Nakalimtan nga mga Basahon, Nahinumduman nga mga Pagpamatuod
Ang tagsulat nagpuyo sa Cagayan, Philippines.
Ang tanan nagtan-aw ngari kanako. Makapanalipod ba ako sa Simbahan sa akong yano nga pagpamatuod?
Usa ka tuig ako adunay tumong sa pagpalambo sa akong espirituhanon nga pagkat-on. Magdala ko og mga basahon, pamphlet, mga manwal ug mga kasulatan sa Simbahan bisan asa, lakip na sa eskwelahan, samtang gigutom ko sa mga pulong sa Dios. Apan mihinay ang akong mga paningkamot sa dihang nagkapuliki ko sa pagtuon sa umaabut nga eksamen.
Usa ka adlaw ang among magtutudlo nangulo sa usa ka panaghisgot diin gihangyo niya ang tanan nga mga estudyante nga dili mga Katoliko sa pagbarug. Ako ra ang Santos sa Ulahing mga Adlaw sa klase. Unom ka laing mga estudyante mibarug usab.
Dayon gipangutana mi: Unsa nga simbahan nga kamo nahisakop? Kinsa ang nagtukod? Sa unsang paagi giestablisar ang inyong simbahan?
Ako ang katapusan nga mitubag. Gikulbaan ko sa dihang nakaamgo ko nga wala nako madala ang mga libro sa Simbahan, apan naningkamot ko sa paghinumdom sa mga butang nga akong gitun-an. Usa ka bersikulo sa Biblia misantop sa hunahuna:
“Sumalig ka sa Ginoo sa bug-os mong kasingkasing, ug ayaw pagsalig sa imong kaugalingong salabutan.
Sa tanan nimong mga dalan ilha siya, ug siya magamando sa imong mga alagianan” (Mga Proverbio 3:5–6).
Mibarug ko atubangan sa klase nga nagmaisugon ug nakalimot sa akong mga kahadlok. Miingon ko nga ako miyembro sa Ang Simbahan ni Jesukristo sa mga Santos sa Ulahing mga Adlaw. Gipakigbahin nako ang istorya sa usa ka batan-on, nga si Joseph Smith, kinsa nakakita sa Dios. Mibati ko og kainit sa dughan, ug mga luha nangatagak sa akong mga mata. Gipakigbahin nako nga ang Simbahan naorganisar niadtong Abril 6, 1830, ug ako nagpamatuod nga usa ka propeta sa Dios gitawag ug mipahiuli sa priesthood. Nagpamatuod ko nga ako nasayud nga kining tanan tinuod.
Ang daghang mga oras sa pagtuon sa ebanghelyo bililhon. Nakatabang kini nako sa pagpanalipod sa akong hugot nga pagtuo ug sa pagpakigbahin sa ebanghelyo. Nalipay kaayo ko, sa dihang pipila ka semana ang milabay, upat sa akong mga kauban nagpasakop sa simbahan.
Kana nga kasinatian mitudlo kanako sa importansya sa pagpamatuod. Sa sinugdanan naghunahuna ko nganong ang Ginoo wala moaghat nako sa pagdala sa akong mga libro niana nga adlaw. Nakatabang unta kini kanako sa pagtubag sa mga pangutana. Apan dayon ako nakaamgo nga dili kinahanglan nga atong sag-ulohon ang tanan mahitungod sa Simbahan o nagasalig sa pakisayran sa kasulatan—kinahanglan nga magtuon kita, magsunod, ug magpakigbahin sa ebanghelyo, mosalig sa Espiritu Santo. Tingali wala nako ang mga basahon, apan duna koy pagpamatuod.