).

“O lea, o ona sauniga [o le perisitua], ua faaalia ai le mana o le faale-atua. …

“Aua a aunoa ma lea, e leai se tagata e mafai ona vaai i fofoga o le Atua, le Tama, ma ola” (MF&F 84:20, 22).

“O lenei perisitua maualuga ua tusa ma le faatulagaga [a le] Alo [o le Atua], o le faatulagaga lea sa i ai mai le faavaega o le lalolagi; po o i ni isi upu, ua leai se amataga o ona aso po o se gataaga o ona tausaga, ona ua saunia mai le vavau e oo i le faavavau atoa, e tusa ma lona muai silafia o mea uma” (Alema 13:7).

“O tagata uma lava ua faauuina e tusa ma lenei faatulagaga ma valaauga e tatau ona maua le mana, e ala i le faatuatua, e soloia ai mauga, e vaevaeina ai le sami, e faapaʼumātuina ai vai, e faaliliuese ai vai i o latou alatafe;

“E faafememeaiina ai autau a atunuu, e vaevaeina ai le fogaeleele, e lepetia ai soo se noataga, e tu atu i luma o le Atua; e faia ai mea uma e tusa ma lona finagalo, e tusa ma lana poloaiga, e faatoilalo ai itumālō ma mana; ma o lenei mea e ala i le finagalo o le Alo o le Atua lea na i ai aʼo lei faavaeina le lalolagi” (Faaliliuga a Iosefa Samita, Kenese 14:30–31 [i le faaopoopoga a le Tusi Paia].

O se tasi o auala e tali atu ai i ia faamatalaga faagaeetia e uiga i le mana o le perisitua o le mafaufau lea e le o faatatau ia mea ia i tatou. O le isi auala e tali atu ai o ni fesili manatunatu, fesili ifo i o tatou lava loto, e pei o fesili nei: Na ou lagona ea na tatalaina mai le lagi ia te a’u? Mata e faaaoga e se tasi le fuaitau “auaunaga a agelu” e faamatala ai la’u auaunaga faaleperisitua? O ou avatua ea le “mana o le faale-atua” i olaga o i latou o ou auauna atu i ai? Pe na ou soloia ea se mauga, faafememeaiina se ‘autau, lepetia noataga a se tasi, pe faatoilaloina ni mana faalelalolagi—e tusa lava pe ua na o se tulaga faafaatusa—ina ia faataunuu ai le finagalo o le Atua?

O lea suesuega e masani lava ona aumaia ai se lagona faapea e mafai ona tatou faia nisi mea e tele mo le galuega a le Alii. Ou te faamoemoe o le a aumai ai foi se lagona o lou fia faia atili o nisi mea—o se faananauga ina ia auai atoa atili i le galuega faavavega a le Alii. O ia lagona o le laasaga muamua lea i le agai atu i le avea ma se ituaiga o alii lea na fuafua ai le auaunaga faaleperisitua e gaosia.

O le isi laasaga o loo faamatalaina i se fegalegaleaiga i le va o Ieova ma Enoka. Ua tatou iloaina o Enoka o se perofeta malosi o le na faavaeina Siona i le lotolotoi o le amioleaga tele. A o lei avea o ia ma se perofeta malosi, sa vaai Enoka ia te ia “ua nao se tama, … e amu [le] tautala,” ma inosia e tagata uma (Mose 6:31). Faalogo i upu a le Alii na faaaoga e faamalosiau ia Enoka. O Ana foi upu ia ia te outou o e ua valaauina e auauna atu i isi i le avea ai ma se e umia le perisitua:

“Ma sa fetalai mai le Alii ia Enoka: Alu atu ma fai e pei ona Ou poloaiina ai oe, ma e leai se tagata o le a atia oe. Tatala lou gutu, ma o le a faatumuina, ma o le a Ou tuu atu ia te oe upu e te tautala ai, aua ua i oʼu lima tagata uma, ma o le a Ou faia e pei ona foliga lelei mai ia te aʼu. …

“Faauta ua i ou luga loʼu Agaga, o le mea lea o au upu uma o le a Ou taʼutonuina; ma o le a sosola ese mauga i ou luma, ma o le a liliu vaitafe mai i o latou alātafe; ma o le a mau oe ia te aʼu, ma aʼu ia te oe; o lea, savali faatasi ma aʼu” (Mose 6:32, 34).

