Sila Nakakita Kaniya
Kini nga mga indibidwal tinuoray nga nakakita sa nabanhaw nga Manluluwas, apan kamo usab mahimong usa ka saksi ni Kristo sa inyong kaugalingong paagi.
Siya Nabanhaw,ni Greg K. Olsen, dili mahimong pakopyahan
Sama sa unsa kaha nga makasaksi sa nabanhaw nga Manluluwas? Alang sa gatusan ka mga tawo sa panahon ni Jesus, dili na sila angay nga maghanduraw—sila mismo nakasaksi niini. Ang mga kasulatan naghisgot og dili mominos usa ka dosena nga narekord nga mga panghitabo sa Bag-ong Tugon ug pipila pa diha sa Basahon ni Mormon sa dihang ang nabanhaw nga Ginoo mipakita ngadto sa katawhan. Kini nga mga indibidwal nakasaksi sa usa sa pinakadakong milagro sa kasaysayan: Ang pagbuntog ni Jesukristo sa kamatayon ug ang paghimong posible nga ang matag usa kanato mabuhi pag-usab. Talagsaon kaayo, di ba?
Busa unsa man gayud ang ipasabut nga mahimong saksi ni Kristo? Atong susihon ang pipila niini nga mga higayon diha sa mga kasulatan ug maghunahuna kon sa unsang paagi kita, bisan wala makakita Kaniya sa pisikal, mamahimo usab nga mga saksi ni Kristo.
Maria Magdalena
Si Maria Magdalena mao ang una nga saksi. Sa Dominggo sa buntag human sa Pagkalansang sa Krus, miadto siya sa lubnganan uban sa pipila ka mga babaye aron sa pagdihug sa lawas sa Ginoo. Sa dihang nadiskubrihan ni Maria ang lubnganan nga walay sulod, mihilak siya. Dunay miduol kaniya gikan sa luyo ug nangutana, “Babaye, nganong nagahilak ikaw?” Hunahunaa ang iyang kasurprisa dihang nadiskubrihan niya nga si Jesus kadto, nabanhaw gikan sa mga patay. (Tan-awa sa Juan 20:1–18.)
Duha ka mga Disipulo sa Dalan padulong sa Emmaus
Ang Dalan Paingon sa Emmaus, ni Jon McNaughton
Si Cleopas ug laing disipulo naglakaw padulong sa Emaus dihang dunay mikuyog kanila nga usa ka estranghero. Wala sila makaila sa ilang bag-ong kauban, apan atol sa ilang dungan nga pagpanihapon, ang estranghero mipikaspikas og tinapay. Dayon ang ilang mga mata nabuksan, ug sila nakaamgo nga kauban diay nila ang Manluluwas sa ilang pagbiyahe. “Dili ba ang atong mga kasingkasing nagdilaab man sa sulod nato … ?” nangutana sila sa usag usa, namalandong sa kumpirmasyon nga ilang gibati nga tinud-anay gayud nga nakauban nila Siya. (Tan-awa sa Lucas 24:13–34.)
Ang Napulo ka mga Apostoles
Tan-awa ang Akong mga Kamot ug mga Tiil, ni Harry Anderson
Ang duha ka mga disipulo kinsa mibiyahe ngadto sa Emmaus uban ni Kristo mibalik sa Jerusalem ug misulti sa napulo sa mga Apostoles mahitungod sa ilang kasinatian. Samtang namulong sila, ang Manluluwas Mismo mipakita kanila, nga nag-ingon, “Tan-awa ninyo ang akong mga kamot ug mga tiil nga mao gayud ako: hikapa ninyo ako ug tan-awa kay ang espiritu walay unod ug mga bukog ingon sa inyong nakita nga ania kanako.” (Tan-awa sa Lucas 24:36–41, 44–49.)
Si Apostol Tomas
painting ni Tomas pinaagi ni Brian Call
Si Apostol Tomas wala didto sa dihang ang Manluluwas unang mipakita ngadto sa ubang mga Apostoles, mao nga wala siya motuo nga si Kristo nabanhaw. Paglabay sa usa ka semana, si Kristo mipakita pag-usab ngadto sa mga Apostoles. Niining higayuna si Tomas anaa didto, ug tungod kay nakakita siya ni Kristo, siya mituo nga Siya nabanhaw. Ang Manluluwas mipahimangno kang Tomas batok sa pagtuo lamang human makakita “Mitoo ba ikaw tungod kay nakita mo ako? Dalaygon kadtong wala managpakakita, ngani nanagpanuo.” (Tan-awa sa Juan 20:24–29.)
