Maghunahuna kang Jesus
Ang tagsulat nagpuyo sa California, USA.
Naghinam-hinam si Mía. Mao kadto ang iyang unang higayon diha sa simbahan! Ang mga misyonaryo misulti sa iyang pamilya mahitungod niini nga simbahan. Nakahukom sila nga motambong.
Mitan-aw sa palibut si Mía. Nakakita siya og puti nga panapton diha sa lamesa. Dunay butang diha sa ilalum niini.
“Unsay naa sa ilalum sa panapton?” Si Mía nangutana sa usa sa mga misyonaryo.
Mipahiyum si Sister Hanson. “Kana ang sakrament.”
Sakrament. Taas kadto nga pulong. Nakadungog si Mía sa mga misyonaryo nga misulti ni Mama ug Papa mahitungod niini. Apan dili siya sigurado kon unsa kadto.
Ang tanan nanganta og awit. Duha ka lalaki miukab sa puti nga panapton. Dunay mga tray sa pan ilalum niini! Mitan-aw si Mía kanila nga nagpikas-pikas sa pan ngadto sa mga piraso.
Human sa kanta usa ka lalaki nag-ampo. Ang ubang mga lalaki mipasa sa pan ngadto sa tanan.
“Ang pan nagtabang kanato sa paghinumdom sa lawas ni Jesus,” mihunghong si Sister García.
Mipunit si Mía og usa ka piraso sa pan. Iyang gihunahuna si Jesus nga nagbarug sa iyang atubangan.
Dayon dihay usa pa ka pag-ampo. Ang mga lalaki mipasa sa mga tray nga dunay gagmay nga mga kopa sa tubig.
“Ang tubig nagtabang kanato sa paghinumdom sa dugo ni Jesus,” mihunghong si Sister García. “Namatay Siya alang kanato tungod kay Siya nahigugma kanato.”
Mikuha si Mía og usa ka kopa sa tubig. Naghunahuna siya kon unsa siya kamahal ni Jesus. Gibati niya nga daw gigakos siya Niya.
Wala madugay si Sister Hanson mihatag ni Mía og usa ka gamay nga hulagway ni Jesus. “Mokaon kita sa pan ug moinom sa tubig aron mahinumdom kang Jesus ug mosaad sa pagsunod Kaniya.” Mipahiyum siya. “Unsay imong hunahuna sa sakrament?”
Mitan-aw si Mía sa litrato ni Jesus. Iyang nahinumduman ang mainit niyang pagbati. Mipahiyum siya. “Nindot kaayo kadto! Gimahal nako si Jesus.”