Uso e, o lo tatou faauuga i le perisitua o se valaaulia mai le Alii e savavali faatasi ma Ia. Ma o le a le uiga o le savavali faatasi ma le Alii? O lona uiga o le faia o mea Na te faia, auauna atu i le ala o Ia auauna atu ai. Na Ia ositaulagaina Lona lava tulaga toafimalie ina ia faamanuia ia i latou e le tagolima, o se mea lena tatou te taumafai e fai. Na foliga mai sa Ia matauina faapitoa ia tagata o e na le amanaiaina ma teena e tagata, o lea e tatau ai foi ona tatou taumafai e faia lena mea. Na Ia molimau mai ma le malosi ae alofa i le moni o aoaoga faavae na Ia mauaina mai Lona Tama, e tusa lava pe sa lei taliaina, ma ia tatou faia foi. Sa ia fetalai mai i tagata uma, “O mai ia te a’u” (Mataio 11:28), ma e tatou te fai atu i tagata uma, “O mai ia te Ia.” I le avea ai ma e umia le perisitua, o i tatou o Ona sui. Tatou te le galulue mo i tatou lava ae mo Ia. Tatou te le tautatala i ni a tatou upu ae o Ana upu. O le a sili ona silafia lelei o Ia e tagata o tatou auauna i ai ona o la tatou auaunaga.

O le taimi lava tatou te talia ai le valaaulia a le Alii “Savavali faatasi ma a’u,” o le a suia le natura o la tatou auaunaga faaleperisitua. O le a faafuasei lava ona maualuga ma faamamaluina ae ua sili foi ona gafatia, ona ua tatou iloa e le o tuua na o i tatou. Sa ou lagona le sili ona malosi o lenei mea ina ua tuuina e Peresitene Thomas S. Monson ona aao i luga o lo’u ulu i le iva tausaga ua tuanai ma faamanuia a’u ao amataina la’u auaunaga i lo’u valaauga o i ai nei. I lena faamanuiaga, sa ia taulotoina ai upu nei a le Faaola: “Ai se na te talia outou, o iina o le a Ou i ai foi, ona o le a Ou alu muamua atu i o outou luma. O le a Ou i ai i lo outou lima taumatau ma lo outou agavale, ma o le a i ai lo’u Agaga i o outou loto, ma sio faataamilo outou e a’uagelu, e sapasapai outou i luga” (MF&F 84:88).

Na ou faalagolago i lena folafolaga i le tele o taimi, ma ua ou vaaia le faataunuuina i le tele o auala i le aluga o lo’u 72 tausaga o le auaunaga faaleperisitua. Sa tupu ina o avea a’u ma se Perisitua Arona fou ma se tofiga e tufaina le faamanatuga. O le fefe tele nei o’u faia se mea sese, sa ou alu ai i fafo o le falesa ao lei amataina le sauniga ma tatalo ma le naunautai ina ia fesoasoani mai le Atua ia te a’u. Sa oo mai ai se tali ia te a’u. Sa ou lagona le faatasi o le Alii ma a’u. Sa ou lagona Lona talitonuga ia te a’u, ma o lea sa ou lagona ai le talitonuga i la’u vaega i Lana galuega.