Ang Napulog Usa ka mga Apostoles sa Lanaw sa Tiberiades
Ang Nabanhaw nga Kristo sa Dagat sa Tiberiades, ni David Lindsley
Usa ka adlaw wala madugay human sa Pagkabanhaw, pipila sa mga Apostoles nangisda sa Lanaw sa Tiberiades apan wala kaayoy swerte. Pagkasunod buntag, ang Manluluwas mipakita ug mitambag kanila nga itaktak ang pukot diha sa tuo nga bahin sa sakayan. Dihang ila kining gihimo, ang pukot nakakuha og daghan kaayong isda nga naglisud sila sa pagbira niini! Human magdungan sa pagpangaon, ang Manluluwas mitudlo mahitungod sa importansya sa pagpangalagad sa uban, nga nag-ingon, “pakan-a ang akong mga karnero.” Ang mga Apostoles mogahin sa tibuok nilang kinabuhi sa pagbuhat gayud niini—nagtudlo sa katawhan mahitungod ni Kristo—ug sa ubang sitwasyon, ilang gibuhis ang ilang kinabuhi alang sa kawsa. (Tan-awa sa Juan 21:1–22.)
Ang mga Nephite sa Amerika
Usa ka Magbalantay sa Karnero,ni Howard Lyon
Atol sa Paglansang sa Krus, ang yuta sa Amerika nadaut tungod sa mga linog, mga sunog, ubang natural nga mga kalamidad, ug tulo ka adlaw nga kangitngit sa pagtimaan sa kamatayon sa Manluluwas. Wala madugay, si Kristo mikunsad gikan sa langit ug mibisita sa usa ka pundok sa 2,500 ka mga tawo nga nagtapok duol sa templo sa Bountiful. Gidapit Niya ang mga tawo nga hikapon ang mga uwat sa samad sa Iyang mga kamot ug tiil ug kilid, mihalad og usa ka sermon, ug mipanalangin sa mga bata nga Nephite sa tagsa-tagsa. Mas daghan pang tawo ang nagpundok pagkasunod adlaw, ug ang Manluluwas mibisita ug mitudlo kanila. Ang mga disipulo sa katapusan miporma sa Simbahan ni Kristo, ug ang mga Nephite nakadawat og ingon ka gamhanang saksi nga sila ug ang mga Lamanite usab nakabig ngadto sa Ginoo. (Tan-awa sa 3 Nephi 11–18; tan-awa usab sa 3 Nephi 8–10; 4 Nephi 1.)
Mga Saksi Kaniadto ug Karon
Si Kristo mipakita usab ngadto sa daghan pang uban, lakip sa pipila ka mga babaye kinsa miadto sa lubnganan aron motabang kang Maria Magdalena sa pagdihug sa lawas ni Kristo, sa usa ka grupo sa sobra 500 ka mga tawo, kang Santiago, ug kang Pablo. (Tan-awa sa Mateo 28:9; Mga Buhat 9:4–19; 1 Mga Taga-Corinto 15:6–7; tan-awa usab sa 3 Nephi 19; 26:13.)
Tingali wala kitay oportunidad nga makakita sa Manluluwas sama niini nga mga saksi, apan mahimo gihapon kamo nga saksi ni Kristo. Mahimo kamong magtinguha sa Manluluwas sa personal nga paagi, sama sa gibuhat ni Maria sa dihang miadto siya sa lubnganan, pinaagi sa pagkat-on og dugang mahitungod Kaniya. O mahimo kamong magpakita sa inyong hugot nga pagtuo diha Kaniya pinaagi sa pagsunod sa mga sugo ug pagsunod sa tambag sa mga propeta. O mahimo ninyong ilhon ang mga panalangin sa Manluluwas diha sa inyong kinabuhi, sama sa gibuhat sa duha ka disipulo nga naglakaw padulong sa Emaus. Niining panahon sa pasko sa Pagkabanhaw, hunahunaa kon unsay gipasabut nga mahimong saksi ni Kristo. Kining mga tawhana literal gayud nga mga saksi kinsa tinud-anay nga nakakita sa nabanhaw nga Kristo—apan dili lang kana ang bugtong paagi nga makasaksi kamo Kaniya sa inyong kinabuhi.