Sa toe tupu foi ao o’u auauna atu o se epikopo. Sa ou mauaina se valaau mai le telefoni mai se tamaitai o le sa faia se mea sese matautia ma ua feagai nei ma se filifiliga faigata e suia ai le olaga. Ao ou asiasi atu ia te ia, sa ou lagona ua ou iloa le tali i lana faafitauli, ae sa malosi foi sou lagona e le tatau ona ou tuu atu ia te ia lena tali—e tatau ona ia mauaina mo ia lava. Sa ou fai atu ia te ia “Ou te talitonu o le a tau atu e le Atua ia te oe le mea e te faia pe a e ole atu ia te Ia.” Sa lipotia mai e ia mulimuli ane sa ia ole atu ia te Ia ma sa Ia tau atu ia te ia.

I se isi tulaga na oo mai se isi valaau mai le telefoni ao avea au ma se epikopo—o le taimi la lea mai leoleo. Sa tau mai ia te a’u na so’a e se avetaavale ‘ona le tioata o le faapaologa o se faletupe i lana taavale. Ina ua vaaia e le avetaavale le mautonu le faalālā atu e le leoleo faitotoa o lana fana, sa tagi o ia, “Aua le fanaina [a’u]” “O au o se Mamona!”

Na iloaina o le avetaavale ‘ona o se tasi o la’u uarota, e lei leva ona papatiso. A o ou faatalitali e talanoa ia te ia i le ofisa o le epikopo, sa ou fuafuaina a’u upu e tau atu ia te ia ia ona lagona ai le salamo mo le auala na ia solia ai ana feagaiga ma faamaasiasi ai le Ekalesia. Peitai ao ou nofo ma vaavaai atu ia te ia, sa ou lagona se leo i lo’u mafaufau o fai mai, sa manino lava e pei o talanoa mai se tasi ia te a’u, “O le a Ou tuu atu ia te oe ina ia vaai atu ia te ia e pei ona Ou vaai ia te ia.” Ma, mo sina taimi puupuu, sa suia atoa ona foliga ia te a’u. Ou te lei vaai atu i se alii talavou meia ae o se atalii atamai ma malualii o le Atua. Na faafuasei lava ona ou lagonaina le alofa o le Alii mo ia. O lena vaaiga na suia ai la maua talanoaga. Na suia ai foi a’u.

Sa ou aoaoina ni lesona taua mai nei aafiaga o le savavali faatasi ma le Alii i le faia o Lana galuega. Ou te fia faasoa atu ma outou ni [lesona] se tolu o [na lesona]. O le [lesona] muamua e faapea e silafia ma o le a lagolagoina e le Atua e oo lava i se tiakono sili ona fou ma laitiiti. E le tatau lava ona e lagona ua e laitiiti tele pe ua e le taua tele mo Ia Na te silafia ai oe ma le auaunaga o loo e tuuina atu i Lona suafa.

O le lesona lona lua, o le galuega a le Alii e le na o le foia o faafitauli; o le atiinaeina o tagata. A o e savali faatasi ma Ia i le auaunaga faaleperisitua, atonu o le a e iloaina o nisi taimi o mea e foliga o se vaifofo sili ona lelei e le o le vaifofo lea e finagalo i ai le Alii aua e le o faatagaina ai tagata ia tuputupu ae. Afai e te faalogo, o le a Ia aoao atu ia te oe Ona ala. Manatua o le galuega ma le mamalu o le Atua e le na o le faatautaia o se faalapotopotoga aoga; o le “aumaia [o] le tino ola pea ma le ola faavavau o le tagata” (Mose 1:39). O le mafuaaga lenei na Ia tuuina mai ai le pule o Lana perisitua i tagata soifua le atoatoa e pei o oe ma a’u ma valaaulia i tatou ina ia auai i Lana galuega. O lo tatou alualu i luma o Lana galuega lea!

O le lesona lona tolu la: O le savavali faatasi ma le Faaola i le auaunaga faaleperisitua o le a suia ai le ala e te tagai atu ai i isi. O le a Ia aoao atu outou e tagai atu ia i latou e ala atu i Ona fofoga, o lona uiga o le tagai atu i tua atu o foliga o i fafo ma i totonu o le loto (tagai 1 Samuelu 16:7). O le auala lea na silasila atu ai le Faaola ia Simona e le o se faifaiva le faatuatuaina ae o Peteru, o le taitai malosi i le lumanai o Lana Ekalesia (tagai Luka 5:1–11). O le auala lea na Ia silasila atu ai ia Sakaio e le o se tagata ‘ao lafoga piopio na vaaia e isi ae o se atalii faamaoni ma sa’o a Aperaamo (tagai Luka 19:1–9). Afai ua leva ona lua savavali ma le Faaola, o le a e aoao e vaai atu i tagata uma o se atalii o le Atua ma le gafatia le faatuaoia, e tusa lava pe na a mai lona [tagata] ua tuanai. Ma afai e faaauau pea ona lua savavali faatasi ma le Faaola, o le a e atiinaeina se isi meaalofa o ia te Ia—o le tomai e fesoasoani atu i tagata ia iloa lena gafatia i totonu o i latou lava ma ia salamo.

O’u uso pele o le perisitua, i le tele o auala, ua pei i tatou o soo e toalua o e na savavali i le auala i Emau i lena uluai Aso Sa o le Eseta. O le taeao lea o le Toetu, ae sa lei mautinoa e i laua sa i ai se toetu po o le a foi le uiga o le toetu. Sa latou “faamoemoe o [Iesu le Nasareta] o le a togiolaina Isaraelu,” ae ua “loto faigata ona talitonu” i latou i mea ua aoao atu e tusitusiga paia e uiga i le toetu. Ao la savavali ma taumafai e fesueai faatasi, “Ona faalatalata mai ai lea o Iesu, ua o faatasi ma i laua. A ua punitia o laua mata, o lea ua le iloa ai o ia e i laua.” (Tagai Luka 24:13–32.)

Ou te molimau atu a tatou savavali i le ala o le auaunaga o le perisitua, tatou te malaga faatasi ma le Faaola o Iesu Keriso, aua o Lona auala, o Lona ala lea. E muamua atu Lona malamalama i o tatou luma, ma sio faataamilo i tatou e Ana agelu. Atonu e le lava so tatou malamalama atoatoa e uiga i le perisitua pe faapefea ona faatino e pei ona Ia faia. Peitai afai tatou te silasila totoa atu i na taimi pe a “mu [o tatou] loto i totonu o i taua” (Luka 24:32), o le a pupula o tatou mata, ma o le a tatou vaai i Lona aao i o tatou olaga ma i la tatou auaunaga. Ou te molimau atu o le a sili ona tatou iloaina o Ia i le galulue faatasi ma Ia ma auauna atu ia te Ia i le galuega sili o le aumaia o le faaolataga i fanau a le Atua. “Aua pe faapefea ona iloa e se tagata le matai e lei auauna i ai o ia, ma o se foi o se tagata ese ia te ia, ma ua mamao mai mafaufauga ma faamoemoega o lona loto?” (Mosaea 5:13). O Iesu Keriso o lo tatou Matai. O Lana Ekalesia lenei. O Lana perisitua lea tatou te umiaina. Tau ina ia tatou filifili taitoatasi ia savavali faatasi ma Ia ma ia iloa le ala o loo Ia savali faatasi ai ma i tatou.

Ou te tuu atu lau molimau faamaoni o Iesu o le Keriso, lo tatou Alii toetu. Ou te molimau atu o le perisitua ua Ia tuuina mai ia i tatou o le mana lea e tautatala atu ai ma galulue i Lona suafa. O i tatou o fanau o se Tama Faalelagi alofa o lē ē tali mai ia tatou tatalo ma auina mai le Agaga Paia e faamalosia i tatou i tiutetauave uma faaleperisitua ua faamanuiaina i tatou ia mauaina. Na vaai Iosefa Samita i le Tama ma le Alo. Na ia mauaina ki o le perisitua lea na pasi mai ia Peresitene Thomas S. Monson, o lē o loo faaaogaina i latou i le asō. Ou te molimau atu ai i le suafa o Iesu Keriso, amene.